ساعدوني أرجوكم

**ahmed_magdy_shaaban** · 22-07-2008 04:14 AM

أنا محتار جدا.مش عارف أبيع عربيتي الأوبل فيكترا 97 وأجيب صني سوبر صالون خليجي ولا لا. أنا عاوز أبيعها عشان بتصرف كتير بنزين و قطع الغيار غالية.لكن في نفس الوقت أنا بسمع ان الصني بتجري زيها و سحبها جامد و أنعم كتير.أنا عاوز حد يقولي إيه نظام الصني سوبر صالون من حيث الأداء و الإمكانيات وهل العربية دي بتجري.عشان أنا بسافر سفاجا كتير وبجري.

**fahd_628** · 22-07-2008 04:45 AM

على فكرة استهلاك الصنى مش اقتصادى

لو عاوز حاجة اقتصادية هات عربية 1300 سى سى

**ahmed_magdy_shaaban** · 22-07-2008 04:46 AM

يا راجل يا طيب.أنزل من 2000 لل 1300 وانا بقوللك بجري

**dr_3eshoo** · 22-07-2008 03:13 PM

شوف انا معايا بسات و بابا معاه الصني
اليومين دول مبدلين مع بعض و اقدر احكم عليها
الصني في الجري ممتازه و الثبات لحد 150 زي الفل الفرامل جميله
و سرعه قصوى توصل ل200
استهلاك البنزين حسب استعمالك
بس و صلت معايا 250 كيلو في الصفيحه بس حسب دوسه رجلك على البنزين يعني تدوس و ترفع سواقه الاتوماتك انت اكيد عارفها
و التكييف 10 على 10
اما قطع الغيار في موضوع على قطع الغيار مثبت فوق من التوكيل اقراه

**dr_3eshoo** · 22-07-2008 03:14 PM

على فكره في موضوع الثبات ماتنساش انك راكب فيكترا حط دي في دماغك قوي قوي قوي

**ahmed_magdy_shaaban** · 22-07-2008 03:39 PM

يا باشا ألف شكر علي ردك ده..طبعا ثبات الفيكترا لا يعلي عليه.أنا سافرت بيها العين السخنة. ماشي 160 180 الثبات كأنك ماشي 100 وأكيد الصني مش كدة
لكن علي الأقل ثباتها أسمع إنها أحسن من فئتها.ولا انت ايه رأيك في الكلام ده.و بعدين هل الصني جريها ممتاز يعني موتورها عفي و شديد و عزمها قوي و سحبها جامد زي الفيكترا كده بحكم ان موتورها 2 كامة..لأني أسمع ان موضوع الكامتين ده جامد أوي.

**dr_3eshoo** · 22-07-2008 03:45 PM

جريها
و الله العظيم جريها زي الفل طياره
ابويا اول ماجبها و كنت ماشي بالبسات 160 و شدينا مع بعض
ابويا طبعا ازاي ابني الي معلمه السواقه يسبقني
مع ان البسات بتاعت السرعات العاليه انما ابويا عدى مني كاني راكب على جنب
ابويا ربنا يديله طوله العمر بيوصل بيها 170 و 180 و العربيه معاك في كل السرعات
مش بتهبط زي الياباني و الكوري بعد ال120
بص جربها الاول من ناس بتوع تاجير سيارات و لو عجبتك توكل على الله فيها بس صدقني مش هاتندم

**ahmed_magdy_shaaban** · 22-07-2008 03:50 PM

ربنا يخليك يا كبير.طيب أنا هتوكل علي الله ان شاء الله بس المشكلة الوحيدة قدامي دلوقتي اني عاوز أبيعها و أخلص علي طول عشان أجيب الصني علي طول ان شاء الله.ربنا يسهل بقي في بيعها ان شاء الله.شكرا يا باشا