ارجو الافادة ما هو المقصود ب البيل فى الموتور ؟؟؟؟؟؟؟

**kamel mahmoud kamel** · 25-06-2007 01:24 PM

و هل تغيره خطر على الموتور ام يفضل تغير الموتور كله احسن
ارجو من الخبراء الرد و توضيح الامر

مهندس كامل محمود

**ehabbadr** · 25-06-2007 11:27 PM

اعتقد انه رولمان بلى بس الموتور فيه العديد من الرولمان بلى أى واحد المقصود و ايه المشكله بالظبط؟

**TAREKSHEIR** · 25-06-2007 11:31 PM

أنا مش فاهم .. بس عموماً إسئل التوكيل وقولنا فال إيه

**kamel mahmoud kamel** · 26-06-2007 10:33 AM

انا عندى صوت وره فى الموتور لما بدور العربيه و هى واقفه و طبعا لما بمشى الصوت بيروح و فى التوكيل قالولى احتمال شداد او بيل و بعتوا يجيبوا البيل بقالهم شهرين بس انا قلقان و سألت ميكانيكى قالى غالبا خشونه فى بلى و يتغير بس التوكيل بيقول احنا نبقى عاملين حسابنا على كل حاجه علشان نعمل الموضوع مره واحده و لو كان شداج يبقى موجود و لو كان بيلات يبقوا موجودين برضه
و لما سألت سواق على موضوع البيل ده قالى دول زى عواميد كده جوه الموتور و ديه حاجه مش سهله و بتتعمل ساعة العمره لو كان فيها مشكله و لو حيتغيرو يبقى احسن يجبولك موتور جديد بدل ما يلعبوا و يفتحوا الموتور بس الصوت انا حاسس انه من بره الموتور عند السيور كده و التوكيل بيقولى ده حاجه بسيطه متقلقش
انا مش عارف اعمل ايه هو الموضوع مش مؤثر على العربيه و انا ماشى بيها فى حاجه بس حاسس ان التوكيل مكسل يعالج الموضوع علشان كده قالوا يتحججوا بموضوع البيل اللى مش موجود و لسه حيبعتوا يجبوا لانهم فى الاول الفنى سمع الصوت و هو واقف جنب العربيه و على طول قال ده شداد و قالى تعالى يوم تانى بس لما كلمتهم فى التيلفون قالولى موضوع البيلات ده و انهم مستنين تيجى
حد بقى يقولى اعمل ايه

مهندس كامل محمود
اسبرانزاوى رقم 3

**وائل عطية** · 26-06-2007 10:54 AM

على حد معلوماتي الضيقة في هذا الموضوع
البيل هو النهاية الكبرى لأذرع التوصيل في المحرك
ويحدث أن يتآكل فيؤدي لحدوث صوت في المحرك عندما تكون السيارة متوقفة
وهذا يتطلب عمل عمرة للمحرك لإصلاحه.
عليك التوجه للتوكيل ومطالبتهم بتحديد دقيق لمصدر العطل، ولا تقبل إجراء عمرة (إن كان هذا هو الحل) وإنما تغيير المحرك كاملاً
وربنا يستر إن شاء الله وتكون حاجة بسيطة

**labbody** · 26-06-2007 11:00 AM

هات بطنية وسرير و ذهب للتوكيل ومترجعش بالسرير ألأ لم تحل الموضوع

**usama_esam** · 26-06-2007 10:47 PM

موضوع الصوت دة اما من بلي الفتيس حدث فية خشونة احتمال كبير وبتكون فقط لما تكون السيارة باردة اما بعد ذالك يزول الصوت
عادي مش محتاجة عمرة ولا حاجة بس التوكيل لازم يحلها...........واللة حرام عليهم مفيش ضمير

**ahmed1981** · 26-06-2007 11:08 PM

البيل هو الوصلة بين البستم وعمود الكرنك
بيتثبت في عمود الكرنك على سبايك وبيتثبت في البستم على بنز

ما فيش داخل الموتور رولمان بلي كله جوه على سبايك

**ahmed1981** · 26-06-2007 11:14 PM

لانهم فى الاول الفنى سمع الصوت و هو واقف جنب العربيه و على طول قال ده شداد و قالى تعالى يوم تانى بس لما كلمتهم فى التيلفون قالولى موضوع البيلات ده و انهم مستنين تيجى

لو الصوت كأنه جنزير كاتينه مرخي يبقى شداد
غالبا ده صوت شداد مش بيل لأن البيل ميعملش صوت إلا لو العربية فوتت خلاص لكن الشداد أحيانا يكون فيه عيوب وتغييره سهل

روح قولهم يغيروا الشداد الأول ولو المشكلة متحلتش نبقى نستنى البيل