بعد الإستلام إن شاء الرحمن:
١- فول بنزين ٩٢ من أقرب بنزية نظيفة على طول، العربية بيبقى فيها بنزين يادوب.
٢ - ظبط ضغط الإطارات (العربية مكتوب عليها ٢٩ أمامي و ٣٢ خلفي والتوكيل بيقول العكس أفضل لأجواء وطرق مصر وأنا عامل الأربعة ٣٠، إختار إللي يريحك). ويفضل تملاهم نيتروجين عند بريدجيستون.
٢- جيب طقم دواسات للأرضية، حسب ذوقك ومزانيتك، بس يفضل النوعية مرتفعة الحواف قليلا (بيسموها حوض) بس متكنش عالية قوي ودي من أول ٥٠ جنيه للطقم لحد ١٥٠.
٣- لو هتركن في الشارع، هات غطاء قماش أو ووتر بروف براحتك، بس لو سرقة الغطاء وارده في المكان إللي بتركن فيه متجيبش حاجة أغلى من ٧٠ أو ٨٠ جنيه بالكتير.
٤- حاول تجيب إيريال بدل الأصلي، وفك الأصلي وركب التاني مكانه عشان الأصلي ميتسرقش وكمان طويل قوييييي. بيتباع عند بتوع الكماليات بحوال ١٥ جنيه وبيأدي نفس الغرض.
٥- لوحابب ممكن تجيب شماسة فضي إللي بتتطبق للزجاج الأمامي مفيده جدا لما تكون راكن في شمس، أنا ساعات بحطها حتى وأنا مغطي العربية، وممكن تجيب ستاير كبس للزجاج الخلفي والأبواب الخلفية، بس الستاير الكبس دي حسب رغبتك وخلي بالك وإنت بتركب بتاعت الزجاج الخلفي عشان متبوظش أماكن توصيل الحراري بتاع الزجاج.
٦- لو حابب هات إفزان للطاسات عشان متوقعش أو تقلل فرصة السرقة، أنا عن نفسي مبحبهاش بس يمكن أحطها عشان بقيت أركن في الشارع.
٧- هات معطر حسب ذوقك. فيه جليد الجيل الملون المربع (حوالي ١٥ جنيه، الأزرق جميل) وفيه فواحة أريون (حوالي ٢٥ جنيه، بس بتقعد مده يمكن سنه ولا أكتر).
٨- فصل فرش للكراسي أو إشتري حاجة جاهزة حسب ميزانيتك، الخامة حسب ذوقك (عن نفسي فصلت فرش جلد إتكلف ٧٥٠ شامل فرشة جلد للشنطة).
٩- فيه أدوات مفيده بس دي طبعا مش ضروري تجيبها أو ممكن تجيبها واحده واحده، زي كشاف صغير يشتغل على ولاعة العربية، مكنسة كهرباء للعربية ... إلخ
ده إللي أنا فاكره دلوقت، طبعا مش لازم تجيب كل ده مره واحده وممكن تلغي أي حاجة إنت شايفها مش مهمه (مثلا في ناس مبتحبش كل شوية تحط الغطاء وتشيل الغطاء) بس أنا مرتبلك الأهم فالمهم، يعني ممكن مثلا تأجل الفرش شوية وتسيب أكياس الفبريكة شوية، بس لازم تجيب الدواسات من أول يوم وإلا الموكيت هيتبهدل. وطبعا فيه حاجات إنت هتكتشف إحتياجك ليها مع الوقت. ،مبروك مقدما.
المفضلات