انا سمعت عن النوعيين دول فى احد المنتديات ومش عارف ايه الفرق وامتى نستعمله
زيت العمرة ماهو؟
كيفية استخدامة؟
ميقات استخدامة؟
انواعة التجارية؟
زيت الشنبر ماهو؟
كيفيه استخدامة؟
ميقات استخدامة؟
انواعة التجارية؟
هل فعلا بيعالج مشكلة الموتور الخفيف والدخان الابيض؟
ما هى عيوبة؟
من هو دش الزيت؟
وهل وجود دش زيت فى الموتور يعارض استخدام الزيوت السابقة؟
برجاء الافادة
خلاص مش عاوز اعرف محدش مهتم
ترغب الادارة فى توجيه انتباه الأخ العضو الى انه ليس كل من يقرأ الموضوع لديه اجابه لسؤالك ،ففى النهاية من يجيبك هو عضو آخر لديه المعلومة ، لذا نرجوا التحلى بالصبر حتى تتلقى اجابة ممن لديه المعلومة
وفي حاله عدم الاجابه يتم الغاء عضويه القاريء في المنتدي خلال 24 ساعه من تاريخه
والله الموفق .
زيت العمرة:
ما هو:هو حبيبات معدنية معلقة فى قاعدة زيتية
كيفيه استخدامه :تضاف لزيت المحرك بمعدل علبة واحدة 100 مللى كل 150 كيلومتر لثلاثة مرات فقط بدون تغيير زيت المحرك ولا يكرر ولا يتم تغيير الزيت قبل 3000 آلاف كيلومتر
ميقات استخدامه: احتياج المحرك للعمرة
انواعه التجارية:ريسورس
هل فعلا له فائدة: الدعاية تقول انه علاج شامل للمحرك وبديل للعمرة لكن التجربة الفعلية اثبتت ان اثره محدود جدا ولا يغنى عن العمرة الفعلية، حاجة كدة عاملة زى العلاج الطبيعى لمريض فقرات الظهر، قد يحسن الأمور قليلا لكن لا غنى عن الجراحة
عيوبه: فلوس فى الأرض
زيت الشنبر:
ما هو: زيت عالى اللزوجة يشبه عسل النحل
كيفية استخدامه:يضاف لزيت المحرك كل مرة يتم فيها تغيير زيت المحرك بمعدل عبوة 300 مللى لغيارالزيت الكامل
ميقات استخدامه: احتياج المحرك للعمرة
انواعه التجارية: يوجد بالسوق انواع لا حصر لها مصرية ومستوردة
هل فعلا له فائدة: اه ، يعمل كمسكن للمحرك يمنع اعراض التفويت من خروج دخان ابيض وتسقيف لحين اجراء عمرة
عيوبه: لو استعمل مع محرك سليم فيسيبب به مشاكل كثيرة لارتفاع اللزوجة،العيب الآخر انه بيخل المحرك صعب التدوير صباحا فى ايام الشتاء، يعنى لازم يكون معاه بطارية ومارش لا غبار عليهم
ما هو دش الزيت: هو زيت خفيف جدا يستخدم لغسيل دورة الزيت بالمحرك، وذلك باضافته للزيت القديم (القديييييييييييييييييييي يم) قبل تغيير الزيت مباشرة، وتدوير المحرك على السلانسيه (اؤكد سلانسييييييييييييييييييه فقط-ممنوع نهائيا قيادة السيارة وبها دش الزيت) لمدة خمس دقائق، ثم تفريغ المحرك من الزيت القدم ودش الزيت، وتغيير الفلتر ووضع الزيت الجديد ، ملحوظة ممنوع نهائيا استخدام دش الزيت مع محكات قديمة، المحركات القديمة تكون احيانا متماسكة بفضل رواسب الكربون والصمغيات المترسبة فيها، وهذة الصمغيات يقوم دش الزيت باذابتها
وهل وجود دش زيت فى الموتور يعارض استخدام الزيوت السابقة؟ فرضية الجملة اساسا غير متحققة لأن وجود دش الزيت فى المحرك اثناء التشغيل يعرضه للتدمير حتى لو كان محرك جديد، دش الزيت-فى حال استعماله- يبقى فى المحرك مده خمسة دقائق سلانسيه فقط قبل التغيير، كما ان دش الزيت اصلا غير مسموح به للمحركات القديمة والمفوتة، وبالتالى فهو غير موجود فى المحرك فيما لا يمنع استخدام اى زيت آخر
ارجو ان اكون قد افدت
الف شكر يا باشمهندس سبعاوى يا جميل وفعلا معلومات مفيدة مع تعليقى
دش الزيت دا اقصد به الاتى
يوجد ماسورة بها دش صغيير زى الدش العادى وبيكون متثبت جوة الموتور وبيسموه دش الزيت
المشكله انى غييرت سير الكاتينة الجنزير وطبعا احتجت احط زيت فقلت اجيب زيت الالف بس عشان ارمية بعد كدا فاشتريت الجركن بتاع كالتكس ب 35 جنية وحطيطة
المشكلة االى حصلت انى كنت بحط زيت 5000 كيلو من بنزينة الامارات والعربية كانت تمام
فبعد ما استخدمت الزيت دا لقيت لمبة الزيت نورت على السلانسية فزودت منه تانى ومفيش فايدة
فروحت ونمت والصبح بشغل العربية لقيت اللمبة رجعت وبقت عادى فقلت اكيد المشكلة اتحلت
وبعد ما الالف كيلو خلصت (فى اسبوع- بمشى كل يوم كتيير) رحت اغيير زيت لقيت الراجل بيقولى العربية مفيهاش زيت غير لتر واحد فانصدمت ازاى اللمبة منورتش على العلم انها مع الدوارة بتنور فى التشيك بتاع اللمبات
المهم غيرت الزيت اللى متعود عليه 5000 كيلو من الامارات مصر ومشيت لقيت بقى فيه دخان ابيض بدا يطلع عديت على الميكانيكى قالى طقم شنبر المهم مش هعرف اعمله الان ومشيت وبعد كام يوم بدا الدخان يقل شيئا فشيا لحد مابقى بيطلع بس لو قرصت او خليت ال ار بى ام يكوصل لل 3000
المهم قعدت محتار ايه اللى حصل دا وليه اللمبة منورتش لما الزيت خلص فى المرة الاولى ومخدتش بالى فقلت اكيد الزيت القكالتكس دا هوا اللى عمل المشكل دى قعدت ابحث فسمعت ان فيه دش زيت فى الموتور ودا ممكن يكون انسد لما استخدمت زيت اثقل
فقلت اسال ذوى الخبرة اعمل ايه
ااحط زيت عمرة ولا زيت شمبر ولا الموتور جاب شمبر كدا ولا دا اثر الزيت التقيل
فمن الواضح ان كدا لازم استخدم زيت شمبر لغاية ماربنا يفرجها بس هل الزيت دا هيعمل مشكلة عشان هيكون تقيل مع دش الزيت وهل اللمبة بتاعة الزيت مبقتش بتحس بمستوى الزيت
وعلى العموم شكرا يا باشمهندس سبعاوى على ردك عليا
انت قصدك على مصفاة طلمبة الزيت "دش الزيت"
هو ممكن يكون فية تسريب زيت حصل وانت بتغير سير الكاتينة او انت بتغير الزيت في كالتكس الفنر ماقفلش الطبة كويس فرشحت زيت و الزيت نقص عندك في العربية قوي و بالتالي اللمبة نورت و انت زودت تاني و الزيت نقص تاني ودة سبب ان شنابر الموتور اتهلكت نتيجة هذا النقص + الزيت التقيل اللي استعملتة
جرب زيت ريسورس العلبة ب 85 جنية, ناس كتير جربوة و شكروا فية قوي, و منهم فنيين و مهندسين في مراكز خدمة
الموضوع علمي بحت و مش فتاوي, الزيت دة فية جزيئات معدنية بتملأ الفراغات و الخدوش داخل الموتور (في حدود معينة) و بالتالي تحكم الموتور الخفيف "شوية"
بس لازم تحطة و العربية سخنة و يكون الزيت و الفلتر جداد لسة, يتمشي عليهم 3000 كيلو بدون تغيير زي مالأستاذ سبعاوي قالك
يعني دور العربية ربع ساعه
بطل العربية
ضيف ريسورس
دورها تاني ربع ساعه واقفة
امشي بيها 150 -200 كيلو
و بعدين حط العلبة التانية بنفس الخطوات
و التالتة كذلك
سؤال بقى للأستاذ سبعاوي
أية رأيك ياباشا في استخدام الريسورس للوقاية مش للعلاج
يعني عربية ماشية مثلا 150 الف كيلو و موتورها كويس ماتفتحش و مش خفيف
هل استخدام ريسورس علبة واحدة كل 10 الاف كيلو وقاية للموتور و حماية لية و تحسين للزوجة الزيت و تقليل للتآكل فية و للا مخاطرة غير محسوبة و مالهاش لازمة
انا استعملت الريسورس مع موتور محتاج لعمرة والنتيجة كانت محدودة، صحيح ان تآكل الزيت تحسن (شوية) ، والدخنة تحسنت(شوية) ، لكن فى النهاية لم يصل الموتور لحالة عدم الاجتياج للعمرة، ولم استطع الاستغناء عن اضافة زيت الشمبر مع كل مرة غيار زيت للمحركاقتباس:
المشاركة الأصلية كتبت بواسطة Adham
لذلك ان شايف ان استعماله للوقاية يمكن ان يكون مفيد بشكل محدود لكن مش هايضر، خاصة وان الشركة المصنعة تقترح استعماله فى الصيانة، لكن انا اقترح ان ده يكون بمعدل علبة واحدة فقط وليس 3 علب مثل جرعة المحرك المفوت، ويمكن تكرارها كل 20 ألف كيلومتر
ايوة هما قاللوا انة فعلا علبة واحدة كل 10,000 كيلو و بس للصيانة و الوقاية
بس بيني و بينك انا متخوف شوية, و متحمس شوية هههههههههههههه يعني متردد استخدمة
بس هيه الفكرة انة بيعمل طبقة تقلل الاحتكاك و بالتالي تقلل التآكل لأجزاء المحرك
و في نفس الوقت ممكن يحسن كفائة المحرك
يعني لو افترضنا ان المحرك 80% ممكن يبقى 85% مثلا
امبارح حطيت زيت الشنبر على الزيت اللى كان نقص
اشتريت علبة من بنزينة موبل على طريق مصر اسكندرية الزراعى وكنت مسافر بنها
المهم قلت اشترى كدا واجرب الموضوع دا
الزيت عندى يعمل 5000 وكان عامل 1000 فقط يعنى ناقصلة 4000
المهم حطيت العلبة كلها عشان الزيت كان ناقص وسعتها 440 ملل
وفعلا زى المهندس سبعاوى ما وصف لونة مثل العسل تماما ولزج اشبة بكتيير للون ولزوجة الصمغ
المهم العلبة دى صناعة امريكى وعاملة زى الكانز و ب 15 جنية وكلها امريكى لايوجد علييا كلمة واحدة عربى
المهم مشيت ولاحظت ان صوت الموتور اتغيير بقى خشن شوية
بس الدخان زى ما هوا لما بجيب ال 3000 ار بى ام يبدا بالظهور
وانا راجع عديت على واحد صحبى فى طوخ ورحت اسال ميكانيكى هناك ايه الحلول البديلة
المهم الراجل جاب حل تانى خالص غير الفك والتصليح قالى سقط موتور استيراد يعملة حوالى من 2500 الى 3000 بالفتيس بالدينامو بالاسبراتير وطلمبة البنزين والمياة والزيت والكاربرتيير وممكن نجيبة انجكشن
المهم قلت افكر واحسبها طقم الشمبر هيعمل فى حدود 1000 جنية بكل حاجة
فاكيد حل موتور واقلب القديم قطع غيار هيكون اسهل ومش فارق كتيير فى السعر خصوصا لو اشتريتة من غير الفتيس هينزل 500 جنية
بصراحة محتار ومش عارف اعمل طقم شمبر فى حدود ال 1000 جنية وياخد 3 ايام شغل
ولا اسقط موتور بنفس السعة فى يوم واحد بس واستفيد بقطع غيار القديم لفترة طويلة لقدام
نصيحة اخوية ايه رايك؟؟
هى العربية نوعها ايه؟
وخد بالك من نقطة تانية، انت هتسقط الموتور فى يوم وتجرى ورا ورقه فى المرور سنة،لأنك لازم تثبت الموتور الجديد على الرخصة، ودى قصة مهببة، افراج جمركى وتصريح مؤقت وانتظار وصول صورة الافراج وهيصة
العربية فليشيا (طبعا انا عارف انك بتكرها وبتكره اللى بيركبوها) على العموم انا مقتنع بيها ومعايا من سنتين وبصراحة حمالة اسية اوى معايا وطلعت اصيلة فى مواقف كتيير
على العلم انى بمشى بيها يوميا ما لايقل عن 100 كيلو لمدة سنتين
انا اتعافيت على الموتور حبتين وكنت بقرص اوى عليه ومبرتحش الا لما امشى على ال 140
وكان اخر موقف عمل الشمبر دا لما افتتحوا الوصلة الجديدة ورا المطار على الطريق الدائرى وكان الطريق مغرى وفاضى فكنت كل يوم اعدى عليه واعمل فيها شومخر واقرص واشد جامد وتزامن دا مع موضوع الزيت الكالتكس اللى حطيتة ونقص ومخدتش بالى بالاضافة ان لمبة الزيت خدعتى فطلعت دخان ابيض
انا بحكيلك الظروف اللى حصلت المشكلة انى لا استطيع التحرك بدون السيارة 3 ايام (هاترفد من الشغل) ولا استطيع الوصول للعمل بالمواصلات فقلت لو دفعت شوية واخلص فى يوم واستفيد بالقديم كقطع غيار لان تمن القطع مفكفوكة اغلى من تمن الموتور بكتيير.....
موضوع الرخصة دا انا سمعت انك بتشترى الموتور بأوراقة وبتروح فحص فى المرور (مرة واحدة)وتثبتة على الرخصة وتمشى الورق بياخد دورتة ومالكش دعوة بيه
واحد الاصدقاء لما سالته على الموضوع دا ابلغنى انه يعرف واحد بيركب بيجو 405 بس واى مشكل تحصل بيغيير موتور على طول لدرجة انه عندة 4 مواتيير ولما بيبيع بيركب اللى على الرخصة (تقريبا مبيروحش يثبته) هل دا فيه مشكلة انك تمشى بورق الموتور ولو حد سال عنه تقول انا لسا مركبة وهثبتة فى الرخصة
وهوا اصلا انا عمرى ماشفت لجنة بتبص على رقم الموتور (دا طبعا لو مش هتبيع)
معلش صدعتك بس فعلا انا باستفيد من اى كلمة اى اخ فى المنتدى بيقولها