الموضوع: كفاية اني في العيد أسمع صوت خروف بيمأمأ

المشاركة الأصلية كتبت بواسطة OlaOsman

النهاردة كنت باعمل انترفيو لحد كان شغال في الخليج و دلوقتي هو بيشتغل في مصر.. سألته من ضمن أسئلتي ليه عن إمكانية انه يفكر في السفر تاني.. قال لي لا يمممممممكن.. قلت له مهما كان العرض؟ قال لي انا عشت في أبو ظبي و دبي و البحرين بس مش حابب اني أرجع اعيش هناك تاني، بالرغم من اني جالي قريب عرض خيالي في أبو ظبي.. قلت له طيب ليه؟ قال لي انا هناك كنت عايش في مستوى عالي جدا.. بس حاسس اني عايش حياة مش حياتي.. حاسس اني مش انا.. و ولادي بدأوا ياخدوا طباع مش بتاعتهم و تصرفاتهم استغربها منهم.. طيب هاقول لك على حاجة هاتستغربيها - لسه هو بيكمل كلامه - تصدقيني لو قلت لك اني و انا هنا في مصر كفاية اني أسمع في العيد خروف بيمأمأ؟ كفاية إني امشي في شوارع مصر في رمضان قبل الفطار و اشوف الناس و هي فارشة بالطرشي و أكياس العرقسوس و السوبيا.

طبعا انا ساعتها ضحكت، قال لي و الله انا باتكلم بجد. قلت له هو انا الصراحة اتكلمت في موضوع السفر ده مع ناس كتير و قليل بحكم شغلي، انما أول مرة أسمع حد بيتناول الموضوع من المنظور ده :)

انا فعلا استغربت كلامه جدا.. بس يمكن عشان عمري ما سافرت و لا اتغربت ما حستش بإحساسه؟ بس فعلا كلامه يستحق التأمل.. و لا انتوا ايه رأيكوا؟

طب والراجل ده عدى الأنترفيو دى ولا لأ يا علا ؟؟؟؟؟؟

تصدقى هزعل أوى لو مكنتيش عدتيه
ده كفاية كلمة " الخروف بيمأمأ" دى :) :) :)
ربنا يكرمه ويلاقى شغل أحسن من اللى كان بيشتغله هناك كمان

المشاركة الأصلية كتبت بواسطة tutankhamoun

طيب و الحل

العيشة معاهم تجيب الضغط ............... نظرا للإختلاف في الطبا ع
و ده موضوع نسبي
اللي طباعه ماشية مع الناس
يبقى زي الفل
اللي طباعه مختلفه مع الناس زي حالاتي ........... يبقى هايموت قريب
و أنا عايزكم لو مت
تقروا الفاتحة على روحي و تقولوا توت شهيد المصريين



في الآخر ................. مصر حلوة ............. و مش حلوة

الحل يا توت اننا نتأقلم مع العيشة .... وبلاش نقارن بالبلاد التانية ....
انا عن نفسي اتأقلمت مع عدم النظام والهرجلة واللخبطة ..... وما بقتش استغرب من اي حاجة