دورت على مكواة وخلصت فى مازدا 3 وهديت البيعة واشتريت بومة ف الاخر
السلام عليكم ورحمة الله وبركاته اولا
والله مشوار طويل مشيت فيه بقالى 3 اسابيع
كنت بدور على لانسر مكواة واتشقلبت ودورت ولقيت بس كله طبعا
فى الضياع اللى لقيته وكلمت تقريبا 6 تجار واحتاسوا وملقوش
ووقعت قدامى كذا واحدة بس كان معايا 4 عتاولة عربيات الصراحة
العربيات كلها كنب ومتتركبش مع انها من برا بتلمع بس من برا الله الله ومن جوا يعلم الله
قلت بس مفيش الا السوق هلاقى فيه اللى انا عايزه
شدينا الرحال وتوكلنا على الله اول امبارح سوق العاشر
من 8 الصبح ل 7 بليل دورت على مكواة السوق كله كان فيه 4 عربيات مكواة تعبااااااااااااااااااااني ن ملة
يأست طبعا وقفلت من العربية وقلت اروح بقا لسا بخرج لقيت عربية مازدا3 تحفة فنية الصراحة
اتوهمت بالعربية والجلاله خدتنى وقلت بس بلا مكواة بلا بتاع هى دى
عربية زيرو رشة اكصدام بس وجربنا العربيه وكتبنا عقد ابتدائى
بس كنت مقلق من قطع الغيار ولو عايز ابيعها سوقها ايه نظامه
وعلى اخر سلام مع الناس لقيت 100 تليفون جايلى سيبولى ركبى من العربية المازدا
سمعت شويه اسعار فى قطع الغيار غير انها تقيله فى البيع واسعار قطع غيار جهنم فى ارض الله الصراحة خير انها هتخسر جامد فى بيعتها عشان ملهاش سوق
هدينا البيعة وكانوا عازين ياخدوا 1000 جنيه بس مخدوش شلن بالطريقة الحمد لله
طبعا وانا فى السوق اتفرجت على بومة والنترا وسمعت اسعار عجيبه وعربيات تعبانه الصراحة كلها الا 2011 و 2012 عربيات زيرو مش كلها بس معظمها وسعرها فى السما
قلت شد الرحال من هنا السوق ميطمنش والعربيات زبالة (مش كلها) وتجار وصنايعيه وكله بيلعب فى المضروب
قلت ارسى على بومة بقا وخلاص جالى تليفون على عربية بومة 2009 هاف اسبورت اوتوماتيك فول اوبشن شركة برا وجوا خليجى زيرو بمعنى كلمة زيرو
من غير كلام خلصت فيها ودفعت عربونها وصاحبها مرتاح جدا ومش فارقه معاه وكان بيتكلم ف 93000 ومش فى دماغه ومعرفة ولسا العربيه جايه من السعوية وكان محتاج فلوس عايز يبيعها وخلاص اتكينا عليه فى السعر جامد جدا بس زنقته سمحتله ينزل جبتها على 83000 الف جنيه
وانا سمعت السعر دا فى السوق ل 2006 وبالعافيه وملقتش نفس السعر فى عربيه زيها فى نفس الموديل بالعكس اغلى بكتير
بس احب اقول لاى حد بيشترى حاجات انا همشى عليها بعد كدا
هتنزل السوق تاخد معاه عتاولة فاهمين عشان التخييط على عينه فى سعر وحالة العربية (مقطع مخبوط مربوط مغير سقف مغير شنب مغير بطيخة) فاعمل حساب ومليون حساب للنقطة دى اقسم بالله كان واحد شارى بومة شاب زى الفل وفرحان بيها وطاير من الفرح فى السوق اقسم بالله كانت مغيرة ربع وسقف لما بصيناله عليها بس متقفله صح واقسم بالله الواد عيط فاحذروااااااااااااااااااا ا يا اللى بتشتروا من السوق وانا مش فاهم خدت اللى فاهم
ابعد عن السوق العاشر نصيحة واشترى من حد تعرفه
اعرف العربيه قطع غيارها وسوقها قبل ما تشتريها عشان متغلطش غلطتى وانا الحمد لله جت سليمة معايا وجبت عربونى ممكن غيرى ميعرفش ويلبس اسود
انا قلت احكيلكم القصة من اولها لاخرها واى حد جراله حاجه فى السوق قبل كدا يحكى معانا بردوا ادينا بنسفيد
وربنا يكرم الجميع يا رب
مستنى رأيكم فى الانسر البومة اللى اشتريتها
السلام خير الختام