عرض للطباعة
السلام عليكم
انا عملت حدثة جامدة يوم السبت على الدائرى كنت ماشى و لقيت تاكسى ماشى و فاجاة لقيت واحد بيشاور للتاكسى وفجائة وقف بطريقة غريبة المهم لبست فيه
المهم العربية وشها راح
فوانيس و اشارات و اكصدام و المراية الى تحت الفوانيس و الكبوت و السربنتينة و الردياتير
انا محتاج حد يساعدنى فى اصلاح هذة السيارة
-قطع الغيار الاستيراد و لا الجديد
-و منين؟
انا عربيتى Opel Vectra A
قدر الله و ماشاء فعل و الحمد لله انك بخير
رايي تنزل الحرفيين تسال عن ربع علي بعضه فيه كل اللي انت عايزه ماعدا الكبوت
انا ودتها للسمكرى عندى فى حلوان اسمة سالم فى عرب راشد وقلى انة هيحاول يصلح الصاج كلة بس انا شاكك فى الكلام دة
طيب انت مش شايف ان ربع كتير بالرغم ان الموتور بتاعى كويس
يا عم شريف
الف سلامه عليك
المهم السمكرى قالك العربية عايزه ايه بالظبط
و لا ملحقشى يفك النهارده
و ليه مكلمتنيش بعد ما قلتلك تروح للسمكرى
باشا الربع بيبقي من اول الاكصدام لحد اول او نص دوران الرفرفاقتباس:
المشاركة الأصلية كتبت بواسطة cherif.ali
انت قصدك عالنص اللي بيبقي بالموتور و التابلوه
ربنا يعوض عليك انا حصلى من سنة ونص تقريبا نفس اللى حصلك وغيرت الحاجات على مراحل اول باول
مبدئيا لازم الاول تظبط الصاج عند سمكرى محترم لانى بعد الحادثة رحت لسمكرى نص كم وغالى والعربية طلعت مش مظبوطة وبعد كده غيرت الحاجات اللى باظت
جبت كبوت استيراد من العايدى فى الحرفيين ب 400 جنيه واللبادة ب 100 جنية
جبت ردياتير جديد ب 550 جنيه من الميكانيكى بتاعى وبضمان الورشة
جبت فانوس من اوتو اوبل اللى فى دمشت حتة واحدة عامل 230 جنيه ديبو وكان عندى واحد قديم ركبته الناحية التانية عشان يبقوا زى بعض
جبت اكصدام امامى جديد ب 270 جنيه من التوفيقية بس مع الاسف فتحت فتحة الفوجات بس ب 70 جنيه فيارتنى اشتريت ابو فتحة جاهزة كان ب 340 احسن واوفر
جبت شبكة من غير العلامة من الحرفيين جديدة ب 80 جنيه والعلامة صينى من التوفيقية ب 10 جنيه بس حلوة اوى
غيرت علبة زيت باور مش فاكر دفعت كام الصراحة فيها بس تقريبا 200 وشوية استيراد من واحد بطلت اتعامل معاه وطبعا غيرت زيت باور
مروحة تكييف بالقميص 400 جنيه
شجرة تكييف سفلية تقريبا ب 350 جنيه بس مش متاكد
لمبات زينون الواحدة ب 80 جنيه
وفضلت ماشى بالسمكرة القديمة ومرضيتش ارش العربية لانها مكانتش عاجبانى لكن الحمد لله يوم الجمعة اللى فات رحت لسمكرى فى الحرفيين معرفة واحد صاحبى لف على العربية كلها والحمد لله شديتها شدة محترمة وظبط كل اللى فيها كبوت وعتب ورفارف وابواب وكله كله وكنت ناوى اعمل عنها تقرير ان شاء الله وبصراحة هو سمكرى حرررريف وحلو جدا فى اسعاره
ربنا يعوض عليك مرة تانية بس نصيحة حاول على قد ما تقدر تنجزها مرة واحدة عشان هتفتح معاك لو سبتها
ربنا يعوض عليك سلامتك بالدنيا
رأيي تابع مع الاستاذ طناني
وغير كل اللي ممكن تغيره من الصاج استيراد