العربية بتسخن جامد وهي باردة !!!!!!

السلام عليكم ورحمة الله وبركاته

العربية عندي بتسخن جامد فى أقل من دقيقة بتوصل للأحمر والمياة فى الريدياتير بتكون باردة (بتتدفى بس بشكل قليل أوي مش حتى بتبقى فاترة )

انا رحت يوم الجمعة اللى فاتت للأسطى محمد عبدة مركز كول آير وعملت شغل فى العربية ، خرجت بيها يوم السبت والعربية سخنت مني آخر اليوم بعد مشوار طويل (بس كان أمبير الحرارة بينط مش بيطلع بثبات)

المهم كنت مزنوق فمكلمتش الميكانيكي ولا حاجه وقلت هتلاقي المياة ناقصة ، يوم الأحد الصبح جيت أزود المياة لقيت المياة فيها زي طينة (بس مكنشي زيت)

غيرت المياة عن طريق البلف اللى فى الريدياتير وقلت أمشي بيها لقيتها سخنت جدا على أول الشارع

ركنتها ومعرفتش ابص عليها تاني غير دلوقتى

فأنا عايز أعرف المشكلة ممكن تكون من أية ؟؟؟؟

1 - أنا شاكك أنه ممكن يكون فى سدد فى دورة التبريد (بس لما فتحت بلف الهوا اللى ورا العمة كان بينزل مياة)

2 - أن طرمبة المياة يكون فيها مشكلة

* لما غيرت الزيت يوم الجمعة مكنشي فية مياة فى الزيت
* المياة بعد ما بطلت باردة بس رجعت لونها طينة تاني (بس مش مزيتة مفيهاش بقعة زيت ؟؟؟ )

أرجوكم محتاج حد يشور عليا علشان مش عارف أجيب ونش يشيل العربية للميكانيكي ولا لو بسيط أخلية يجي يشتغل هنا أفضل

طرمبه الميه مسدوده او ترموستات الكوعه قافشه

طرمبة الميه يا معلم و بص على الكوع

الف شكر يا شباب

أنا النهردة نزلت تاني فكيت الخرطوم اللى جاي من البلوك من فوق رايح على القربة ونفخت فى القربة المياة خرجت عادي

زودت مياة ودورت برضوا سخنت فى أقل من 3 دقائق بس لاحظت التالي

1 - العربية بطلتها قبل التلت تربع وفضلت تعلى برضوا وانا مولع الكونتاكت

2 - المياة والماتور باردين ، مفيش غير شكمان الفرن هو اللى سخن بس

3 - المروحة مشتغلتش ؟!

4 - فكيت الوصلة اللى جاية من الماتور فوق تاني ونفخت فى القربة خرجت المياة دافية نسبيا (أقل من الفاترة) وزودت مياة وبرضوا الحرارة فوق الأحمر بكتير (رغم اني مبطلها قبل الربع بس بتعلى وهي ممورة ) (أنا عارف ان كان لازم أدور وانا بزود مياة بس نسيت مع اللخبطة )

فأنا شاكك فى حساس الحرارة نفسة ، وهل المروحة بتشتغل مع حساس الحرارة اللى بيدي الإشارة لعداد الحرارة ولا ليها حساس لوحدها

الحمد لله يا جماعه طلع عفريت :d (حساس الحرارة بايظ)

العربية نزلت دلوقتى فتحت الكونتاكت من غير ما أدور لقيت مؤشر الحرارة فضل يسخن لحد ما طلع لأحمر (من غير ما أدور)

فهروح للكهربائي بقى بالعربية عادي

بجد الف شكر على المساعدة

طيب الحمد لله و ربنا يبعد عنك العفاريت d:

الف شكر يا شباب ، وفعلا العفريت أنصرف أول ما رحت للكهربائي (أول ما ركنت أمبير الحرارة نزل وبقى تحت النص وعادي جدا ، طبعا نزلت سلمت على الكهربائي وطلعت على طول :d )

هههههههه :d
بجد ضحكت، طول عمرى بقول على الفيات دى عليها عفريت وحركات مجنونه وعشان كده بحبها :)

عندى انا كمان عفريت يارب يتصرف

كده يبقى الفيات فعلا فيها عفارييييييييييييييييييييي يت

لأ يا جدعان انا عفريتي غريب جدا

بعد الحوار ده بيوم لقيت ال rpm على السلانسية 1500 و 2000 وشوية وتلاقية مفيش خالص (لازم تدوس بنزيت علشان تدور) وبتطلع دخان أسود وبتقطع ، ولغيت المشوار وانا رايح للميكانيكي وخلاص مخنوق من كتر التقيع لقيتها أتعدلت تاني ، سيبتها فى الشارع ومشيت واتخنقت

رحت لمركز الصفا يوم الأربع غير صباع الحرارة ونضف العمة وربنا يكرم ، جايز يكون العفريت كان مستخبي فيها

بس بجد ، أول مرة العربية تطلع عيني كده

ربنا معاك يا بشمهندس وان شاء الله تكون آخر الاعطال ...