الموضوع: ستيب واي

انا جايب ستيب واي 2013 بقالها معايا من يوم 30/10 سنة 2012 لحد دلوقتي

هقول المميزات و العيوب
بس انا مش خبير في العربيات
فياريت يا جماعة لو مقولتش كل الملاحظات تفكروني و تسألوا


1 - عالية جدا عن الارض
باختصار مفيش مطب يقف قدامها و لا حفرة

2 - دواسة البنزين و الدبرياج
خفيفة جدا و كل اللي جربها لاحظ كده , كأنك بتدوس علي هواء , بس عالية شوية
و ساعات بحس فيها بخشونة مش عارف ليه يمكن عشان الاسفلت بايظ

3 - الفرامل
ال abs ده حاجة فاجرة
بصراحة ربنا انقذني من كذا موقف
و الفرامل كانت سدادة

4 - الدريكسيون
هو باور و ممكن تلفه بايد واحدة بس
بس اتقل من عربيات تانية زي اللانوس مثلا

5 - الدراع مالتي فنكشن
جامد
و مش هقول غير كده

6 - استهلاك البنزين
بين 200 و 225 في الصفيحة
و انا طريقي صلاح سالم و مصر اسماعيلية الصحراوي
يعني بكون في الزحمة كتير جدا ساعات بفضل في الخليفة المأمون بالساعة و الساعتين

بس برضة مش عارف الاستهلاك ده بيقولولي في التوكيل هيزبط بعد كده

7 - الكاسيت رائع الصراحة
و البلوتوث ده مريح جدا عشان الموبيل

8 - الحرارة
هي الصبح العربية بتكون سحبها فاجر
و هي لسه باردة
لكن لما بتسخن بحس انها بتقل شوية في السحب
و تسخن دي يعني ماشي بيها 3 ساعات فيما فوق يعني

لكن فعلا فرق كبير بين الصبح و الظهر
مش عارف ليه

الحرارة بتبدأ شرطتين و بعدين تبقي اربعة شرط و تثبت علي كده

9- الموتور
صوته عالي جدا
و بيخلي اهدي علطول السرعة
بس قالولي في التوكيل في عزل ممكن يتعمل

و ساعات بسمع صوت كركرة خفيف زي عربيات النص نقل الصبح فيه مش عارف دي ايه

10 - الثبات
العربية ثابة جدا
علي غير ما كنت متوقع
علي 170 دي اخر حاجة جبتها بيها
كانت ثابتة جدا جدا جدا

11 - الصوت
هو كويس جدا
بس بصراحة هم غتتة انهم شايلين السماعات الخلفية و كمان مفيش ضفاير ليها

12 - الصالون
واااااااااااااااااسع
بس مش شيك
و الطابلوه فقير جدا

و الزراير بتاعة الشباك رخامة السنين

13 - الشنطة
جميلة جدا و سعتها كويسة

14 - العفشة
ناشفة شوية

و ده طبيعي لعربية المفروض انها رياضية

15 - المرايات
مش كهربا
بس احسن عشان هي كده رخيصة
و انتوا عارفين ان المرايا بتستخدم في السلام بين العربيات في الزحمة

16 - ابعاد العربية
ممتازة جدا

17 - المناورات
جميلة جدا بتحس انك بتغرز بشياكة وسلاسة

18 - النور الخلفي
جميل جدا في انك ترخم علي الناس اللي وراك
بتشغل الضباب الخلفي و معاه الفليشر
و اللي وراك هيسيب مسافة بينك و بينه 5 متر علي الاقل

19 - التقفيل
الي حد ما كويس
بس اللوجان اول ما نزلت تقفيلها كان ممتاز
دي فيها شوية تكات صغيرة مش عارف ليه مظبتهاش
بس عملتها في التوكيل

20 - الكلاكس
في الجنب و في الاول مش هتكون متعود عليه
بس هيبقي عادي بعد كده
بس هو رخم في الدورانات عشان بتكون ايدك علي الطارة

21 - الكمبيوتر
مش فاهم ليه شايلين منها الكمبيوتر بتاع اللوجان
مفيش تحكم كويس


عايز اسئلة بقي
انا مش عارف اقول ايه تاني