الموضوع: ليه اشتريت ال بى واى دى اف ثرى byd f3 2013 ؟

فى اخر لحظات ليا قدام معرض الامل و انا بستلم العربيه , استاذ مدحت لفت نظرى ان العربيه مافيهاش بنزين كفايه و لازم امون من اى بنزينه قريبه قبل ما اطلع عل مرور و ارخص , طبعا انا اول ما اتحركت بالعربيه جاتلى حالت تنشنه كده و رهبه , كنت خايف و انا ماشى بيها , العربيه لسه جديده و كنت خايف حد غشيم يخبطنى و لا حاجه , لدرجة انى فكرت امشى بيها و اشغل نور الانتظار طول مانا ماشى , و من كتر التركيز الدنيا لفت بيا و كنت حاسس كأنى ماشى بيها فل شارع تايه و كأنى مش من مصر الجديده , فطبعا البنزينه عدت , فحاولت استجمع خرايط دماغى , فين اقرب بنزينه تانيه جنب المعرض و لكن هيهات , دماغى قفشت و حالتى بقت صعبه , و لمبة البنزين نورت و ده كان اول موقف يحصل ليا بعد ما اشتريت العربيه , فضلت ماشى بيها و لمبة البنزين منوره و مش لاقى و لا بنزينه فى سكتى لحد ما وصلت شارع الحجاز كنت عارف البنزينه اللى هناك , و شارع الحجاز كان زحمه و واقف و اللمبه منوره و كنت خايف لا العربيه تبطل منى و تقف و ياه عل وساوس اللى دارت ساعتها فى دماغى , المهم وصلت البنزينه كأنى وصلت بير فى وصت صحراء , قلت للراجل فاويل علطول 92 , طبعا انا غلطت فى ناحية فتحه التنك , فل سيينا كان التنك يمين و فل اف 3 فتحة التنك شمال , بس هما عاملين علامه فل تابلوه جنب علامة البنزين سهم كده عشان يعرفك مكان فتحت التنك فى انه ناحيه بس انا مخدتش بالى منه , ساعتها خدت تقريبا ب 109 جنيه بنزين 92 تفويل , و بعديها اتجهت على مرور النزهه , اللى كان زحمه و انا كنت رايح متأخر , و فعلا باب النجار مخلع زى ما بيقولوا , الشوارع اللى حوالين المرور مكسره و مبهدله و المطبات عشوائيه و عاليه جدا , انا عمرى ما شفت حد يعمل مطب و عالى جدا كمان على منزل او مطلع , و لقيت حتت دين بلاعه مفتوحه , دى مش بلاعه دا بكابورت , و ادى حال بلدنا , بس الشهاده لله البى واى دى عدت المطب عادى جدا , و الله العظيم تلاته كان فيه عربيات تانيه جديده و ماركات محترمه زى البيجو و بيعدو المطب ده و بيحكوا فيه من تحت , المهم ركنت و ابتدت المعاناه , كله عايز فلوس , كله عايز حلاوه , كله بياكل و بطنه نجسه , حسبى الله و نعم الوكيل , انا لولا فرحتى بالعربيه ساعتها , كان زمانى حلمت الحلم المعتاد اللى بحلمه كتير اللى هو السفر خارج مصر لأى بلد فيها نظام و قانون حازم و مش ماشيه هرجله , المهم لفت نظرى حاجه و انا راكن , ان الفرق حوالين الفوانيس الاماميه و البودى كبير نسبيا , فخفت لحسن يكون عيب صناعه , و بالصدفه لقيت بى واى دى بردو ركنه جنبى بعربيتين عشان تترخص و صاحبها مش موجود جنبها فقلت اقارن بينها و بين عربيتى من حيث التشطيب الخارجى و الفوارق عشان اتأكد ان عربيتى سليمه , لقيتها هى هى , فحمدت ربنا , و بعدين ابتديت ابص على ماركات تانيه واقفه برضه اليابانى والفرنساوى و الكورى , لقيت موضوع الفوارق ده امر طبيعى جدا و زى البى واى دى , فعرفت ساعتها ان انا محدس و الغربال الجديد له شده , مش بقولكم انا كنت مركز , و طبعا متنسوش موضوع الزجاج الفيميه الفابريقه ده لازم ينكتب فل رخصه , اليوم خلص على خير وسط مكالمات اهلى و حبايبى بالتهانى القلبيه و المباركات (مش عايز اقول اهلى و عشيرتى لحسن تفتكرونى اخوان) , المهم مع انى كنت جعان اوى و نفسى اروح اكل اى حاجه مكلتش مل صبح , بس قلت اروح الاول على شارع دمشق اشتريلها طقم ماشايات للحفاظ على نظافة الارضيه اللى هى اصلا بيج فاتح فلازم تتوسخ بسرعه , كنت محتار اختار لون اسود غامق بس مش حيليق مع لون صالون العربيه و لا بيج بردو بس حيتوسغ بسرعه , المهم قلت خير الامور الوسط , اشتريلها مشايات لون كاكاوى غامق او مشمشى غامق اهو تكون لايقه عل لون و فى نفس الوقت متتوسخش بسرعه زى الفواتح , طبعا شارع دمشق حاجته غاليه اكمنه فى مصر الجديده , بس انا كنت مستبعد مشوار الحتت التانيه فقولت بلاها مش مشكله , لاقيت المشايات الصينى و التيوانى و كله درجات فل السعر و الجوده , جبت طقم تايوانى صب (اللى هو بيقولوا عليه حوض ابو حواف عاليه) عشان مايسربش الوساخه لتحت , و الطقم ده كان اربع حتت , و ندمت انى جبته و مجبتش طقم خمس حتت عشان كده الحته اللى فل ارضيه اللى ورا اللى فل نص (العاليه ديه) مش متغطيه و بكده حضطر اشتري للحته الصغيره ديه فرخ مشمع ورق بلاستيك لونه بنى او كاكاوى بتاع مطبخ من عند اى واحد بتاع ادوات منزليه عشان اغطيها , حاجه فلح فلح يعنى و بلدى اخر حاجه , معلش الواحد مابيتعلمش ببلاش , و رجعت البيت ملقتش ركنه تحت البيت عندى , و مكنتش عايز اركنها صف تانى و اسيبها تتزق كل ما حد يحب يطلع , فاضطريت اركن بعيد عشان الاقى ركنه كويسه , طبعا انا بقيت محسوك فل ركنه , و انا بركن احب اقولكم ان الزجاج الكهربا ده ميزه كبيره جدا و اوبشن رفاهى اخر حاجه بجد بسم الله ما شاء الله , قعدت اظبت المرايات عشان تضرب لتحت و اشوف الكاوتش الورانى و انا بركن عشان يبقى جنب الرصيف اوى و العربيه متبقاش معرضه فل شارع و ممكن تتجرح من اى عربيت نقل زباله او عربيه نقل معديه , و على فكره انا فل عربيه السيينا كنت بطلع راسى مل شوباك عشان ابوص عل عجله الورانيه و انا بركن انما فل بى واى دى و نظرا لكبر حجمها و علو الباب لمستوى كتفى فمينفعش الموضوع ده , و على هذا الحال قعدت تلات ايام عشان اعرف اقرب العربيه للبيت عندى و اركنها تحت البيت بالضبط , عشان ابص عليها كل شويه من البلكونه من فوق , مش بقولكم محدس , طبعا كل يوم كنت ببص عل ركنات الاقى ركنه اقرب اقوم محرك العربيه للأقرب و لحد اخيرا بعد تلات ايام بقت تحت البيت , حاجه تانيه برضه تخص المشايات اللى جبتها و خضتنى عل عربيه اصلا , و انا ماشى حسيت ان الفتيس بقى خشن بالذات لما ببقى معشق الاول و افكه , اسمع صوت ترس بيخبط , يانهار اسود , العربيه لسه جديده , وقفت على جنب و اول حاجه جت فى دماغى المشايه , زحلقتها لورا ناحيه الكرسى عشان ابعدها عن الدواسات , و جربت امشى لقيت الفتيس زى الفل و ناعم و مفيش فيه مشكله طلع فعلا الموضوع فل مشايه , طب اعمل ايه , اقص الدواسه يعنى عشان متعوقش الدبرياج , ما علينا , العربيه على الطريق الدائرى ممتازه و ليها هيبتها و راسيه عل ارض و تسارعها حلو , طبعا انا مش عايز اقرص عليها , العربيه لسه فل تليين و لسه معملتلهاش صيانة الالف فل وكيل , بالنسبه للوكيل , احسن حاجه عجبانى فيه من دلوقت من قبل ما اروحه , انه قريب , فيه فرع صيانه فل قطاميه طريق الشهيد أو اللى بيسموه المخيم الدائم, و التانى فل عباسيه , و واحد بيقولوا ده انضفهم فل اسكندريه , طبعا انا ان شاء المولى عز و جل حروح فرع القطاميه , و الحمد لله توكيلات تانيه بيبقى مراكز الصيانه فى ابو رواش يعنى سكت سفر.

بسم الله

سلام عليكم ,

كل عام و كل الشعب المصرى بخير و فى اعياد دايما كده

ايه عاملين ايه فل برد ده و الرياح و الزعابيب ديه , طبعا عربياتكو مردومه مش كده

انا حابب اتكلم معاكو عن موضوع خفيف كده , و الى هو , اللى خايف على عربيتو مل ناس المؤذيه يعمل ايه ؟

طبعا اكتر ناس حتلاقيهم محسوكين اوى و خايفيين على عربياتهم هما اللى لسه جايبين عربيات جديده

زى حالاتى كده , محتاس بالبى واى دى , و المفروض الصراحه تبقى الناس كلها بتحب عربياتها و بتخاف عليها و بتهتم بنظافتها و شكلها و حالتها مش بس العربيات الجديده لا و القديمه كمان و تبقى حاله عامه و الناس تغير من بعض فى موضوع نظافة العربيه و لما تشوف جارك عربيتو زى الفل و نظيفه , انت كمان تهتم بعربيتك شويه يا راجل

انا المدير بتاعى بيسافر كتير تبع الشغل , عقبالى انا كمان , و من ضمن السفريات اللى سافرها كانت المانيا , الراجل رجع من هناك متعقد , بقه قاعد على مكتبه يكلم نفسه , مديرى ده اصلا مش بيحب ياخد و يدى فى كلام فى مواضيع ملهاش علاقه بالشغل اثناء الشغل , و مبيصاحبش حد مل شغل , و كلامه كله رسمى اوى و محدش واخد عل كلام معاه اوى , المهم الراجل بعد ما رجع من المانيا كان خلاص حينفجر , دخلتلو لاقيته بيتكلم معايا عن اللى شافه هناك , بيقولى ان الحته اللى هو راحها فى المانيا , مافيش ولا عربيه متجرحه و لا عربيه مخبوطه و لا عربيه شكلها مش نظيف , بيقولى انا تعمدت امشى فل شارع و ابص على كل عربيه زى اللى مستنى غلطه لواحد , مفيش خربوش واحد , مفيش خبطه خفيفه و لو حتى فى اكصدام , مفيش ترابه على اى عربيه , حاجه تجنن , و لقيتو فرجنى على شويه صور عن الحته اللى راحها , طبعا بلد جميله.

نرجع بقى لمصر الحبيبه , مفيش عربيه مش متجرحه و متخربشه , ده اقل واجب يا معلم ما دام نزلت مصر , يبقى انت اكيد فى مصر.

و بالمناسبه ديه احب احكيلكم عن قصه طريفه , طبعا انا قلتلكم انى لسه جايب البى واى دى و خايف عليها و قعدت تلات ايام عشان اعرف اركنها تحت البيت عندى , كل ما مكان يكون اقرب يفضى اقوم محرك العربيه للمكان الاقرب لحد ما اخيرا جبتها تحت البيت , و فى يوم راجع مل شغل و دخلت مدخل العماره و بدوس عل اسانسير لقيته هو اصلا نازل طب خير , طلع مل اسانسير بنانيت صغيرين شكلهم فى اعدادى مدرسه كده , شاكلهم نازلين من بيت واحده بنوته صحبتهم برضه و شكلهم كانو بياخدو درس (درس خصوصى يعنى) لأنهم تقريبا كده كانو لسه بلبس المدرسه , فشكلهم طلعوا مل مدرسه عل درس , المهم البنانيت الصغيرين دول شكلهم بنات ناس اوى و شكلهم متربيين و كلاس كده , يعنى شكل اهاليهم صرفين عليهم و مودينهم احسن مدارس و كده , و هما خارجين انا قلت استنى مطلعش فل اسانسير دلوقتى , اشوفعم لما يعدو من جنب عربيتى البى واى دى حيعملوا ايه , مش عارف ازاى شكيت و لو للحظه انهم ممكن يتحرشو بعربيتى و يعملو فيها حاجه , دول بنات ناس متربيين و عينهم مليانه و شكلهم مؤدب جدا , و كانت الفاجعه , لقيت واحده فيهم طول ما هى ماشيه جنب العربيه عماله تدقدق عليها و تخبط كأنها بتخبط على بطيخه من كل ناحيه تشوفها قرعه و لا حمرا ,,, حمرا فعلا ,,, البطيخه ,,, دقدقتين على الكبوت كام دقه عل باب القدمانى و كملت دق عل باب الورانى و اخيرا الشنطه و تحس انو عاجبها قوى صوت الدقدقه و تحس انها مكنتش عايزه تسيب العربيه , يبقى انت اكيد فى مصر , لما بنوته زى ديه بتعمل كده فى عربيات الناس , امال اطفال الشوارع يعملو ايه , ممكن حد يقولى