الموضوع: انا خلاص داخل الجيش

اولا ظروف الجيش تختلف باختلاف الوحدات واختلاف القاده والاماكن والاسلحة بس بصفة عامة حياه صعبه وقاسية

بالنسبة للتعامل فى مركز التدريب احلى ايام جيشك مهما عملو معاك هيعتبر بيطبطبو عليك لسة وهيكون غالبية زمايلك مؤهلات عليا

بعد ماتنتقل للقوة الاساسية بتاعتك سواء منطقة مركزية او شمالية او جيش تانى او تالت او منطقة جنوبية هتبدا تتعامل على انك عسكرى زيك زي غيرك ولازم تعرف تتعامل مع الصولات لانهم كلهم دبلومات وبيتعاملو مع عساكر على طول فمع الوقت هتعرف تتعامل معاهم

المشاركة الأصلية كتبت بواسطة moudy88

بس بالنسبه للفلوس ..تفتكر 500 جنيه تكفي في مركز التدريب ...خصوصا اني انا انفي حبتين في الاكل ...وممكن اقضيها تونه من الكانتين يوميا لو متوفر

إوععععععععععععععععععععععى ... خد معاك 100 ولا 200 جنيه بس ... وأول أسبوع متكلش من الكنتين خالص ... هتتعب جدااااااااااااااااااااااا ااااً ومش هتعرف تتأقلم خالص
كل من أكل الجيش أياً كان لمده أسبوع لحد معدتك متاخد عليه وبعدين غير براحتك .
أنا فاكر أول مدخلت الجيش كان معايا أكلى .. وفى أول يوم وأنا قاعد فى الميس بتاع الجنود فاكرها أول وجبة كانت خضار مشكل ورز وسلطة بس ... كان معايا واحد صاحبى زى الشحط .. وأول متحط أدامه سرفيس الأكل قام معيط .. بقوله فى أيه يابنى .. قاللى مفيش .. صعبت عليه نفسى بس
قمت أنا مطلع المعلقة ومديها .. مسحت السرفيس
وقعدت أسبوع بالمنظر ده لحد مامعدتى أخدت على الأكل وبعدين بقيت آكل من الكنتين
أقولك بقى فكرة أنا عملتها فى الجيش علشان ماتفتكرش إنك هتروح الكنتين فى أى وقت هتلاقيه فاضى .. دانت هتلاقى عليه ضرب
أنا كان بيبقى معايا 70 جنيه مثلاً ... الكلام ده كان سنة 2003 .. كنت بروح على الكنتين .. كنت بشترى بالسبعين جنيه كلها حاجات .. شيبسى وسجاير ووبسكويت وكانز.. إلخ
فكان العساكر بتوع الكانتين بيدخلونى من الباب ومبقفش فى الشباك طبعاً علشان بشترى جملة .. وكنت باخد الحاجة وببيعها فى العنبر بنفس السعر مكنتش بزود عليها حاجة وساعات كان بيبقى فى عجز فى الفلوس 5 أو سته جنية لدرجة إن الناس اللى معايا فى العنبر كانوا بيستغربوا أوى وكانوا بيتحايلوا عليه علشان أزود شلن أو بريزة وأنا مبرضاش بس أنا كنت بستفيد أيه بقى .. اقولك
بقيت أنا كبير العنبر وأى مشكلة كانوا بيجولى علشان أحلهلهم
لما كنت بعمل حاجة غلط كان كله بيدارى عليه
كانوا كلهم بيتمنوا يصاحبونى ومكنش حد يقدر يمصلح عليه
صاحبت العيال بتوع الكنتين ولما كنت بعوز أى حاجة مكنتش بقف فى طوابير
وبصراحة كمان كنت مهرب معايا موبايل جوه .. وفى المعسكر كله مكنش فيه فيشة يتشحن فيها الموبايل غير فيشة الميكروفون فى منصة أرض الطابور والفيشة بتاعة تلاجة الحاجة الساقعة فى الكانتين .. والعيال بتوع الكانتين كانوا بيخلعوا فيشة التلاجة ويسيبونى أشحن براحتى
جرب الموضوع ده هيظبطك جوه
أهم حاجة جوه الجيش خللى كلامك قليل ومتصاحبش حد أوى أول أسبوع لحد متشوف كل واحد نظامه أيه .. علشان كده متاخدش معاك فلوس كتير .. هتلاقى ناس كتير أوى عايزه تمصلح عليك مش علشان ممعاهمش فلوس .. لأ .. همه بيفتكروها شطارة
وخليك ملتزم برده أول أيامك ومتمشيش ورا اللى بيقولك تعالى نهرب من الطابور ولا تعالى نتريق على فلان ولا تعالى نعمل مقلب فى فلان .. برده أول أسبوع .. إعرف حدودك أيه

ربنا معاك .. انا خارج في 1 -3 ان شاء الله .. انتوا الدفعة الي هتخش مكانا ..

Nistelrooy انا سلمت 1/3 /2012 كنت انت بتدخل
دلوقتى انت بتسلم moudy88
اجيال بتسلم اجيال

ربنا يعدى ايامكو على خير