مرسيدس 200 موديل 1982 لسة زيرووووووو --نصائح--

**amrelsaqqa** · 03-01-2013 10:16 AM

بفرض ان العربية فعلا بالحالة دى والعداد حقيقي ، فالعربية ازاى اتركنت المدة دى كلها ؟ وليه اصلا !!!!
هل مفيهاش برومة ؟

وبعدين الموضوع مش فرد كاوتش وبطارية بس

ده كل ما هو كاوتش او جلد في العربية هيتغير

عندك طقم جلد صباب للموتور وكل الجوانات ( تاكيهات ، وش سلندر ، كارتيرة )
طقم سيور بالكامل
اكيد الكربراتير جواناته باظت وهيحتاج شغل
كل اويلسيلات الفرامل و طاقية السيرفو
كل جلب العفشة وكل ما هو كاوتش في العفشة هيتغير ، واكيد هتحتاج على الاقل تغيير مساعدين
خراطيم البنزين وتنك البنزين
طبعا كاوتش الابواب والشنطة هتلاقيهم في الضياع

كل ده بفرض ان الموتور تمام ومكنش فيه اي اثار لمياه التبريد والشاسيه والصاج مافيش فيهم برومة ( مستحيل )

**Moratoz** · 11-01-2013 07:17 PM

والواحد كان فرحان ان العربيه مش ماشيه غير ٢٠٠ ك ومرفوعه ٢٨ سنه دا كدة كل حاجة محتاجة تتغير

**MBhead** · 15-01-2013 02:52 AM

ممكن اي عربية تترفع لمدة طويلة 20 او 30 سنة و تفضل ب حالتها بشرط اللي رافعها يرفعها صح يملي كل الزيوت و التنك و يشيل البطارية و يركنها في جراج و مكان مفهوش رطوبة و تفضل بكاوتشها و غالبا حضرتك لازم تتوقع تغير بعض القطع
و مفيش شئ مستحيل انا شفت اكتر من عربية بنفس الظروف و زيرو فعلا ..حضرتك تجاهل الرقم اللي في العداد و افحص العربية بدقة و بالذات التفاصيل الدقيقة زي الحوض و استكيرات الشركة موجودة كاملة و واضحة بيبقي في استكرات علي فلتر الزيوت و في حتت ضيقة و افحص المسامير بتلمع لسه و الافيزات اللي بيضيع معظمها مع الاستخدام و اتنقل للصالون ..التابلوه بيلمع و لا مطفي ناعم و لا مدرج .. الخشب لسه فيه لمعته و الكراسي و النواكل بتلمع لسه و لا و كاوتش الابواب و تحت العربية الcoat الاصلي اللي عند العتب و مكان الكوريك و المسامير اللي في العفشة الخ الخ كل التفاضيل الصغيرة دي توضح العربية فعلا كانت استخدمت كتير و لا كيلووات معدودة فعلا ...بما ان حضرتك متاكد ان العربية زيرو ..عشان تدور لها طريقة ..اولا حضرتك لازم تبص تحتها علي تسريب زيت تحت الفتيس او الموتور او الكارونه او تسريب مياه تبريد لان محتمل الاويل سيلات تضرب من الركنة ..حضرتك الاول تنزل الزيت القديم الزيت و البنزين و تغسل الكارتيره و الكابراتير و تركب كل شي مكانه و تملي بنزين و تشل البوجيهات القديمة و تنزل في كل سلندر زيت atf لان البساتم ممكن تكون محشورة لو دار الموتور حتتفرتك و سيب الزيت فترة ركب بطارية و دور كذه مرة و افصل (من غير بوجيهات) او لف الكرنك لما يدور نزل الزيت و حط زيت جديد و فلتر جديد و بوجيهات جديدة و دور .سبها تسخن شوية و شوف امبير الزيت و الكلام دا ..بعد كده حضرتك تغير كل الزيوت الباقية و تشوف اذا في اي حاجة عايز تتغير و انشاء الله خير
اتمني لحضرتك التوفيق

**mohammed dodda** · 16-02-2013 11:30 PM

30 سنة مرفوعة!!! ممشيتش فى عهد مبارك هههههههههههههه

**wael_elbarkoky** · 17-02-2013 04:15 AM

انا عند واحد صحبي عربيه 230 موديل 1978 2300cc
عمله 140 الف كيلو
فبريكا بره و جوه

بقلهه 35 سنه و عمله 140 الف كيلو

و كانت مرفوعه 5 سنين

العربيه بالكاتالوج و الكاسيت البيكار و شنطه الاسعافات

انا مشوفتش في نظافه العربيه دي لغايت دلوقت

ربنا معاك بقي في الي عملي 200 كيلو يا باشا هههههههههههه

عربيات بجد خرافه في كل حاجه