جيلى mk2 و الـ ck 2 الـ2008 تجربه شخصيه محدوده

بسم الله الرحمن الرحيم

دعونى افكر بصوت عالى و إحكموا على قرارى
لقد تم بيع سيارتى الإبيزا 94 بـ 33000 جنيه فقط لا غير (فاضيه)
عاوز عربيه و ليس معى فلوس إضافيه للإضافه
عاوز عربيه مستعمله عاليه شويه و أقسط الباقى(التجار سفاحين و مابيرحموش)
تويوتا 99 مشكوك فى حالتها (دواخل) بـ 57000 بفائده 12%
بولو2001 55000 مع انها 1000 سى سى
نوبيرا على مسئوليتنا يا باشا بيتى (متغير لها ربع خلفى بالكامل:devil2:)
كل ده و انا عايز ادفع 30000 مقدم و اقسط الباقى ومفيش مشكله فى المرتب

لا يا عم أخش على كسر زيرو ..لكن عايزين يبيعوها اغلى من الزيرو!!والله كده
اشوف عربيه زيرو بقسط من 600 الى 800 جنيه شهريا
الفيرنا مابحبهاش من ساعة ما واحد صاحبى جابها و باعها لانها كانت فيها عيوب صناعه و خسر فيها بعد ما التوكيل اصلحها له .
الدايوو لانوس خلاص وقفوا انتاجها و 2008 سمعتها مش قد كده
اشوف الاسبرانزا 516 ..كل الشارع جابها و ركبها و تسمع فيها مدح و زم
الصغيره 113على ما اعتقد,, ركبتها و هى كويسه لكن مفيش شنطه خالص
شيرى a11 تابلوه فقير و اللادا أضمن منها
a15 نفس الفيلم فيما عدا الفانوس الامامى و شوية دلع

الراجل اللى بيبيع قالى تعالى شوف العربيه دى ضمان خمس سنوات او 100الف كيلو
ck2 geely ركبتها مممممممم مش قد كده (اصلى كنت لسه جاى من مطروح و كان معايا تويوتا كورولا 2008 ايزى ترونيك و تابلوها تحفه .. بتاعة حمايا) شاف انطباع وجهى قالى انا عرفت انت عايز ايه .. إركب دى mk2 geely بجد بجد تحفه من الداخل و التقفيل بتاعها روعه و ب64800 و لو دفعت 30000 يبقى القسط 825 فى الشهر بس العربيه روعه .. سالت فى كل مكان عن حد جابها و لقيت واحد
عنده العربيه و قال لى انها لغاية دلوقتى كويسه و احلى حاجه التكييف و الموتور لكن قال لى فيه نحره فى طلعة العربيه و سال فى التوكيل قالوا له ان كل الmk2 كده ..
http://www.geely-global.com/cars/lg/exterior.html

ده اللينك بتاع العربيه .. و انا قررت اجيب الـmk2 بإذن الله ..حد ينصحنى بحاجه
علما بان ركوبى للسياره ضعيف جدا جدا حوالى 8000 كيلو فى السنه فقط

احب اضيف ان الck 2 كويسه جدا و شيك لكن انا انجذبت للmk2
و نسيت اقول ان العربيتين مواتير تكنولوجيا الـ تويوتا سوبر سيلانت

http://www.geely-global.com/cars/lg/images/mk_ex_09.jpg
http://www.geely-global.com/cars/lg/images/mk_ex_10.jpg

انا راكب عربية صيني و مانصحكش خالص خصوصا جيلي
هتندم صدقني

لو انت مقتنع بيها توكل علي الله و عمرك ما هتندم صدقني الموضوع موضوع اقتناع اوعي تسمع كلام الناس و تجيب اللي هما عاوزينه دايما هات اللي انت عايزه

اقتباس:

---

المشاركة الأصلية كتبت بواسطة ahmed_gamal

انا راكب عربية صيني و مانصحكش خالص خصوصا جيلي
هتندم صدقني

---

أحمد باشا شكرا على النصيحه لكن انا فكرت فى الصينى بناء على عدة عوامل و خصوصا الجيلى الجديده
العامل الاول انى اجيد تماما القياده و دى هتبقى سادس عربيه ركبتها(هعرف اتعامل معاها) خصوصا ان كل عربياتى السابقه إستعمال
الثانى ان معدل ركوبى للسياره حوالى 8000 كيلو فى السنه
الثالث ان الجيلى سمعتها سيئه بسبب الدفعه الاولى و نازلين ناويين على تعديل هذه السمعه خصوصا موضوع 100 ألف كيلو او خمس سنين ضمان
رابعا لأنى من الاسكندريه و مركز الصيانه الجديد الرهيب بجوار الموقف الجديد حوالى 20 دقيقه من بيتى . ايه رايك؟ و شكرا مره ثانيه للنصيحه

اقتباس:

---

المشاركة الأصلية كتبت بواسطة foxarc

لو انت مقتنع بيها توكل علي الله و عمرك ما هتندم صدقني الموضوع موضوع اقتناع اوعي تسمع كلام الناس و تجيب اللي هما عاوزينه دايما هات اللي انت عايزه

---

شكرا للنصيحه و الدفعه الهايله دى لى و فعلا معاك حق الاقتناع مهم جدا

لاشكر علي واجب و لكن اوعي تسمع اللي يقولك ابعد عن الصيني عامة ده واحد عمره ما ركب و لا جرب و لكن صدق واحد عنده العربية و يقولك ابعد عنها ده يبقي عن تجربة و بعدين جيلي فعلا سبب سمعتها السيئة في مصر هو التوكيل السابق و لكن التوكيل الحالي توب جير مصمم علي محو الصورة السيئة استخير ربنا و توكل علي الله في ناس كتير بتقول ان mk هي تويوتا بالظبط من جوه...

حضرتك العربيات دي لسه نازلة مفيش حد يعرف ان كانت كويسة ولا لا والعربية اللي كنت شاريها كانت حلوة اوي في الاول وبعدين المشاكل كلها ظهرت
حضرتك انا بردو استعمالي خفيف علي العربية 25000 كيلو في 3 سنين ومع ذلك في مشاكل كتير
وفي نقطة تانية موضوع اعادة البيع زي الزفت مفيش حد بيشتري العربيات دي انا بقالي اكتر من سنة و نص بحاول ابيع مش عارف غير الاسعار اللي هاتسمعها هتخليك ماتبعش غصب عنك
حط النقطة دي في بالك لان شكلك من النوع المحب للتغير او لا قدر الله حصل ظرف ولا حاجة واضطريت انك تبيع مش هتعرف غير ان كمان لو بعت هتبيع بخسارة لن تقل عن 25 الف جنيه
انا مجرب والصيني كله مش مضمون حتي كمان مش برستيج هتلاقي كله بيتريق علي العربية
ممكن تكون الدفعة الجديدة دي حلوة بس دا شيء مش معروف دلوقتي
فبجد والله نصيحة اوعي تشتري صيني وبالذات جيلي دلوقتي لان السمعة زي الزفت
واي شركة بتنزل جديد بتبقي عاملة البحر طحينة وتلاقي كله في الاخر كدب في كدب

اه معلش في نقطة نسيت اقولها انا بردو التوكيل كان جانبي بس كانت معاملة سيئة و مفيش حاجة بتتصلح ولو صلح العيب يبوظلك حاجة تانية المهم بقي اني كنت بقرا ملحق السيارات بتاع الاخبار لقيت صورة للمهندسين اللي بيشتغلو في توب جير والمفاجاة انهم طلعوا هما هما نفس اللي كانو شغالين في سايمكس و ماشاء الله عليهم ماكنوش بيفهموا في اي حاجة
خليك في المضمون ماتنبهرش بالاوبشنز و الشكل و الحاجات العبيطة دي زي ما انا عملت
و سؤال معلش ايه اللي يخلي عربية بالاوبشنز دي و الموتور ده و الحورات اللي فيها دي كلها 65000 جنيه ؟؟؟؟!!!!!!

يا جماعة الخير

سبق لى واتكلمت عن موضوع جيلى وقلت أن العيب مش فى السيارة بقدر ما هو فى التجار والوكلاء ده أولاً، ثانياً فين العربية اللى لا يوجد بها مشاكل؟
وبعدين بالنسبة لجيلى فهى شركة تجتهد لتبيع سيارة تناسب فئة معينة ولابد أن نعترف بكده وفى نفس الوقت مش حاجة تنكسر بعد يومين وانا مثلاً سيارتى السيدان القديمة 2005 و ثلاثة سلندر ولسه راجع بها من مرسى مطروح يعنى عامل 1700 كم بالمشواير واللف فى أسبوع ولا اشتكت ودى ثالث مرة اروح بها هناك (تصدق بالله كنت باشعر بالسيارة عاوزة تجرى أكثر واسرع بعد عذاب زحام ومطبات القاهرة) وده غير مشاوير الاسكندرية وبورسعيد وغيرها من مشاوير فى وسط البلد والزحام والعربية عاملة 48000 كم فما بالك بسيارة جديدة واقوى فى المحرك؟

قصدى ان المثل بيقول ان على قد لحافك مد رجليك وان كنا بنشتكى من جشع لا ينتهى لتجار يبيعون اى سيارة بضعف ثمنها الحقيقى اللى تستحقه أو عدم توفيرهم لقطع غيار أو أيدى مدربة وفاهمة فده مش عيب عربية ده عيب فكر واخلاق تجارية وعيب شعب مغلوب على أمره فى بلد أقل ما يوصف أنه كاره لأهله وكرامتهم.

يا سيدى الفاضل المقبل على شراء جيلى أو غيرها لن اقول لك توكل على الله واشتريها لأنى مالكها ولكن ساقول لك .. شاور عقلك وشاور احتياجاتك ومقدرتك وشوف ايه اللى يناسبك .. وخلى بالك من حاجة واسأل فيها أى مالك سيارة من أى نوع .. فى بلد شوارعها زى ما أنت عارف وبنزينها وقطع غيارها وزيوتها وكل شىء فيها بالشكل ده وييجى يوم عربيتك تقف ما تقولش ده علشان جيلى أو صينى وشوف ايه السبب، وأنا عن نفسى وبرغم أن باتعامل مع العربية بقسوة احياناً رغم صغر حجمها وقوتها إلا أنى اراعيها قدر الامكان وباستعمل بنزين 92 من محطات نظيفة فقط وزيت Shell Helix Plus وغيرت ماء ردياتير وزيت فتيس بعد سنتين وناوى يكونوا كل سنة على الأكثر بعد كده ان شاء الله

وحاجة كمان لازم تضعها فى بالك مادام فلوسك حلال فلن يضيعك الله أبدا فى أى شىء

أ. أحمد جمال انا شاكر جدا جدا لشعورك الطيب و محاولة نصحى بكل صدق من حضرتك
والله انا ما عارف اشكرك إزاى .. واضح ان حضرتك عانيت من التوكيل و السياره معا
لكن حظك كان كده و قدر الله و ما شـــاء فعل .. و الله يقدم اللى فيه الخير ..بالنسبه لموضوع تغيرى للسيارات كانت بسبب انها كلها مستعمله و بيطلع فيها عيوب لأان المستعمل مهما كان كله عيوب و كنت عايز استقر على واحده زيرو على قدى .ز وشكرا مره اخرى اخى العزيز .

اقتباس:

---

المشاركة الأصلية كتبت بواسطة Bahaaeldin

يا جماعة الخير

سبق لى واتكلمت عن موضوع جيلى وقلت أن العيب مش فى السيارة بقدر ما هو فى التجار والوكلاء ده أولاً، ثانياً فين العربية اللى لا يوجد بها مشاكل؟
وبعدين بالنسبة لجيلى فهى شركة تجتهد لتبيع سيارة تناسب فئة معينة ولابد أن نعترف بكده وفى نفس الوقت مش حاجة تنكسر بعد يومين وانا مثلاً سيارتى السيدان القديمة 2005 و ثلاثة سلندر ولسه راجع بها من مرسى مطروح يعنى عامل 1700 كم بالمشواير واللف فى أسبوع ولا اشتكت ودى ثالث مرة اروح بها هناك (تصدق بالله كنت باشعر بالسيارة عاوزة تجرى أكثر واسرع بعد عذاب زحام ومطبات القاهرة) وده غير مشاوير الاسكندرية وبورسعيد وغيرها من مشاوير فى وسط البلد والزحام والعربية عاملة 48000 كم فما بالك بسيارة جديدة واقوى فى المحرك؟

قصدى ان المثل بيقول ان على قد لحافك مد رجليك وان كنا بنشتكى من جشع لا ينتهى لتجار يبيعون اى سيارة بضعف ثمنها الحقيقى اللى تستحقه أو عدم توفيرهم لقطع غيار أو أيدى مدربة وفاهمة فده مش عيب عربية ده عيب فكر واخلاق تجارية وعيب شعب مغلوب على أمره فى بلد أقل ما يوصف أنه كاره لأهله وكرامتهم.

يا سيدى الفاضل المقبل على شراء جيلى أو غيرها لن اقول لك توكل على الله واشتريها لأنى مالكها ولكن ساقول لك .. شاور عقلك وشاور احتياجاتك ومقدرتك وشوف ايه اللى يناسبك .. وخلى بالك من حاجة واسأل فيها أى مالك سيارة من أى نوع .. فى بلد شوارعها زى ما أنت عارف وبنزينها وقطع غيارها وزيوتها وكل شىء فيها بالشكل ده وييجى يوم عربيتك تقف ما تقولش ده علشان جيلى أو صينى وشوف ايه السبب، وأنا عن نفسى وبرغم أن باتعامل مع العربية بقسوة احياناً رغم صغر حجمها وقوتها إلا أنى اراعيها قدر الامكان وباستعمل بنزين 92 من محطات نظيفة فقط وزيت Shell Helix Plus وغيرت ماء ردياتير وزيت فتيس بعد سنتين وناوى يكونوا كل سنة على الأكثر بعد كده ان شاء الله

وحاجة كمان لازم تضعها فى بالك مادام فلوسك حلال فلن يضيعك الله أبدا فى أى شىء

---

كلامك يا استاذ بهاء بسيط و غير معقد و شامل لما نحن فيه فى مصر و جشع تجار السيارات عامة .. وبالنسبه للسياره انا كنت برضه فى مطروح و شفتها هناك (بس الصغيره اللى هى الـck2 ) و كانت جامده قوى و برستيج برضه . و شكرا مره أخرى لرد حضرتك

مادام العربية عاجباااك يبقى توكل على الله
الف مبرووووك مقدمااا

haaaat speranza zy el fol

اقتباس:

---

المشاركة الأصلية كتبت بواسطة sa3dawy

مادام العربية عاجباااك يبقى توكل على الله
الف مبرووووك مقدمااا

---

الله يبارك فى حضرتك .. ربنا يكرم .. هى و الله عجبانى

اقتباس:

---

المشاركة الأصلية كتبت بواسطة dodi_is_the_1st

haaaat speranza zy el fol

---

انت عامل زى واحد صاحبى ليل نهار يقولى هات اسبرانزا:tt1:

هات اللي انت مقتنع بيه

انا كده عملت اللي عليا بس حاول تفكر شوية.... بس حاجة اخيرة معلش استحملني
هقول لك علي حاجة حضرتك لما بتشتري اي حاجة جهاز تليفزيون دي في دي موبايل كاسيت اي حاجة كدة مش بتبعد عن اي حاجة صيني
هل معقول لما تيجي تشتري عربية هتدفع فيها مبلغ مش بتجيبه كل يوم ولا شهر ولا سنة حتي ترميه في حاجة صيني !!!!!!
حرااام والله
بالله عليك فكر كويس و احسبها صح
و ان شاء الله ربنا هيكرمك بحاجة كويسة

اقتباس:

---

المشاركة الأصلية كتبت بواسطة ahmed_gamal

انا كده عملت اللي عليا بس حاول تفكر شوية.... بس حاجة اخيرة معلش استحملني
هقول لك علي حاجة حضرتك لما بتشتري اي حاجة جهاز تليفزيون دي في دي موبايل كاسيت اي حاجة كدة مش بتبعد عن اي حاجة صيني
هل معقول لما تيجي تشتري عربية هتدفع فيها مبلغ مش بتجيبه كل يوم ولا شهر ولا سنة حتي ترميه في حاجة صيني !!!!!!
حرااام والله
بالله عليك فكر كويس و احسبها صح
و ان شاء الله ربنا هيكرمك بحاجة كويسة

---

والله انت عسل يا ابو حميد و مخلص لزملائك فى المنتدى ..انا عاوز اعرف انت معاك ايه و مشاكلها ايه ؟

هي دي يا باشا عربيتي :funny34d::036::036::036:

المشاكل كتير بصراحة مش قادر اكتبها علشان دمي بيتحرق كل ما بفتكرها بس اكبر مشكلة الفينش
http://www2.0zz0.com/2008/07/24/21/192998278.jpg

كنت جايبها بكام يا باشا و منين و ايه امكانياتها و هي شركة مستقلة و لا تبع جيلي و مين توكيلها في مصر؟؟؟؟

كنت جايبها يا سيدي ب 66000
من سايمكس اللي كانت وكيل جيلي
فول اوبشن مانيوال 1500 سي سي
هي شركة تبع جيلي
وتوكيلها دلوقتي الشركة الهندسية للسيارات وكيل سيات و بورش سانج يونج (موسو) و هارلي دفيدسون
شاري:d:d؟
بسعر مغري

اقتباس:

---

المشاركة الأصلية كتبت بواسطة foxarc

كنت جايبها بكام يا باشا و منين و ايه امكانياتها و هي شركة مستقلة و لا تبع جيلي و مين توكيلها في مصر؟؟؟؟

---

توكيلها smg
انا روحت اتفرجت عليها مرة وعجبتنى
سعرها 60000 تقريباا

ا. احمد انا كنت فاكر ان عربيتك جيلى ! بصراحه انت اتسرعت لما جبت المابل لانها غير منتشره نهائيا .. علشان كده انا باسال كتير على الـ mk علشان المشكله دى
على العموم انا هستنى شويه شهرين تلاته لغاية ما اتاكد .. و شكرا لك يا باشــا

مع كامل احترامي ليك استاذ احمد انا شايف انا جيلي mk حاجة تانية خالص

اقتباس:

---

المشاركة الأصلية كتبت بواسطة foxarc

مع كامل احترامي ليك استاذ احمد انا شايف انا جيلي mk حاجة تانية خالص

---

فعلا انا معاك فى دى .. المابل بتتباع كثير اليومين دوول عكس الجيلى

على فكرة اخى الكريم انا لشة شارى العربية دى بس اشتريت الهاتش باك وعامل بيها لحد دلوقت 1400 كيلو العربية كويسة جدا والتوكيل محترم وعلى فكرة برضه قرب مركز الخدمة كان احد العوامل

السلام عليكم يا شباب

يوجد عرض من وكيل جيلي في مصر شركة توب جير على السيارة جيلي MK ، الإعلان نزل يوم السبت الماضي جريدة الأخبار، وقد إتصلت بيهم. رقم الإتصال المختصر 19042

السيارة سعرها خلال العرض هو 59.900 ( تسعة وخمسون ألفاً وتسعمائة جنيهمصري )، قبل العرض هو 63.500 ( ثلاث وستون ألفاً، وخمسمائة جنيه مصري )

الـ MK المعروضة مانيوال ، وهذا هو المتاح حالياً منها، ولا يوجد أتوماتيك في الوقت الحالي.

ويوجد أيضاً في الإعلان السيارة جيلي باندا بسعر 48.900 ، بس أعتقد أنه لايوجد عرض عليها، لأن تقريباً هذا هو السعر الذي تباع به في الأيام العادية.

أنا بصراحة بأفكر أشتري واحدة منهما

الذي لا أعلم عنه شي هو أسعار قطع الغيار والمصنعية لدى توب جير ، فهل يستطيع أحد الإفادة؟

أنا دخلت على موقع اليو تيوب ووجدت فيدوهات كويسة لهما، ويوجد أيضاً إختبار تصادم لل MK.

أجمل ما شاهدته هو الفيديو الخاص بالسيارة الباندا ، هو فيديو إستعراضي ، أتمنى أن يراه الجميع

YouTube - Chinese Car Performance Show: Geely Panda [2009]

مقالاتي

Mohamed Ibrahim Amin - Knol: eine Maأںeinheit fأ¼r Wissen