السيراتو الشكل الجديد خليجي سعودي ب 134000

**MIVEC.A92** · 04-01-2013 05:49 PM

في معرض في مدينة نصر نزل كذا عربية بس معرفش ينفع اقول اسم المعرض ولا لأ.

العربية نازلة نفس الشكل اللي في الصور اللي في موضوع هنا في القسم بس فيها كاسيت تاتش و تقريبا فيه gps

العربية خليجي سعودي و فئة واحدة بس اللي نازلة و طاسات مش جنوط

**abogharib** · 04-01-2013 06:13 PM

شكرا ياباشا

**archman2020** · 04-01-2013 07:06 PM

والله انا اتصلت النهارده على اكتر من معرض .. بس فيه حاجة غريبة ..
عند سمير ريان والمصرية لقيتها بـ 134 وفي معرض تاني لقيتها ب 131 وكلهم اول فئة طبعا في الاتوماتيك بس فاضية ... ولقيتها بقى عند معرض ب 134 خليجي اول فئة اوتوماتيك بس كماليات سي دي كاسيت تاتش كاميرا ركن ايرباج يعني حاجة تانية وبردوا بنفس التمن ...
رجعت اتاكدت من ريان والمصرية اكدوا على انها بالسعر ده بس من غير المواصفات التانية دي يعني فاضية فمش عارف بقى ايه حكايتهم ... انا كنت بفكر في الريو الحقيقة بس بعد نزول السيراتوا غيرت رايي بس مستني بقى اول حاجة تنزل وكيل لاننا فعلا دلوقتي ممكن نشتري سمك في مية ...
ده غير بقى السعر عالي جدا على انها اول فئة تكون بالسعر ده خاصة والدولار عالي دلوقتي فمستني التوكيل بقى يلموا نفسهم وينزلوها قريب والسعر يتضبط هو كمان

**MIVEC.A92** · 04-01-2013 07:48 PM

يا جماعة بجد اشتري عربية 2013 و مفيهاش abs ازاي ازاااااي ؟!! و كمان ب 134 الف !!

قريبي راح حجزها انهاردا بصراحة قلتله شوف Renault Fluence ب 132 الف و الكاسيت التاتش ركبوا في التوكيل في كل حاجة قالي مش هحتاج abs عشان مش بجري بصراحة معرفتش ارد اقوله ايه قلتله انت بترمي فلوسك في الأرض و وريتو فيديو علي يوتيوب Abs VS No Abs

**Land_Cruiser** · 04-01-2013 08:01 PM

قله الوعى للاسف منتشره بالنسبه لموضوع الامان بالذات . يعنى معظم الناس يهمها الكاسيت يبقى تاتش مثلا او يبقى فى حساسات ركن او بخاخات فى الفوانيس و ما بيفرقش معاها الايرباجز او ال abs مثلا وده اللى بيخللى المستورد يهتم بالكماليات علشان يعرف يبيع و يهمل الأساسيات زى عوامل الامان. ده مش دفاع عن المستورد لكن معظم المشاكل بتبقى جايه منا احنا

**SAMEH_FOUAD** · 04-01-2013 08:25 PM

هههههههه , لو خيرت عميل مصرى مابين فتحة السقف وال Abs هيقولك فتحة السقف طبعا انا يهمنى منظر العربية هو انا كل يوم هحتاج الAbs , منطق غريب بصراحة

**Mohab555** · 04-01-2013 08:31 PM

يا نهار ملوش ملامح !!! 134 الف فى ايه ؟؟؟ اكيد فى حاجة غلط !!! هو فى ايه اصلا علشان نحسبه ب 134 ياجدعان !!! لاول مره هقولها الرينو فلوانس بالمنظر ده و السعر ده تمسحها من السوق و طبعا الفارق فى كل شىء علشان نتكلم بصراحة هيكون فى صالح الفلوانس....
السيراتو اصلا حرام ..

**youssef_u** · 05-01-2013 01:04 AM

لما تنزل وكيل هتبقا ارخص لان المعرض دلوقتي بيدفعك تمن العربيه وتمن النقل من السعودية لهنا ، و خلي الكاست التاش ينفع صاحب العربيه لما يعمل حادثه لا قدر الله .
والله عايزهم يعملوا مواصفات قياسية للامان للعربيات اللي تدخل مصر عالاقل abs و 1 ايرباج.
و افترض انا اشتريتها دلوقتي و طلع فيها عيب صناعه اركنها و اقعد اعيط جنبها ؟
و سؤال بس ،، فيها ايموبلايزر ولا هقعد اعيط مكان ما كنت راكنها؟