عيوب الماتريكس للمشاركة بحلول عملية العيب الاول

**oousaoo** · 23-07-2008 05:14 PM

الموضوع ده خصصته للعيوب الي بتظهر في العربة الماتريكس والحل لها لافادة باقي الاعضاء مالكي العربة الماتريكس

اولا اعرفكم بعربتي ماتريكس اتوماتيك موديل 2005 عاملة حوالي 40 الف كيلو
1-اول عيب ظهر وليس الاخير مسامير تثبيت عجل العربية كل ما تيجي تفك عجلة علشان ترصصها او تصلحها عند بتاع الكاوتش تلاقي صامولة ولا اثنين ياسيدي متعدش تلاقيها تقيلة جدا في الفك تقوم مسايسها وراشش عليها اسبراي الفك او تكون حنين عليها ولكن النتيجة واحدة لفة كمان وتلاقي الجويط اتقطم نصه في الصامولة ونصه الثاني في طمبورة العجل طبعا اول مرة تحصل معايا انزعجت جدا وجريت جاري علي التوكيل ولقيت الموضوع عندهم عادي وبتحصل كتير لكل موديلات الهونداي لان مسامير العجل ليست صلب ولازم تتربط مسدس ربط الصواميل الي موجود بالتوكيل تحت عزم معين هما لوحدهم الي يعرفوه يعني لوعجل نامت علي الطريق المفروض تزحف بالعربية لغاية عندهم علشلن يفكوا فردة الكاوتش ويركبولك الاستبن طبعا انا تعايشت مع هذا الموضوع وبقيت شايل شوية جوايط وصواميل معي علشان كل مايتقطم مسمار اروح اغيره لدرجة اني ساعات كنت امشي بالعجلة مربوطة بصامولتين فقط نسيت اذكر لكم ان ثمن الجويط والصامولة 23 جنية ومصنعية تركيبه 40 جنية بالتوكيل
الحــــــــــل
اخر مازهقت دورت عند بتوع المسامير واكتشفت ان جوايط العجل الخلفي نفس جوايط العربة النصف نقل الدبابة لكن جوايط العجل الامامي مش موجود زيها وطبعا دي دوختني لغاية مالقيت زيها صلب لكن اقصر 2مم بالطول ورحت مغير كل طقم الجوايط ومن يومها قرط يمعلم علي الكاوتش زي ما انت عايز
مستني منكم الردود ومشاركة الاعضاء للاستفادة للكل

**Nile_Storm** · 23-07-2008 07:30 PM

مشاركه اولي متميزه و بالتوفيق
مع اني لست من مالكي الماتركس
لكن استمر بالامام ربنا معاك

**oousaoo** · 23-07-2008 10:06 PM

اشكرك علي مشاركتك والدعوةالجميلة اللهم اميين

**amrtalaat** · 24-07-2008 11:14 AM

العيب دة فى عربيات إثنين من معارفى عندهم ماتريكس برضة .....
وواضح كدة إن الموضوع كبير أو متكرر ولو فعلاً الحل بتاعك عملى يبقى كدة إنت حليت المشكلة لناس كتيرة ...ويبقى جزاك الله خيراً

**Ahmed Samy** · 24-07-2008 03:23 PM

حاجة جميلة و مفيدة في ناس قرايبي كانوا هايشتروا ماتريكس و اتقاللهم على الحوار ده برضه ..........

طب ممكن تكمل جميلك وتقوللنا اللي قدام صلب لاقيتهم فين ؟؟؟

**bassam nagy** · 24-07-2008 05:22 PM

الموضوع دة بيحصل فى عربيات كتيير واحد صحبى معاة لانوس وعملت معاة كدة برضوا
وربنا يسترها

**megane_man** · 24-07-2008 06:49 PM

انت ممكن تروح عند اي خراط ومعاك الجويط ويعملك واحد صلب انا كنت عملتهم للفولفو من فترة وكان بيصرف 15 جنيه بالصمولة

**oousaoo** · 24-07-2008 08:42 PM

اشكركم علي مروركم الجميل
انصح الاعضاء بعدم استخدام مسمار مصنع يجب احضار جويط مستورد مكتوب علية الاسترس بتاعه لايقل عن 8.8 ده بيكون مختبر قبل دخوله مصر ثانيا الجويط تلاقوه عند محلات المسامير المتخصصة حيث انهم يعلمون بمشكلة الماتريكس وابتدوا يستوردوا مسمارها الامامي اما الخلفي متوفرعندهم كما ذكرت وانصح الاعضاء اثناء الشراء لازم بكون معهاه المسمار الاصلي للعربة حتي لوحكمت يشتري واحد من التوكيل حتي يتم القياس والمقارنة علية عند محلات المسامير وثمنه عند محلات المسامير الامامي والخلفي حوالي 4.5

**bishoo33** · 26-07-2008 02:52 AM

أنا لسه عامل rotation للعجل منذ حوالى شهر ولم يظهر هذا العيب معى
ولكن شكرا على الملحوظه الجميله جدا عشان الواحد يبقى حريص وهو بيغير الكاوتش

**Ah.Farid** · 29-07-2008 02:30 PM

معلومة محترمة جدا ولازم الواحد يحرص وهوا بيفك العجلة

بس انا امنت موضوع العجل انى اشتريت كمبروسور صغير من كارفور ب 40 جم بيزود وينفخ العجل لغاية اقرب بتاع كاوتس وبيشتغل على مخرج الكهرباء