الموضوع: مشكلة جديدة فى العفشة ارجو الافادة

الف شكر ياهيما على الشرح الجميل
تحياتى لك

المشاركة الأصلية كتبت بواسطة aftr

بس ازاى مضروبه ياجماعه افرض انا خارج الضمان ومحتاج قطع غيار من التوكيل هل التوكيل يبيع قطع غيار مضروبه ده كده يكون نصب ---------------- خالد صوت التزيق ده بتسمعه فى الطاره زى صوت تزيق الباب كده لوكده كانت عندى المشكله دى بعد تركيب علبه دريكسيون روحت كلمت المهندس على التزيقه فك علبه كده فى الطاره وربط وجاب wd40 ورش عليها الصوت راح

والله يا ايمن انا مبقتش عارف ولا فاهم حاجة انا تعبت من العفشة .. انا غيرت بلى البطاحات مرتين اخرهم كانت من اسبوعين مع البطاحات نفسها والمساعدين الامامى والعربية زى ماقولت اتعدلت اسبوع ورجعت الدبدبة والخبط تانى والتزييق.
التزييق المرة دى عبارة عن صوت عويل زى صوت الديب كده او القطة لما تعوى .. عموما انا حجزت ميعاد فى ابورواش يوم الاتنين ا31-12-2012 وان شاء الله لما اخلص يومها هقولك على اللى تم بالظبط

طيب يا هيما ايه تفسيرك للمشاكل اللى انا ذكرتها

المشاركة الأصلية كتبت بواسطة hugan

خالد باشا ربنا معاك
انا مش شايف تفسير لكلامك غير ان المساعدين الجديده تالفه ومش سليمه
انا مش عارف مقصات الام 11 فيها جلب ولا مافيهاش
لان تلف الجلب ممكن يسببب التزيق اللي بتقول عليه
في حاجه تانيه انا كنت غيرت مساعدين وكان عندي تزييق جامد بعد تركيبهم واكتشفت
ان السبب في التزييق هو الجراب الجلد مانع التراب اللي بيركب اعلي المساعد كان بيحك في جسم المساعد
وتم تجليخ جزء من الطبق الل بتركب عليه السوست حتي يمنع الاحتكاك والتزيق
يعني انا مش عايز اعقك
لكن الاسبرانزا انا قولت الكلام ده قبل كده
ما يعبيها هو عفشتها السيئه

شكرا هوجان لاهتمامك
انا شاكك بشدة فعلا فى ان المساعدين والبطاحات والبلى اللى ركبوا مش تمام واعتقد هغيروهم تانى لما اروح الاسبوع الجاى ان شاء الله
انا سألت عن المقصات لمجرد الشك فيهم ومن باب المعرفة بس معرفش ان كان فيهم عيب ولا لأ انما تقرير العفشة مجبش سيرة مقصات بصراحة
باذن الله هقولك على اللى تم لما اخلص هناك

المشاركة الأصلية كتبت بواسطة hemaa_82

ال 516 و الام 11 بتغير جلب
التيجو بتغير مقصات ....

ده حسب الوكيل


نيجي للمشاكل

لما نحود الدريكسيون يمن و شمال بنحرك ايه ؟؟؟؟
1 .... قطمة الدريكسيون
2 .... علبة الدريكسيون
3... بارات الطرف
4... المساعد
5... بلية المساعد

اللي ممكن يزيق حاجتين ... المساعد لو بيحك في حاجة و البارات لو الجلب مش نضيفة
اللي ممكن يزن او يصوت ايه ؟؟ ...باور الدريكسيون

جرب تجيب wd40 و ترش علي الجلب اللي علي العجل بس و جرب ...جايز تبقي وساخة مش اكتر ...

جرب تلف الدريكسسون و العربية مش دايرة علشان نلغي الباور من المشكوك في امرهم

......


انت ساكن فين ؟؟؟ انا في الزيتون اليومين دول لو تحب نتقابل و نبص مع بعض

شكرا محمد على اهتمامك

انا ساكن فى بنها للأسف بينا مسافة وهتكون المقابلة صعبة الا اذا فى مرة كنت انا نازل القاهرة وده بيكون قليل وساعتها ان شاء الله ابقى اتفق معاك.

قبل ما ادخل فى تفاصيل ليا اسئلة عن معنى بعض الالفاظ اللى قولتها: ايه هى البارات وبلية المساعد؟ وفين هى جلب العجل بالتحديد يعنى لو جبت ال wd40 اقدر انا ارشها بنفسى ولا لازم اروح لصنايعى؟ لو امكن توضيح عشان افهم اكتر.

بالنسبة للتزييق اقصى معلوماتى كانت انه سببه بلى البطاحات بيكون مش سليم لكن انت وضحتلى حاجات مكنتش اعرفها وجايز فعلا يكون العيب فيها .. المرة دى التزييق مش تزييق بمعناه الصحيح انما هى بتعوى لما الف الطارة يمين او شمال بالذات والعربية واقفة ودايرة ومجربتش بصراحة الفها وهى مش دايرة زى ماقولت .. ياترى ايه اللى ممكن اسمعه لو لفتها وهى مش دايرة يعنى عايز توصل لان العيب ممكن يكون فين؟ فى الباور؟
عموما انا من فترة احيانا بسمع صوت زنة مع لفة الطارة وشاكك انه حاة فى الباور لكن بصفة عامة باور العربية سلس وحلو مش تقيل.

بالنسبة للدبدبة والتخبيط انت ايه رأيك؟ انا شاكك ان المساعدين الجداد فشنك وعايزين يتغيروا تانى وبمناسبة الدبدبة ان الجديد اللى بحسه ساعات بحس الدبدبة واضحة فى رجلى فى دواسة الدبرياج وانا مهدى السرعة ودايس على الدبرياج نص دوسة ومش لاقى تفسير للكلام ده ياترى ايه؟

اخر حاجة صوت تكة بسمعه ساعات جاى من ورا لما اشعر فرامل وانا بهدى مثلا داخل على مطب او ملف.

معلش انا واجع دماغكم معايا بس انا بصراحة متغاظ ان لسه العربية فى 21000 كم وفيها كل المشاكل اللى مش بتخلص دى واللى يغيظ ان كلها فى العفشة .. والله لو الاقى حد برة التوكيل وريب منى بيفهم فيها كويس كنت وديتها له وصلحتها على حسابى بس اضمن ان العيوب متتكررش تانى بسرعة لان انا اتخنقت من كتير مرواح التوكيل وسخافتهم فى التعامل