الموضوع: تحذير هام لجميع الأعضاء من العفشجى حمادة امام

المشاركة الأصلية كتبت بواسطة ahmed a.maksoud

أولاً اهلاً بيك معانا فى المنتدى

ثانياً لو حضرتك بتقول أنه جايز مبيفهمش حاجة مثلاً علشان كده غلط فى التشخيص.....و ده كلامك مش كلامي......يبقى المفروض نحذر منه.......لأن وارد اللى ميفهمش حاجة فى عربية ياريس مفيهمش حاجات فى عربيات تانية كتير.

الطبيعي أن لما حد يحب يروح لواحد يصلح له أن بيختار واحد بيفهم.

أنا معرفش ولا حمادة إمام ولا صاحب الموضوع معرفة شخصية.........بس زي ما فيه ناس بتشكر فيه......فيه واحد حذر منه..........و الهدف فى المنتدى هنا إن الأعضاء تستفيد من تجارب و معلومات بعض.

ثالثاً بقى الحوار اللى دار بينهم فيه أكتر من ملاحظة عليه.....

أنا واحد مشاركتش فى الموضوع قبل كده غير بعد مشاركتك......

قريت المشاركة الأولى بتاعة صاحب الموضوع.......و اللى استشفيته من أول جزء أن الميكانيكي نزل تحت العربية و مش لاقي حاجة بايظة و علشان كده طلع سأله أنت بتحس بأيه....دي رقم 1.

رقم 2 أنه بعد ما ساق و جرب طلب منه تقريباً عفشة جديدة.........و عاوز العضو يجيبها من التوكيل.

رقم 3 خلال المكالمة التليفونية كان واضح جداً أن الميكانيكي كان عاوز يغير حاجات و خلاص و لما لقى أن الحاجات غالية قوي أبتدى يراجع نفسه.......و دى ظاهرة فى موضوع المقصات و موضوع الشدادات.

أنا عن نفسي و هفترض حسن النية أن الميكانيكي مش عاوز يعمل شغل على صاحب الموضوع بس عاوز يرضيه مع أنه هو شخصياً مش شايف مشاكل كتير فى العفشة ( ده اللى وصلي من الموضوع)

عن نفسي ميكانيكي شغال بالطريقة دي عمري ما أفكر أني اروح له.

و على فكرة........لو أنت خايف عليه بجد..........قوله يحاول يركز فى تشخيصه و يقول اللى ليه و اللى عليه و ميحاولش يرضي الزبون لو هو شايف أن مفيش حاجة فعلاً.

أتفق معاك فى نقطة واحدة و هي أن المفروض مكنش يتهمه بالنصب ويفترض حسن النية.

أولا أشكرك يا استاذ أحمد على ردك اللى وفر عليا كلام كتير

ثانيا أختلف مع حضرتك انى كنت أفترض حسن النية...يافندم أفترض حسن النية لو كان غلط فى مساعد أو فى جلبة..لكن ده كان حايشيلنى عفشة كاملة وكان مصمم أجيبها من التوكيل..ومش بس العفشة..ده كمان دخل فى حاجات مش بتاعته زى قواعد الموتور والفتيس وبرضه كان عايز يغيرهم لى... يبقى ده اسمه ايه غير انه عايز يعمل مصلحة ؟ ازاى أفترض حسن النية فى واحد كان عايز يغير لى مقصات العربية ولما لقيتهم غاليين ومش موجودين أصلا فى التوكيل قاللى بلسانه : خلاص نخلليهم..احنا أصلا كنا حانغيرهم نضافة؟
وحانروح بعيد ليه..المهندس محمد فضالى صاحب مركز توب جير معانا هنا فى المنتدى..اللى مش مصدقنى يسأله عربيتى كانت حالتها ايه (وهو بيسجل عنده تفاصيل كل العربيات اللى زارته) وبعدين يحكم هل كان حايتنصب عليا ولا لأ.

انا مافيش بينى وبين حمادة امام ده حاجة عشان أفترى عليه أو أألف كل ده ويعلم ربنا انى ماظلمتوش وفيه حاجات قالهالى وماكتبهتاش فى الموضوع تدل انه فعلا نصاب ..

أنا باحمد ربنا انه أنقذنى من نصبه.. ومن باب حبى للمنتدى حكيت للناس اللى حصل معايا واللى عايز يروح للراجل ده بعد كده هو حر طبعا ..أنا مش فاتح ورشة ولا ليا مصلحة عشان الأخ الشقنقيرى يتهمنى انى باشهر بيه وباحاربه فى أكل عيشه

انا بقول لحضرتك انه صعبان عليه انى اتعاملت مع واحد شايفه انا وغيرى انه انسان محترم والاقيه فى موقف زى دة ومش قادر يرد او يدافع عن نفسه
انا الراجل بشهادة ناس كتير جداً بيراعى ربنا فى شغله وبيراعى ضميرة ومش بيسيب فرض ربنا فى الجامع اللى فوق الورشه
وانا على فكرة كلمته الصبح وسألته على الموضوع دة وقالى ان الكلام دة محصلش ودة ظلم
وطلب رقم تليفونك يكلمك يفهم منك الموضوع قلتله انى مش عارف رقمك

المشاركة الأصلية كتبت بواسطة محمد يوسف

حضرتك أقسم بالله العظيم كمان مرة وبحياة ولادى انى ماكدبت ولا زودت فى اى كلمة فى الموضوع ومش فاهم يعنى حضرتك متوقع منه وانت زبونه يقول لك انه نصاب أو مابيفهمش؟
حضرت فكره بس بالتويوتا الياريس الكحلى اللى جت له يوم خميس 27/12/2012 وصاحبها كلمه على تليفونه مرتين بعدها فى نفس اليوم وكان مستنيه الاتنين اللى بعده..الورقة الحمرا اللى كتبهالى بخط ايده وفيها الطلبات ورقم تليفونه على ضهرها لسه فى جيبى

01065008829
حمادة امام

ومش فاهم يعنى حضرتك متوقع أديك رقمى عشان صنايعى زى ده هو والا صبيانه يتصلوا يشتمونى ويهددونى ؟
هو حضرتك للدرجة دى يهمك صنايعى بيشتغل فى عربيتك انك تحترمه أكتر من زمايلك فى المنتدى؟

سبحان الله وحسبى الله ونعم الوكيل فى هذا الصنايعى

اولا انا يهمنى لو واحد فعلا غلط او بينصب اننا نحذر الناس منه
انما يا سيدى الفاضل ان صنايعيه يتصلو بيك يغلطو او يهددوك دة شىء انا مش حقبله اطلاقاً انت راجل محترم ولا يمكن اكون بفكر ان اساعد فى حاجه زى دى انما انا بس بحاول اساعد فى الوصول للسبب الرئيسى اللى ادى للموضوع دة
وطبعا كنت عاوز اعرف الحقيقه
انما مش عاوزك تزعل منى انا بحاول اساعد بس
وبالنسبه لكلمه الصنايعى دى مش المفروض نبص للناس دول على انهم اقل مننا احنا دايما بنحتاج الصنايعى وهوة دايما بيحتاج لناس تانيه مينفعش نتعالى على حد
ولا انت مش معايا ؟


ممنوع الكتابة باللون الأحمر حيث انه مخصص للإدارة والمشرفين فقط
تم تغيير اللون
م ع 5

المشاركة الأصلية كتبت بواسطة الشقنقيرى

اولا انا يهمنى لو واحد فعلا غلط او بينصب اننا نحذر الناس منه
انما يا سيدى الفاضل ان صنايعيه يتصلو بيك يغلطو او يهددوك دة شىء انا مش حقبله اطلاقاً انت راجل محترم ولا يمكن اكون بفكر ان اساعد فى حاجه زى دى انما انا بس بحاول اساعد فى الوصول للسبب الرئيسى اللى ادى للموضوع دة
وطبعا كنت عاوز اعرف الحقيقه
انما مش عاوزك تزعل منى انا بحاول اساعد بس
وبالنسبه لكلمه الصنايعى دى مش المفروض نبص للناس دول على انهم اقل مننا احنا دايما بنحتاج الصنايعى وهوة دايما بيحتاج لناس تانيه مينفعش نتعالى على حد
ولا انت مش معايا ؟

قبل كل شىء بصفتك جديد معانا نصيحة ماتكتبش باللون الأحمر لأن ده لون الاشراف وممكن يدوك مخالفة عليه

وبعدين أنا ماقصدتش انك حاتساعده .. هو طلب رقمى منك وانت بحسن نية ممكن تفتكر انه بجد عاوز يستفسر رغم انى متأكد انه فاكرنى كويس

أنا مش زعلان من حضرتك .. وعلى فكرة هو أكيد شاطر فى شغله بدليل سمعته فى المنتدى عشان كده انا استبعدت انه مابيفهمش أو غلط... ممكن يكون طمع فيا أو حس انى ممكن ينضحك عليا وأنا فعلا كان ممكن ينضحك عليا لولا ستر ربنا . وعلى فكرة أنا الاسكانر بتاعى بايظ أول ما يتصلح حاسكن الورقة اللى بخط ايده بتاعة الطلبات والفاتورة بتاعة توب جير اللى مافيهاش ولا حاجة من طلباته.

وبالنسبة لكلمة الصنايعى أنا مش باتعالى على حد ولا بقلل منه وأستغفر الله ان كنت فهمت ذلك من كلامى ولكن قصدى ان احنا زملاء هنا فى المنتدى بنفيد بعض بدون مصلحة لكن الصنايعى اللى بيشتغل فى عربيتك ليه مصلحة معاك.. فبالتالى احنا المفروض نصدق بعض أكتر.

بالنسبه للون الاحمر اكيد انا مش قصدى بس اتعودت اكتب بيه لانى مشرف فى منتدى تانى
وبعتذر للمشرفين هنا انا مقصدش طبعاً
وانا مصدقك فى كلامك انا كنت بحاول اعرف السبب فى سوء التفاهم دة بس