الموضوع: قياس الزيت دة مظبوط ولا هيبوظ الدنيا ؟؟

هحكيلك حكاية حصلت معايا
روحت اغير زيت في توكيل اكسون موبيل
المهم دخلت العربية وفك الطبة ونزل الزيت وحط الزيت الجديد وكله تمام وبعد ما مشيت لقيت العربية ملغبطة قوي والغيرات غريبة
المهم روحت تاني يوم الصبح قلت ابص علي مقاس الزيت لقيت المقاس عالي بشكل غريب
وبصيت علي زيت الفتيس الاقيه نافص خالص
روحت راجع عليهم
طلع ان الصنيعي الغبي فك طبة زيت الفتيس ونزل الزيت وبعدين قفها وحط زيت الموتور في الموتور عادي
يعني الموتور فيه حوالي 7 لتر زيت
بس روحت منزل كل الزيت ده وغيرة الفلتر تاني وحط زيت جديد وحطيت زيت فتيس جديد
والحمد لله ربنا سترها معايا ومحصلش حاجة للفتيس ولا للموتور

خد باللك من الشخص اللي بيغير الزيت وبص عليه شوفه بيعمل ايه لان والله اعلم الغباء منتشر اليومين دون
وربنا يسترها معانا جميعا

هو حضرتك قيست الزيت ازاي؟
و هل مسحت مقياس الزيت بفوطه أو بمناديل قبل ما تاخد القياس و الا لا؟
و العربيه كانت دايره و الا مبطله؟
و كانت بارده و الا وصلت لدرجة حراراتها الطبيعيه؟
عشان شاكك ان حضرتك واخد القياس غلط

المشاركة الأصلية كتبت بواسطة mohamed_mohsen

هو حضرتك قيست الزيت ازاي؟
و هل مسحت مقياس الزيت بفوطه أو بمناديل قبل ما تاخد القياس و الا لا؟
و العربيه كانت دايره و الا مبطله؟
و كانت بارده و الا وصلت لدرجة حراراتها الطبيعيه؟
عشان شاكك ان حضرتك واخد القياس غلط

ياباشا انا قست الزيت زي ما الكتاب بيقول طلعت المقياس ومسحتة ورجعتة تاني وشفت المقاس والكلام دة والعربية بايتة من بليل وقبل ما ادور الصبح عملت الكلام ده وقبل ما ارجع القياس تاني مسحتة .. وقستها بردة والعربية سخنة وبطلتها وسبتها ربع ساعة ونفس القياس .. شكرا لحضرتك

المشاركة الأصلية كتبت بواسطة MohammedAladel

أولا .... لازم تتأكد من إنك فضيت الزيت بالكامل من السيارة ... بعد ما زودت ... زى ما قال العضو الكريم بترفع المقاس وتمسحه بفوطة وتكون العربية كان بقالها 10دقايق أو ربع ساعة بعد ما رجعت من مشاويرك عشان الزيت كله يكون نزل تحت فى الكارتيرة بترفع المقاس وتمسحه بفوطة و تحطه تانى وترفعه ... هتعرف النتيجة الحقيقية .. هو لازم يكون أقل من الشرطة الأخيرة بحاجة بسيطة أو مساوى لها بالمللى ودا أقصى تقدير ... لو زيادة برضه

عايزك تسحب شوية زيت .... أنا قبل كدا سحبت زيت جبت خرطوم من اللى بيعملوا بيه ميزان المياه الرفيع دا وحطيته فى مكان مقاس الزيت وسحبت ببقى ....

شكرا لحضرتك ياباشا وان شاء الله هحاول اسحبة او افك الطبة سنة صغيرة وانزل الشوية الزيادة

المشاركة الأصلية كتبت بواسطة Karim_Monir

مع احترامي للي عملتة انت حاطط نوع زيت غلط وشكلك كمان واخد قياس الزيت غلط
اولا زيت كاسترول ماجنتيك ده للعربيات اللي فوق 100 الف كم او انخفضت كفائتها اقل من 80%
وفي حالة عربيتك 2011 لازم تحط زيت تخليقي بالكامل يعني كاسترول ايدج وليس ماجنتيك او فالفولين 5-40
او شل 5-40 الترا او ليكوي موللي 5-40
فلالزيت اللي انت حطيتة ده هايوسع خلوصات البساتم عندك ويقلل كفائة الموتور مش اقل من 15%
وكة حرام عليك ما تستخسرش فلوس ونزلة ارميه بقي ولا ادية لحد عربيتة قديمة شوية
لان ماجنتيك ده في حبيبات لترميم المواتير المتوسطة الى قديمة
ثانيا انت تحط الكمية المكتوبة في الكتالوج 3.3 ومع الفلتر تحط من 200 الى 300 مللي
فانت هاتحط 3.6 وتدور العربية 3 قايق الى 5 لغاية ما تسخن وبعد كدة تبطل تسيبها 5 دقايق وتطلع المقاس تمسحة كويس بمنديل وبعد كدة تدخله وتشوف العلامة فين ولازم مايكونش ابدا فوق ال full
عشان ده بيسبب تكون رغاوي وبيعمل ضغط كبير على الموتور وممكن تجيب منك جوان

استاذ كريم مع احترامي الشديد لحضرتك اانا يمكن كنت الاول بسأل الناس بدون ما ابحث بحث مظبوط بس بعد كلامك كان لازم ابحث مظبوط لان واضح ان كل الاراء اللي بتتقال على النت فتي وبس

اولا : زيت الماجنتيك زيت تخليقي بالكامل وده بعد اتصال حالا لمهندس الوكالة الرسمية لزيوت كاسترول في السعودية وحولني على ما يسمى بمهندس مختبر وهو فلبيني الجنسية وأكدلي نفس المعلومة وان الزيت طبقا لتصنيف معهد البترول الامريكي مناسب جدا لسيارتي ، كذلك زيت ايدج تخليقي بالكامل ولكنه مناسب اكثر لسيارات السباق .

ثانيا : حضرتك بتقول ان في الكتالوج كمية الزيت 3.3 لتر ومع الفلتر هتزيد 200 او 300 لكن الكتالوج بيقول عكس كده والدليل اهو في صورة من الكتالوج بتاعي بيقول ان الكمية 3.3 مع الفلتر

ثالثا : حضرتك بتقول ان الزيت الماجنتك ده للعربيات اللي فوق 100 الف كيلو وللأسف كلام حضرتك خطا بردة والدليل ان في نفس الصورة اللي فوق على الشمال بيقولك استخدم API SM او أعلي

وطبقا بقى للصورة التالية واللي هي عبارة عن تصنيف المعهد الامريكي للبترول بيقول ان الـ API SN اعلى وافضل من الـ SM وخصوصا للسيارات اللي تاريخ صنعها من 2011 وانت طالع وده بالفعل هو نفس تصنيف الكاسترول مجانتك اللي انا حاطة



ودة لينك المصدر هــنــا تقدر حضرتك تقرا الكلام اللي مكتوب هيشرحلك الفرق بين كل صنف وهيأكدلك ان اختياري صح والحمد لله مع اني في البداية مكنتش قريت الكلام ده واستعنت بخبرة الاستاذ Youssef.Awad مشرف قسم النيسان جزاه الله خيرا

وده لينك تاني بيتكلم عن نفس الموضوع بتوسع اكتر هــــنـــــا
ودي صورة لضهر علبة الزيت بتأكد صحة التصنيف



رابعا : حضرتك بتقولي ان اللزوجة غلط وللأسف بردة كلام حضرتك خطأ لان من واقع الكتالوج والكلام هنا مش مبني على اراء او تجارب شخصية دة مبني على اختبارات تمت الاف المرات على السيارة وما يناسبها من زيوت ولزوجة وفي الاخر حطولنا الانسب

وهتلاحظ ان اول لزوجة موصي بيها في الصورة هي اللي انا حطيتها 5-30



نرجع تاني لكلام مهندس المختبر اللي انا كلمتة واللي شرحلى ان الحبيبات المغناطسيية اللي موجودة في الكاسترول مجنتك بتحافظ على اداء المحرك لأطول فترة ممكن وبتقلل الاحتكاك ما بين اجزاءة في الفترة البسيطة اللي بتدور فيها سيارتك الصبح او فترة توقف طويلة وده لان الجزيئات المغناطيسية دي بتفضل لازقة في اجزاء المحرك وبالتالي بردة على المدى الطويل هتوفر في نسبة الوقود المستهلك وده لانها بتصنف تحت تصنيف زيوت موفرة للطاقة

وده نفس الكلام اللي موجود في الصورة الاولى اسفل الصفحة على انها بتقلل مقدار الوقود الضروري للتغلب على احتكاك اجزاء المحرك

أخيرا

دة لينك صفحة كاسترول ماجنتيك على اليوتيوب هتلاقيه فيه فيديوهات كتيره بيتكلم فيها ناس خبراء بجد عن مواصفات الزيت ولزوجتة وبيعالج مشكلات ايه واية السيارات المناسب ليها

انصح كل الناس انها تشوفه

مـــن هـــنـــا

في النهاية بشكر حضرتك وبشكر كل الناس اللي ردت
وبشكر الاستاذ يوسف مشرف قسم النيسان اللي شجعني على اختياري الحالي
والله ولي التوفيق