الموضوع: هو ليه التناكه فى مصر بقت صفه اساسيه فى الشغل

المشاركة الأصلية كتبت بواسطة mohamedrabia

للاسف اعتقادات تم توارثها زي سياسه في الشغل اسمها فرق التجمعات علشان ميحصلش تبادل اراء .هو شرط يكون فيه تجمعات يعني هو احنا ملناش مخ نفكر بيه وكمان متسلمش علي االموظفين الاقل منك واتعامل معاهم انك من الادارة العليا علشان يخافوا منك ويحترموك كل الكلام ده فاضي وملوش اي لزمة المعامله الطيبه افضل طريقه لاكتساب الاخرين وانجاح اي منظومة واي عضو فاسد هيظهر ومش هيلائم المكان من نفسه هيمشي لان المنظومة كلها هتكون بتتعامل باسلوب التفاهم مفيش خوف فيه حقوق فيه مشاركة اتمني ان اجد مكان بهذه المواصفات لان بجد ده فريق العمل الي كل واحد فينا بيتكلم عنه اتمني ان اعمل مع فريق عمل متعاون وده طبعا خيال

كلامك جميل جدا وبيطبق فى اكبر الشركات الناجحه

لكن للاسف انا عن نفسى تجربه شخصيه عملت كده جربت اقرب من الناس فى مكان عملى جدا
وبناكل سوا وبندردش فى كل حاجه ووقت الشغل شغل

للاسف استهانو جدا بالامور والموضوع جه على حساب الشغل كمان ولو فى حاجه بتتكلم فيها ليه متعملتش تلاقى عينه اد كده بكل بجاحه يقولك عادى يعنى مكنتش فاضى لما افضى اعملها حاضر وكان هو المدير وانت عامل او موظف

عايز اقولك لو انت فكرت تعمل كده الى حواليك مش هيسمحولك بكده وهتلاقى نفسك لوحدك وبتادن فى مالطه


لكن لما غيرت معاملتى بالطريقه الى حضرتك ذكرتها انى اتنك واتعامل معاه انى مدير وهو موظف وبس وصوتى يعلى وعينى تحمر كله ماشى زى الفل وبالطريقه الصح الى بيتعمل بيها الشغل

ديه تجربه شخصيه حبيتت اوضح وارد بيها على كلامك الجميل بس اتمنى انه يتطبق

على فكره الموضوع بيبدأ قبل الشغل بكتير: افتكر فى الجامعه مين الدكتور اللى الناس بتعمله الف حساب و عمرها ما بتتأخر عن ميعاد محاضرته؟ فى المدرسة مين المدرس اللى الكل بيخاف منه ؟ بلاش دى طيب فى الشارع مين اللى الناس بتخاف تركن قدامه : اللى كاتب يافطه ان ده جراج خاص رجاء ممنوع الوقوف و لا اللى بيقطع كاوتش اى عربيه تركن قدامه؟ مع الاسف الخطأ فى التربيه من الأول و كل اللى بيحصل ده مترتب عليه و أدى الى ان طيب = ساذج ؛ بلطجى= لابد من احترامه ؛ محترم= قليل الحيله و غلبان و ده اللى وصلنا الى مرحله الانحطاط الاخلاقى اللى وصلنا ليها و انتشار شريعه الغاب