الأخ العزيز المهندس هيثم

انا عضو في نايل موتورز من زماااااااااااااان
ربنا رزقني ببيجو 307 هاتشباك وكنت باعمل الصيانات في مركز صيانة في مدينة نصر (عند نادي المقاولين)

بس من خلال الموقع هنا كنت بدور على مكان افضل لعمل الصيانات ويكون اقرب ليا (ساكن في الهرم) بس لقيت ان ناس بتتكلم في ان المركز بتاع الهرم مش كويس

وبعدين حضرتك عملت الموضوع بتاعك وانا كنت بتابعه على فترات وحضرتك بتجاوب كل الناس برحابة صدر وتعاون بالرغم من بواخة بعض الناس أو تكرار نفس الأسئلة وكنت انا من الناس دي

وفي يوم قررت اعمل زيارة ليكم عشان اشيك على كذا حاجة وانا رايح في الطريق دماغي عمالة تقولي روح مدينة نصر طيب روح احمد عمارة طيب نجرب الهرم
وفي الأخر عقدت العزم اني اجيلك واتصلت بيك قولتلي اتفضل

وصلت المركز وسألت عليك وأنا عندي تصور اني هقابل مهندس كبير في السن مش عارف ليه تخيلتك كده (45 سنة) بس اتفاجأت انك ما شاء الله ربنا يديك الصحة مهندس شاب وكانت المقابلة ممتازة

حضرتك سمعت مني الشكاوي اللي عندي واستلمت العربية مني مع ان كان في شغل متير ومكنتش واخد معاد وكان فيه شغل كتير في المركز
وبصراحة المكان منظم كتير عن المركز التاني وأكبر كتير ولاحظت ان حجم الشغل كبير جدا عكس للي كنت بسمعه


تم عمل كل المطلوب واتفاجأت ان اسعار قطع الغيار أرخص من المركز بتاع مدينة نصر وكمان أرخص من ورشة في المعادي باتعامل معاها في الحاجات الطياري

انا لو حضرتك ما افتكرتنيش انا اللي طلبت تغيير الفوانيس الأمامية وتركيب علامة الاسد الامامي بعد ما كنا خلصنا الشغل.

وهذه شهادة حق لرجل يستحقها

أولا أنا بأشكر حضرتك جدا على تعاونك ونصايحك وربنا يجازيك كل خير
ثانيا بأعتذر عن تأخري في كتابة هذه الرسالة لانشغالي الفترة الللي فاتت.