الموضوع: العربية بتبرد فى الطرق السريعة

المشاركة الأصلية كتبت بواسطة hugan

طيب خلينا امبارح اقرب دليل
راجع من الرحاب علي طريق السويس بعد المغرب
طبعا درجه حراره الجو اقل من 10 مع الهواء البارد في اتجاه العربيه مش عكسها
الجو ثلج
المؤشر لم يتعدي الربع الاول
اول ماوصلت الماظه الطريق وقف المؤشر وصل المنتصف الطبيعي ولا يعلي ولا ينزل
وجههه نظري الموضوع طبيعي مالوش علاقه بالثرموستات
وبلاش نخلي حد يلعب في العربيه وهي سليمه

حضرتك ده مش لعب فى العربية.........أى عربية زيرو لو سوقتها فى درجة حرارة تحت الصفر هتلاقي أن بعد فترة الحرارة لازم توصل لمنتصف العداد.

و طبيعي لما يكون المؤشر أقل من النص لأن العربية باردة أنك لما تدخل حتة زحمة المؤشر يرفع تاني.

و دى مشاركات من زميل لينا على المنتدى شغله فى العربيات و مش فى ورشة ولا توكيل ولا كلام من ده خالص......الراجل مهندس إلكترونيات أد الدنيا :)

المشاركة الأصلية كتبت بواسطة farahat

المشكلة دي أغلب الوقت بتكون نتيجة ثرموستات الميكانيكي ، إلي هو زمان كانوا بيسموه " ثرموستات الكوعه " ، في العربيات الأوروبي بتاعة زمان ذي الفيات و البيجو وغيرها كانوا المكانيكية بيفضوه ويقولك عشان العربية متسخنش ، وهو د إلي كان بيحصل ذي عندك بالضبط يا أحمد بيه ، لأن الثرمستات دة وظيفته إنه يكون قافل والموتور بارد عشان دورة المياه تكون بطيئة ويدي فرصة للموتور يسخن ، ولم تسخن بيفتح مع الضغط بتاع المياه السخنة ، وساعتها بيسمح بإن مياه التبريد تمشي أسرع مع تدوير الطرمبة عشان يبرد أسرع ولما تبرد يقفل تاني فيديها فرصة تسخن تاني ، وهكذا .


لما العربية تجري بسرعة في مواجهة الهوا بتبرد المياه بسرعة عشان الرادياتير بيقابل هوا جامد يبرده أسرع ، لو مفيش ثرموستات أو بايظ يبقى العربية هتبرد مع الجري لأنه مش هيقفل عشان يسخنها تاني .


طيب إيه المشكلة يعني ، ماهو معروف إن الحرارة وحشة للموتور وكل ما كان أبرد كل ما كان أحسن !!!!
الحقيقة مش كدة ، زمان كان الكلام دة مقبول لما كان الموتور ال-2000cc بيطلع 60-70 حصان و احنا قابلين ، لو قالوا شوية أو زادوا شوية مش هنحس ، لكن دلوقتي مع موتور بيطلع من ال-1600cc عدد أحصنة يفوق 115 حصان الكلام دة ماينفعش ، عشان الكنترول بيحسب توقيت الإشعال وكمية الحقن وكل الحاجات دي بناءً على حاجات كتير منها حرارة الموتور ، عشان تكون كل القيم دقيقة ويطلع أقصى قدرة وأقصى عزم ، وبالتالي لو الحرارة اتغيرت أداء العربية بيتغير .
الخلاصة إنه مش خطر لكن يستحسن يكون مضبوط عشان العربية تشتغل مضبوط .

المشاركة الأصلية كتبت بواسطة farahat

كلام سليم جداً وجميل جداً ، بالظبط دة نفس إلي كانوا المكانيكية بيعملوه زمان في العربيات البيجو والفيات ، عشان عربيات أوروبي برضه .
السؤال بقى .. هل حضرتك جربت تجري بيها على طريق سريع في موجهة الهوا ، هل حضرتك جربت عاداه وإستهلاك البنزين وقتها ؟ ، أو هل حضرتك جربت الأداء والبنزين في الشتاء ؟ أعتقد لما تجرب هتعرف الفرق .
أنا كان معايا عربية اوبل كنت شاريها مستعملة وكنت لما بجري بيها بسرعة على الصحراوي بتبرد !!، وبتوصل إن المؤشر ينزل تحت علامة ال "c" ، لدرجة إن لمبة check engine كانت بتنور !!، والسبب إيه ؟
السبب إن العربيات إلي فيها إنجكشن وفيها كونترول متقدم كدة بتكون كمية البنزين والهوا المصحوبة في الموتور متناسبة مع درجة حرارته ، وكل ما يسخن بيقلل البنزين والهوا والعكس عشان ميحصلش تسقيف ويفضل يطلع أعلى أداء ديماً ، لما حضرتك بتقليل درجة الحرارة بيسحب بنزين زيادة ويدي أداء أقل ، وصاحب السيارة هو إلي خسران .

طب ازاي بيحافظ على حرارة التشغيل دي ثابتة ؟ عن طريق الترموستات دة .