مقدم على شراء byd و حشغلها في شركه وان شاء الله انا اللي حشتغل عليها ... والترتيب اللي انا عايز اعمله اني بعد سنه ابيع العربيه واخد اللي ربنا كرم بيه واجيب موديل 2014 او حاجه اعلى وطبعا مش حتنزل من تمنها كتير بتقديري حوالي 10000 جنيه .. دا لو ربنا ستر وسلم وفضلت كل الامور على حالها ومتوسط مشيها طبيعي .. (ولا ايه رأيكم )

طيب في حالة ما اذا ركبت غاز .. ايه تاثير الموضوع ده ؟
حدفع 6500 كاش او 550 على 12 شهر .. يعني بعد سنه حتكون تكلفة السياره زادت عليا قمية اسطوانة الغاز ... الاسئله .
ايه تأثير تركيب اسطوانة الغاز على جسم السياره .. انا سمعت انهم بيخرمو في البودي نفسه :( .. ففهمت ان البودي بيتأثر .. هل التأثير ده بيكون واضح لو انا فكرت اشيل الاسطوانه واركبها في العربيه الجديده .. وهل التخاريم بسبب المسامير اللي حتتركب في بطن العربيه حتنزل من تمنها وتقريبا قد ايه ... ؟ (( يا ريت لو في صور لعمليه التركيب تدلوني عليها ))

هل لو بعت العربيه باسطوانة الغاز حقدر اضيف سعر الاسطوانه على ثمن العربيه ولا العكس دي بتنزل التمن ؟
ايه هيه المحافظات اللي حلاقي فيها الغاز ؟

ايه نظام الغاز القسط 550 دول .. هل هو عادي .. بمعنى انه اكني شاري سلعه من محل وكل شهر اروح ادفع القسط يعني مش ملزم امون من المحطه دي تحديدا ولا التزم معاها بحاجه .. او ممكن ادفع القسط ده في اي محطه تابعه لنفس الشركه .. وهل في اييييي ميزه للشراء كاش .؟

وهل حيفرق معايا السعر لو ركبت جهاز غاز مستعمل وحيكون سعره كام تقريبا .. لاني عرفت اني ممكن اشتري الاسطوانه مستعمل وباقي الوصلات من الشركه بعد الكشف على الاسطوانه وانها بكده حتوفر علي حوالي 2500 جنيه ؟؟!!

واخر سؤال ان شاء الله .. سمعت كتير اشتكو من موضوع شنطة العربيه مش بتقفل كويس . وان الميه بتتسرب فيها وقت غسلها ؟؟!!! .. وموضوع السوست الي بتنخفض لما الوزن بيزيد عليها خصوصا مع وجود اسطوانة الغاز 70 والناس اللي حتركب فيها واجهزتهم في الشنطه .. هل فعلا تستحق التغيير بسوست هوندا 95 زي ما قريت ؟

منتظر نصائحكم