قدر الله و ماشاء فعل عملت حادثة خفيفة و محتاج رأيكم
السلام عليكم
الصبح وأنا بأوصل الأولاد ربنا كرمنى بواحد معاه لانوس قطع عليا الشارع
والحمدلله الأسرة تمام و فداهم أى حاجة
أنا كنت فى الشارع الرئيسى و هو جاى من الشارع الفرعى عاوز يخش فى الشارع اللى قصاده و الشارع اللى قصاده ده مرحل نص متر كده شمال
طبعا الباشا قطع الشارع من غير ما يقف يبص ولا كلاكسات و لا أى حاجة خالص وكان على سرعة عالية نوعا ما
أنا كنت ماشى هادى فدوست أنا على الفرامل و أنا عارف انى خابط خابط لان المسافة وقت ما طلع بسرعته كانت متر ونص تقريبا المهم خبطت فى جنب العربية عنده بالكامل و شوفت البابين عنده و هما بيطبقوا و هو علشان كان بيجرى فجنب العربية عنده اتحك واتبهدل كله
طبعا الباشا لما نزل من العربية عادى جدا و لا كأن فى حاجة حصلت ونزل ابنه وقاله ياحبيبى المدرسة أدامك كده علطول امشى الحتة الصغيرة دى وطبعا فهمت انه كان مستعجل علشان كده كان ماشى بسرعة و مابصش
المهم لما نزلت و شوفت الخبطة عنده قلت أنا أكيد الوش عندى راح بس الحمدلله ربنا ستر
هو الرفرف الشمال عنده اطبق من ناحية الباب و الباب الأمامى و الخلفى اطبقوا كمان
أنا بأة تقريبا الاكصدام امتص الصدمة الحمد لله و طلع من مكانه من ناحية الشمال من ناحية الكلبسات
والفانوس الشمال اتكسر منه جزء
ودى الصور بعد الحادثة
خروج الرفرف من مكانه و الكليبسات سليمة الحمد لله
http://nileup.com/up/uploads/nilemotors_13565085241.jpg
الاكصدام والفانوس من الامام
http://nileup.com/up/uploads/nilemotors_13565085242.jpg
صورة أقرب للفانوس الأمامى وواضح الشرخ فى باغة الفانوس والجزء المكسور فيها معايا
http://nileup.com/up/uploads/nilemotors_13565085243.jpg
طبعا أنا شوفت سعر الفانوس الامامى الكامل بـ 945 من موضوع أحمد تى فى ربنا يباركله
وأنا شايف الموضوع مش مستاهل أغير الفانوس مؤقتا فأسيبها شوية علشان تاخد العين
لكن انا فى اسكندرية و الشتاء جامد فقلقان يحصل حاجة هل لو المية دخلت على اللمبة مثلا و هى سخنة تفرقع فبأفكر ألم الموضوع و أروح لحد بتاع باغات ولا حاجة يلزقلى الجزء المكسور لكن الراجل اللى أعرفه شغله ما عجبنيش هو فى صلاح الدين فلو حد يدلنى على واحد كويس يا ريت
وبالمرة يا شباب خبطتين تانيين على الماشى علشان آخد رأيكم فيهم
الاكصدام الأمامى من تحت ودى مش مؤثرة معايا و بأفكر أطنشها
http://nileup.com/up/uploads/nilemotors_13565085256.jpg
اللى قلقان منه هو حكة عند الباب الخلفى الأيمن لان البويـة اتحكت و للأسف المكان فيه صدأ فتنصحونى اعمل ايه وهل بره التوكيل و لا جوه التوكيل
http://nileup.com/up/uploads/nilemotors_13565085254.jpg
صورة أقرب
http://nileup.com/up/uploads/nilemotors_13565085255.jpg
أنا بأفكر أروح لأى صنايعى يعالجها ومش عاوز أرشها ولا حاجة بس علشان ما تمسكش بارومة فيها
ولو حد يعرف مركز فى اسكندرية متخصص فى موضوع الخدوش و الخرابيش و البوليش يا ريت يقولى
وأشكركم مقدما