صلح كلاكسك بنفسك وغير لمباتك بنفسك ( فانتازيا )
دي شوية مساعدات في كهربة العربية..ولا الحوجة للصنايعية..
1- لو عندك لمبة في فانوس الشبورة إتحرقت,تقدر تغيرها بنفسك ..فقط اتبع الخطوات الآتية :-
* الجزء الفيبر الأسود الموجود في أسفل الإكصدام الأمامي مقسم لـ 3 قطع.منهم قطعة كبيرة بالمنتصف.وقطعتين صغيرتين بالأطراف.هتفك القطعة اللي في الطرف بواسطة مفتاح عادة.دخل المفك من عند حافة القطعة الفيبر المراد فكها وأبدأ الدفع للخارج حتي يتم إستخراجها بالكامل.
* دلوقتي تقدر توصل بسهولة خلف فانوس الشبورة المراد فكه.هتلاقي بكرة تثبيت صغيرة خلفه فكها وزقه لبرة هيطلع في إيدك وفك اللمبة المحروقة واستبدلها بأخري
- سعر اللمبة الأصلية 80 جنيه..اللمبة الصيني 30 جنيه.
2- الفانتازيا فيها فردتين كلاكس..واحدة في اليمين تحت الفانوس وواحدة في الشمال تحت الفانوس..لو عندك واحدة فيهم فصلت من الغسيل أو من التراب ......إلخ إلخ إلخ...تقدر تشغلها بنفسك بردو..لازم تفك الفانوس عشان توصل لفردة الكلاكس المراد تصليحها..فقط اتبع الآتي :-
* خلف الفانوس الأمامي هتلاقي في بكرتين تثبيت صغيرين لونهم أبيض.هتفك البكرتين وتفك الكلبسين اللي جنب كل بكرة وتسحب الفانوس لبرة عادي بس بالراحة عشان الفريم بتاعهم ميحصلوش حاجة.وفك كل كابلات التغذية وشيله علي جنب لحد ما تخلص شغلك.وخد بالك إن الفانوس وزنه تقيل ( بشكل غريب )
* تحت الفانوس في شاسيه تثبيت فيبر وعليه قواعد حديد مربوطة بمسامير ألانكيه والاتنين متثبتين في صاج العربية.هات مفك ألانكيه مشرشر كبير ( بـ 5 جنيه ) وفك المسامير والقواعد وشيل الشاسيه الفيبر وخد بالك منه عشان متكسرش منك عشان ده أهم حاجة لتثبيت الفانوس.
* دلوقتي هتلاقي فردة الكلاكس واضحة أمامك وإعملها اللازم.لو داخلها مية نشفها كويس..لو فيها تراب تنفخه كويس..وبعدين جرب..لقيته إشتغل الحمد لله بس صوته مش عجبك عاوز ترفع صوته شوية أو تكتمه شوية..ده عن طريق مسمار ريجلاش موجود أعلي فردة الكلاكس نفسها..تلفها يمين الصوت يرفع..تلفها شمال الصوت يتخن.ظبطه علي مزاجك وتمام كده.
* بنفس خطوات الفك هتعمل flash back للتركيب كل حاجة في مكانها زي ما كانت.
- طبعاً الكلام ده بردة عن طريقه تقدر تعمل أي صيانة للفانوس محتاجها بالمرة وهو مفكوك.
..دي التجارب اللي تعرضت ليها اليومين دول بنفسي وقولت أنقلها لحضراتكم للإفادة..ونصيحة مني ليكم مفيش صنايعي يعملك الحاجة زي ما انت تعملها بنفسك ( طالما في مقدرتك ).
*
