عايز اقتراحات لأجازة نص السنة

**MohssenRashed** · 06-01-2013 12:02 PM

السلام عليكم.

لو سمحتو عايز اقتراحات لأجازة نص السنة مع مراتي بفكر في الاتي:

الأقصر و اسوان
شرم الشيخ
الغردقة
تركيا
اي حاجة تانية

و لو حد عنده عروض كويسة لشركات في اسكندرية ياريت يظبطني.

**ahmed4000** · 06-01-2013 01:59 PM

تركيا ارخص حاجة بس اعتقد الجو حيبقى بارد
ولو عايز تساعد البلد وتستمتع فى نفس الوقت يبقى فكر فى شرم او الغردقة او العين السخنة
الاقصر بيبقى فى فنادق عائمة بس الحقيقة معرفش الاسعار كام

**Y a r i s** · 06-01-2013 02:12 PM

اقولك على حاجة
بص ياسيدي .... اي رحلة من دول هتتكلف لها كام باكو ... وكده كده هتدفع ايه رايك لو تطلع رحلة للكعبة ( عمرة ) تجدد فيها نشاطك وترجع فيها شبابك ... الا اذا رحت كده قبل كده القرار في الاول والاخير ليك مجرد اقتراح ... وتحياتي

**MoH.SaLaDiN** · 07-01-2013 04:51 AM

والله تركيا بلد رائعة جدا ولو فى امكانياتك تبقى ضرورى تروحها عشان فعلا زيارتها ممتعة جدا بس انصحك بلاش تتطلع تركيا فى الشتاء خالص الجو ثلج هناك و مش حتعرف تروح حتت كتير و كمان اللبس الشتوى اللى عندنا مينفعش خالص هناك افضل وقت تروحوا فيها من شهر 4 الى شهر 9 اما بالنسبة لاجازة نصف السنة فا ممكن تجرب حاجة جديدة ناس صحابى لسة جايين من دهب نزلوا فى فندق رخيص جدا واعدوا 5 ايام هناك اخدوا كورس غطس هناك فى سنتر متخصص وكانت تجربة جامدة جدا (ده طبعا كلامهم) وكمان بياخدوا شهادة دولية بتسمح لهم انهم يغطسوا فى اى مكان بدون مدرب و الموضوع كلف تقريبا 1700 للفرد شامل الاقامة والغطس وايجار المعدات وماكينة التصوير وكمان الشهادة الدولية بس الاكل عليك بتجيبوا من البلد وكمان اخر يوم طلعوا سفارى
ولو فى اي استفسار انا فى الخدمة