الموضوع: أول تقرير بعد شراء ريو هاتشباك 2013 و الحمد لله

بسم الله الرحمن الرحيم
---------------------
واخيرا و بعد طول تفكير و معاناه و مفاضلة و التفريط فى عربيتى الجيتز القديمة ( عزيزة 1 )

استقريت على الريو الهاتشباك الفولى لودد الخليجى و الحمد لله اشتريتها من سمير ريان ب 130 الف لونها فضى و الفرش موكا فى اسود ... خليجى سعودى
المواصفات :
المواصفات : 1400 سى سى - 109 حصان - 2 ايرباج - abs - ebd - جنوط 17 - تكييف - باور - طارة ملتى - مثبت سرعة - تكييف تاتش - حساس نور - حساس مطره - حساس ركن - بلوتوث - مرايات ضم - ايموبلايزر - مفتاح بصمة - فوانيس عدسات و ليدات قدام - فوانيس ليدات خلفى - فرش جلد - فوجات

اول انطباع عن العربية انى راكب حاجه محترمه زى الجولف و البرافو
بالنسبة للتقييم بعد اول 80 كم فقط رغم انها اتحكت من توكتوك ( منه لله ) و من حمار ( عربجى ) بس الحمد لله بسيطة
--------------------
1- السحب : ممتاز و مفيش مشكله خالص و لا موضوع انها بتتأخر 4 ثوانى لحد ما تستجيب و الكلام ده ماشاء الله بجد بالنسبه انى كان معايا جيتز مانوال ... سحبها ممتاز مش 1400 خالص

2- العفشة : انعم من عفشة الجيتز بمراحل رغم الجنط ال 17 الى منشفها حبه بس فى الوقت نفسه بيدى ثبات ماشاء الله جميل .... بس حاسس انها نشفت بعد ما حطيت فى العجل نيتروجين !!! مش عارف ده وهم ولا ايه ؟؟ رغم ان كل الناسس اجمعت على االنيتروجين فى الجنط ال 17 علشان العربية تكون مرتاحة و متطلعش الفرده بلالين( هما الى قالو كده ) ... بس حاسسها كانت مرتاحة اكتر فى الهواء العادى ... مش عارف ؟؟

3- العزل : ممتاز بمعنى الكلمه بمجرد قفل الازاز انت فى عالمك الخاص ..

4- استهلاك البنزين : و هى دى الحاجة الى مش قادر احكم عليها لان لحد دلوقتى ماشى بتاع 80 كم و ربع التنك خلص بس الصراحة كله زجمة مفيش طريق سريع خالص ... مش عارف الدنيا هتتظبط ولا فى مشكلة ؟؟؟؟ الجيتز فى الزحمة كانت بتعمل من 180-160 كم فى الصفيحة

بصراحة انا الحمد لله رغم انى كنت خايف منها بس مبسوط منها جدا جدا و منتظر موضوع البنزين ده يبان الرؤية فيه علشان الفرحة تكتمل و اغلب الناس بتقولى متركزش مع استهلاك البنزين فى اول 5 الاف كم لحد ما الموتور ما يكون فتح و لين و الدنيا تكون ظبطت شويه ..

اى استفسار انا تحت الامر وياريت الى يعرف حاجة عن قصه النيتروجين يفيدنى ؟؟؟ وكمان موضوع استهلاك البنزين