الموضوع: ذكريات مؤلمه صحصحتها مواقف مخجله (الحب من ابتدائي)

المشاركة الأصلية كتبت بواسطة khaled sabry

طيب بقيتو اصحاب و ماقلكشى ضربك ليه ؟؟؟
اتصل بيه دلوقتى اسأله
و لا خبطه الديسك خليته يفقد الذاكره

ههههههههههههههههههههههههه ههههههههههههههههه
اتصل ياباشا

هحكيلكم على موقف اتعمل فيا وانا فى إعدادى

كنت فى شلة اصحاب كدا بتاع 5 كلنا كنا فى الوقت دا تفكيرنا موجه حوالين الكمبيوتر والجيمز وكدا تقريبا ما كناش بنفكر فى حاجة تانى غير كدا لكن فى واحد فى شلتنا زى ما بيقولوا كدا العاشق الولهان .. كان بيحب واحدة حلوة فى فصلنا بس المشكلة انها كانت مش واخدة بالها منه اصلا وكانت بتحب واحد تانى

المهم فى الوقت دا انا مكانش فى دماغى الحوارات دى اصلا ولا كنت بكلم بنات فصلى بس يصادف انه كان فى بنت معجبة والبنت دى صاحبة البنت التانية اللى صاحبنا معجب بيها

صاحبنا دا جه فى يوم وحب يعمل فيها فلانتينو وقام شارى وردة حمرا ومعاها الكارت بتاعها وقام كاتب على الكارت بالإنجليزى اول حرف من اسمه a بس على اساس هيشوف رد فعلها بقا وهى هتفهم انه مهتم بيها ولا لأ وهوبا راح فى الفسحة حاطتلها الوردة الحمرا فى شنطتها وكل دا حصل ومحدش مننا يعرف نهائى

الفسحة خلصت من هنا والبنت جت فتحت الشنطة وشافت المفاجأة راحت مجمعة كل صاحبتها وقعدوا يتشاوروا فى الموضوع وتوصلوا فى الأخر انهم هيبعتوا واحدة منهم تلف على كل الولاد فى الفصل تسألهم الوردة دى بتاعة مين .. بس طبعا هما عارفين انه اول حرف من اسمه a

قعدت تلف وتسأل لحد ما جت للشلة بتاعتنا واحنا قاعدين منهمكين اوى فى الكلام فى الجيمز وسألت واحد واحد الوردة دى بتاعتك ؟ كله قال لأ بما فيهم صاحب الوردة نفسه معادا انا حظى الحلو من كتر انهماكى فى الكلام رفعتلها إيدى وشاورتلها لأ يعنى انا الوحيد اللى ما نطقتش ومن حظى الحلو برضو انه اول حرف من اسمى a والبنت ساعتها فهمت انه دى علامة انه انا اللى بعت الوردة :(

ومن هنا بدأ الشك يدور حولى وبدأت الاحظ نظرات غريبة ومريبة من كل بنات الفصل وخصوصا البنت اللى كانت معجبة دى حسيت انها هتاكلنى وانا مش فاهم اى حاجة بقا ومش عارف هو فى إيه انا لو قتلتلهم قتيل مش هيبصولى بالمنظر دا :s

لحد ما بعد الموضوع دا بكام يوم لقينا كذا مدرس ومدرسة داخلين بطريقة غير عادية وقعدوا يتكلموا فى مواضيع الحب والإعجاب واللى يعمل حاجة يعترف وبتاع وفى الحصة دى كل البنات كانوا بيبصولى انا بس كأنى متهم لحد ما كنت هتجنن انا عملتلهم إيه وقعدت افكر وعدى شريط ذكرياتى كله مش لاقى حاجة عملتها :(

وفى يوم وانا مروح ماشى مع صاحبنا دا راح حكالى اللى هو عمله وهنا وقعت الصدمة هار اسود انا كانوا بيشكوا فيا عشان كدا يعنى انا بقيت مشبوه فى المدرسة واحتمال كمان يكونوا قالوا للمدرسين انه انا المشكوك فى امره يا وجعة مربرة دا انا كنت الطالب المثالى للفصل انا يحصلى كدا

طبعا مش محتاج اقولكوا انا عملت إيه فى صاحبى دا ساعة ما عرفت :d
بس هو بعد كدا راح اعترف لمدرسة كانت عارفة الموضوع والحمدلله الشكوك بدأت تروح من عليا لكن للأسف لحد انهارده البنت دى معرفتش مين اللى بعتلها الوردة :d