الموضوع: ليه اشتريت ال بى واى دى اف ثرى byd f3 2013 ؟

بسم الله
أولا انا مبسوط اوى و متكيف عل اخر من اخر مشاركه لعمنا و اخونا الكبير ابو عمر و حتلاحظوا اد ايه انا متكيف من مشاركته ديه .....

ياااااااااااااااااااااااا اااااه

و سر سعادتى ديه انو فتحلى سكك كتير اوى للتفكير و انا اصلا بحب التفكير أو بمعنى اصح بحب الشطح

ابتدى منين , مش عارف , حاسس كأن الافكار زى الطيور و دماغى زى أكل الطيور , و بالتالى يجوز تسمية هذه الحاله بمسطلح " و تتخطفنى الطير " و ياريت تقروها بالتشكيل عشان ندى الحاله حقها
طب الحق بقه اقول الكلمتين قبل ما الطير ما تسبش فيا فتفوته ... صباح الفل

نبتدى , أولا سأثبت لكم بالدليل العقلى ان مافيش أى عربيه فى العااااااالم كله , كانت و مازالت و ستكون , أى من ساعت ما الو يا عربيات من قبل ما الجيل اللى قبل اللى قبل اللى فات ما يتولد لحد ما تختفى العربيات من الوجود , مفيش عربيه مافيهاش عيوب , و عيوب ايه , مش اى عيوب , ده مافيش عربيه اصلا فى العالم كله مافيهاش عيوب ممكن تخلى الناس اصلا ماتشتريهاش

يعنى ايه , يعنى العبد لله اللى سيادتكم عمالين تقروا كلامه ده , ممكن تديلوه اسم اى عربيه فل العالم , اى عربيه , و انا اقولك عيبها اللى يخلى الناس تنفر منها و متشتريهاش اصلا , من اول البوجاتى فيرون لحد اتفه عربيه واحد كرسى تلاته عجله واحد سيلندر بيب بيب أعوااااااااااا

و العكس صحيح ,

ايه ده بجد , يا رااااااااااااجل , العكس صحيح , و ده بعد ما اتوافق عل دستور و لا طول عمره كده صحيح ؟؟!!!!

انى اجولك , العكس صحيح يعنى برضه أى عربيه فل عااااااااالم (( من اول البوجاتى لحد التوكتوك اللى راكبه الراجل ابو راس البطه و مراته اللى دايما تنزل من عند امها متأخر)) , برضه اقدر اقولك على ميزتها اللى تخلى الناس تشتريها و تقبل عليها

الكومبلكس أكشن اللى انا كتبته ده , مالوش غير مخرج واحد , الا و هو ((سؤال)) , السؤال بيقول:ما عدد محافظات مص..... لا مش ده السؤال ,,,,,,,, السؤال بيقول , السؤال بيقول , اه افتكرت , السؤال بيقول : ما هو دليلك العقلى ده اللى انت خاوتنا بيه ؟؟
بسيطه أوى
1- لو عربيه موتورها كبير و قوى ينفع للسفر و الاداء الرياضى ,, حيكون عيبها فل مقابل استهلاك عالى فل بنزين و الصيانه الدوريه
2- لو عربيه اقتصاديه فى اسستهلاك البنزين ,, حيكون عيبها ان موتورها ضعيف و خرع و اداءه ضعيف
3- لو عرفو يعملو موتور يجمع بين اقتصاديه الاستهلاك و القوه و الاداء فى نفس الوقت ,, حيكون عيبه انو محتاج صيانه كتير و عنايه خاصه زياده عن الطبيعى و إلا فشل فى مهمته
4- لو عربيه كبيره و فارهه من حيث الحجم ,, حيكون عيبها انها حتبقى داهيه فل طرق المزدحمه التى تحتاج إلى تركيز عالى و مهارات خاصه و مناورات و ايضا داهيه فل شوارع الضيقه و الحتت المزنوقه و كمان صعبه فل ركنه جدا
5- لو عربيه مدمجه الحجم سهله فى المناوره و الركنه حتلاقيها ديقه من جوه و كابسه على انفاس اللى قاعدين جواها
6- لو عملو عربيه وسط فى الحجم , يبقى لا نابك بلح الشام و لا عنب اليمن , لا منك حسيت بالرفاهيه و لا منك عارف تركن و عمال تخبط يمين و شمال
7- لو فيه عربيه تكنولوجيتها عاليه حتلاقيها كثيرة الاعطال , و محدش بيفهم فيها غير فل الوكيل اللى فى ابو رواش و هناك حتتروق و حتكع قوت عيالك عشان تصلحها
8- لو فيه عربيه تكنولوجيتها فقيره , سيادتك حتتعب و حتحس انك متأخر و مل عصر الحجرى و مش حتبقى طايقها
9- لو فيه عربيه سعرها حنين , بس قصاد ده حتضحى بحاجات كتير , حتلاقيها مافيهاش كماليات
10- و لو عربيه فيها كل الاوبشنز و الكماليات , حتضحى بفلوس كتير عشان تجيبها ده لو عندك تمنها اصلا
11- لو جبتها كاش حتخسر و لو جبتها قسط حتخسر حتخسر كتيييييييييييير اوى
12- لو ماركه مشهوره و لوجو و اسم , حتدفع كتير اوى فى تمن بلاستيكه ملزوقه عل شبكه ماتساويش تكلفتها اتنين جنيه
13- و لو ماركه مش قديمه اوى و لسه عايزه ترسخ اسمها فل سوق , حتحس انك ناقصك حاجه و نفسك تشيل اللوجو و تحط لوجو تانى , و مش حتعرف تتمنظر بيها على خلق الله
14- لو منتشره تاكسى , كده اثبتت نفسها و قطع غيار كويسه , لاكن الفكر الطبقى البرجوازى المتعالى ترفض ان تتساوى حمارة ابن العمده بأى حماره تانيه شغاله عشان اكل عيش اللى راكبها بالحلال عشان يعرف يتجوز و يأكل عياله سندويتشين و هما رايحين المدرسه (قطعت قلبى)
15- لو عربيه منتشره اوى مش حتحس بالتميز و الانفراد
16- و لو عربيه نادره مش حتلاقيلها قطع غيار و حد بيفهم فيها و محدش حيشتريها منك
17- لو عربيه عاليه عن الارض مش حتاكل مطبات بس انسى ساعتها الثبات الرياضى اللى على حق
18- لو عربيه واطيه للارض , البس , مرحبا بكم فى مراجيح المحروسه
19- لو عربيه حلوه شكلها جذاب , مش حتشبع نق و قر و حسد و عين , اعوذ بالله , يا رب اكفينا الشر
20- لو عربيه مش جذابه , حتصطبح بوش امها الفقر كل يوم الصبح و انت رايح شغلك
21- لو فرش جلد بيستحمل بس بيحرر فل صيف و القماش العكس
22- لو بنزين غالى و لو ديزل صوته عالى و اهتزازاته عاليه ( يعنى لا عمله صايلنت و لا موقف الفايبريشن)

ايه تعبتوا , لا دانا كنت بسخن بس , انا ممكن اكملهم 100 نقطه لو عايزين , بس مفيش داعى , اكيد انتوا فهمتوا انا عايز اقول ايه

يا استاذ ابو عمر , اعتبرنى اخوك الصغير , صدقنى انت ممكن تعض محتار العمر كله , مش اربع شهور بس , قرار الشراء ده اصله بيبقى عامل زى الحب , ممكن يبقى حبيبك فيه كل العبر , و ممكن يكون الناس كلها بتكرهه و انت بتحبه
مل اخر كده , العربيه اللى انت حتقع فى حبها بجد , حتستحملها مهما عملت معاك و مهما الناس قالوا عنها و حاولو يكرهوك فيها , لأنك حتكون مبسوط و انت راكبها , فرحان بيها , قايم نايم تحلم بيها , تتمنى انك تنزل بليل فى عز السقعه و التلج عشان بس تغطيها (قطعت قلبى اه) , ساعت ما حد يخبطها تبقى عايز تلحق تداويها و تسمكرها , ساعت ما تلاقى حد خربشهالك , تروح تجيب منتج مل منتجات اللى بتداوى الجروح و تعمل كليب جورج وسوف طبيب جراح

عايز اسمع بقه (( الله اكبر )) و زغروطه بقه معلش