طبعا اللى تابع معايا مشكلة الحرارة اللي مريت بيها في الموضوع ده
فاكر التفاصيل ... ياريت لمن لم يقرأه أن يعود اليه أولا
:satelite:
طبعا في عدد من الأخوة الأفاضل اللى ردوا عليا في الموضوع ده قالولي إن المشكلة دي ردياتير مش أكتر وده اللى خلاني أفكر في الموضوع ده تحت شوية هاتشوفوا
المهم بعد لف ودوران حوالين نفسي وبرغم إن حكمي على الزيت لم يكن خاطئ تماما لأنه فعلا فرق في سحب العربية جدا ... يعني بعد ما كنت بجيب بالعربية بالكتير قوي 110 - 120 بالعافية بعد تغيير الزيت لاقيت العربية عايزة تجري لوحدها وبقيت عايزة تجيب 120 - 140 وكنت أوقفها .. وطبعا صوت الموتور والأحساس براحة العربية إنها مرتاحة مش مخنوقة ... كل ده أنا لسة حاسس بيه لغاية دلوقتي برغم إني عامل أهه بالزيت الشل حوالي 10000 كيلو برضه ... لكن لسة كويس جدا
لكن تبقت مشكلة الحرارة اللى لسة موجودة ... هى قلت فعلا بدرجة ملحوظة لكن لسة موجودة برضه وده مش طبيعي حتى لو كان الجو حر جدا زي ما كان في الوقت ده ... لأن مش ده اللى انا اتعودت عليه من العربية ... وكمان مش الياباني اللى يسخن مش شوية هوا سخنين :crying1:
المهم قلت لأ لازم أروح لميكانيكي بيفهم نشوف الموضوع واحدة واحدة
روحت فعلا وقالي لازم نفك الردياتير ونسلكه الأول قبل ما نتكلم في حاجة كبيرة :L_bhuhhh[1]: .. وقد كان ..
أول ما بتاع الدرياتيرات فكه ...
قالي : الردياتير ده مش بتاع العربية يابيه صح
قلته : صح إنت عرفت منين :019F3B~14:
قالي : ده شغلي أنا يابيه وانت ما لكش فيه
قلتله : قولي بس إنت عرفت منين يمكن كلامك يكون فيه الحل
قالي : (بضيق صدر وبالعافية) إن الردياتير الأصلي بيكون الماسورة بتاعته ريشة رفيعة عشان كدة بتتسد كل فترة من المياه العادية وبنحتاج نسلكها ... لكن ده الماسورة بتاعته مدورة كبيرة ومساحة مقطعها كبيرة واستحالة تتسد بأي شكل من الشكال
طب أنا أصلا مش بستعمل مياه عادية نهائي والعربية ما تحطش فيها سوى مياه الفابريكا الخضراء بتاعتها وغيرتها بمياه موبيل من فترة قصيرة ... يبقى المدورة الواسعة دي هاتتسد ليه بقى أصلا :11:
أنا سمعت كدة وتنحت :toothgrin: ... ولاقيت فعلا الحل في كلامه ...
قلتله : بس كدة وشكرا قفل اللى انت فاتحه ده وما تسلكش حاجة ...
قالي : ليه بس يابيه ... ده جزاتي يعني إني بشرحلك
قلتله : لأ ياسيدي مش كدة بس انت بتقول إن الماسورة دي مش بتتسد .. صح ؟
قالي : صح
قلتله : خلاص هاتسلكها ليه بقى
قالي : بس يمكن ...............
قلتله : ولا يمكن ولا ما يمكنش قفل الدنيا دي وهاتاخد حق الفك والتركيب ياسيدي
هو سمع دي وراح مقفل كل حاجة وخد خمسين جنيه برضه ... بس مش خسارة فيه لأنه تعب برضه في الفك والتركيب وكفاية المعلومة اللي خدتها منه ... دي لوحدها تسوى كتير
:offtopic2:
الفرق بين الأثنين بقى
الردياتير الأصلي التبريد بتاعه بيكون عبارة مواسير مستطيلة رفيعة جدا طولية بعرض الردياتير وبتخلي كل حجم المياه الموجودة فيها يتعرض للهواء فبيتم تبريده بالكامل في لحظات معدودة لأن كمية المياه الموجودة في الماسورة الواحدة قليلة جدا ... عشان كدة بتكون كفاءة التبريد فيها عالية
لكن الردياتير التقليد للاسف التبريد بتاعه عبارة عن مواسير مدورة مساحة مقطعها كبيرة وكل ماسورة بتشيل كمية مياه كبيرة وبيصعب على الهواء الداخل للردياتير إنه يوصلها بالكامل .. وده بيتسبب في إن جزء كبير من المياه ممكن يرجع تاني للموتور وهو سخن دون أن يتم تبريده بالكامل
دي بعض الصور للردياتيرات الأصلي وباين فيها إن الخطوط الفضي الطولية دي هية المواسير بتاعة المياه
سبيوكوا من الحاجات المدورة اللى تحت دي لكن مواسير التبريد هية الخطوط الفضي اللى بالطول واللى ما بينها دي صفائح التبريد المشعة للحرارة
ودي صورة كمان لردياتير أصلي بس ده بتاع بيجو 505 تقريبا ونحاس مش فيبر وبرضه المواسير اللى شايلة المياه هية الرفيعة اللى واخدة من فوق لتحت بالطول دي
وده واحد فايبر
أما دي بقى صورة للردياتير الصيني معلش هي مش واضحة قوي بس لو دققتوا النظر هاتشوفو جوة شرائح الألمونيوم المشعة للحرارة في مواسير مدورة فضي .. هي دي اللى بتكون شايلة المياه
ودي صورة كمان المواسير المدورة باينة فيها أكتر من جوة
:offtopic2:
قصة الردياتير دي بقى إيه ...،
في مرة من المرات وانا ماشي في إحدى شوارعنا الجميلة ورا إحدى السيارات ... فجأة لاقيت العربية اللى اللى قدامي راحت محودة جامد بتتفادى حاجة قدامها أنا مش شايفها حتى من خلال الزجاج بتاعه ... لاقيت إيه بقى في وشي ... بلاعة جميلة خالص وسو كيوت ارتفاعها حوالي نص متر بس .. وطبعا لبست فيها من غير كلام كتير
والنتيجة إكسدام وردياتير وشوية حاجات كدة فوق بعض
وطبعا لما جبت الردياتير من عند سوزوكي سنتر في التوفيقية .. الناس هناك مشكورة حلفتلي بكل الأيمانات إنه الأصلي بتاعها اللى بيجي من الهند ... وللأسف أنا ما عنديش علم فيه عشان أقدر أفرق الأصلي عن التقليد الصيني فخدته وأنا فرحان ومشيت وركبته
:backtotopic:
نرجع لموضوعنا ... إوعى حد يتوه مني :hello: ... رجعت البيت وطلعت الردياتير الأصلي بتاعي ونزلت روحت لواحد في الحرفيين بتاع ردياتيرات وغيرت عنده العلبة اللى كانت مكسورة وركبت علبة جديدة ورجعت البيت تاني ... غيرت الردياتير التقليد وركبت الردياتير الأصلي بتاعها
... وقد كان بفضل الله ... ذهبت مشكلة الحرارة الى الأبد بإذن الله .. وكانت التجربة طبعا في طريق الصعيد الجديد وأنا متجه لأسيوط (طريق فاضي تماما بكون ماشي فيه لوحدي تقريبا وبقابل عربية كل نص ساعة حاجة زي كدة - بس دلوقتي إبتدى يعمر كتير وطريق رهيب بصراحة وجميل جدا في تخطيطه وحد السرعة عليه 120) .. وبفضل الله كنت ماشي 120 - 140 - 160 لتجربة السيارة وبحمد الله وما شاء الله ... لم يهتز مؤشر درجة الحرارة من مكانه لشعرة صغيرة حتى
ونراكم على خير بإذن الله :_Alshmokh22[1]: