الموضوع: ثرموستات الكوعة... المفترى عليه

المشاركة الأصلية كتبت بواسطة svneleven

طب فيه سؤال صغير بما أننا بنتكلم علي التبريد؟ المفروض لما أجي أزود المياه أزود في القربة و الا الرادياتير نفسه وتكون العربية باردة و الا سخنة لأن مرة مهندس في توكيل فيات قالي عشان أزود مياه لازم العربية تكون دايرة و المروحة شغالة كمان. احتمال يكون الكلام ده ليه علاقة بمستوي المياه. و كمان ثرموستات الكوعة لما تقفل أو تفتح مش ده هيأثر علي مستوي المياه؟ و السؤال الأخير مستوي المياه و العربية دايرة أعلي و الا أقل من لو العربية مش دايرة؟

تشغيل الموتور أثناء تزويد المية له علاقة أساسا بدرجة حرارة الموتور

فالموتور لو بارد (يعني لو ما اشتغلش لمدة 3 ساعات أو أكثر) .. في الحالة دي ممكن تزود مية من غير ما تشغل العربية

إنما لو الموتور سخن، فالمفروض ما نزودش المية إلا والموتور شغال، علشان يحصل خلط كويس للمية الباردة مع المية السخنة قبل ما تدخل عند السلندرات


طيب ليه بنعمل كده؟؟

عشان جسم الموتور معمول من مواد (فِلِزّات) غير مرنة.. وأشهرها "الحديد الزهر" و"الألومنيوم"


طيب إيه الفكرة؟؟؟

المعروف إن المعادن بتتمدد وتنكمش مع تغير الحرارة ... والمشكلة إن مش كل المعادن بتتمدد زي بعض، وكمان مش بنفس السرعة


الفكرة إنك لما تيجي تبرد "الفلز" غير المرن زي "الحديد الزهر"، ممكن بسهولة جدا يتكسر لإنه ما قدرش يستجيب لتغير الحرارة بالسرعة الكافية

هي دي كل المشكلة

لو الموتور شغال وسخن، هتزود المية الباردة في الرادياتير (أو القربة) وبعدين المية تدخل على طلمبة المية اللي هتخلطها بالمية السخنة الموجودة أصلا وبعدين تبعتها على البلوك (أحيانا الطلمبة بتبقى جوه البلوك)

يعني المية مش هتدخل بحرارتها الباردة مباشرة على أجزاء ساخنة.. دي أول نقطة


تاني نقطة ... لو الموتور بارد... المفروض إن الثرموستات هيقفل على المية في الرادياتير ، ولما ييجي يفتح بعد ما الموتور سخن.. هيدخل مية باردة بردو!!! بس ما ننساش عملية الخلط عند الطلمبة



مش عارف بصراحة إيه فكرة المهندس بتاع الصيانة اللي قاللك إن المروحة لازم تبقى شغالة!!! المروحة أصلا مالهاش علاقة بطلمبة المية اللي هي أصلا شغالة طول ما الموتور داير




وحتى في المواتير اللي موتورها بالطول والمروحة متركبة على أكس الطلمبة... غالبا كان بيبقى عليها كلتش بيفصل حركة المروحة ساعة اللزوم.



خلي بالك.. لو مستوى الميه ناقص جدا... تزويد المية لازم يبقى بالراحة.. وما ينفعش أزود والعربية سخنة جدا... لازم أستناها (أطفيها) لحد ما تهدى وبعدين أبقى أشغل وأزود




بالنسبة لعلاقة مستوى المية بفتح أو قفل الثرموستات... المفروض إن مافيش علاقة مباشرة... إنما العلاقة بتيجي لما المية تسخن وتتمدد (زي أي مادة في الدنيا) وكمان الضغط يزيد، فغطاء الرادياتير بيطلع الضغط الزياد ومعاه بخار المية اللي جوه الدايرة.. ويروح كل ده في القربة، ولما العربية تبرد.. الضغط بيقل قوي في الدايرة ويبدأ يسحب المية اللي طلعت قبل كده من القربة تاني




فالطبيعي اللي هتشوفه والعربية باردة إن المية مستواها عالي في الرادياتير ومنخفض في القربة... والعكس لما العربية تسخن




...

المشاركة الأصلية كتبت بواسطة user0

طبعا أنا أسف جدا على التأخير في الرد ...أنا لسة موادثش العربية التوكيل عشان كنت محتاجها أوي الشهر ده ...و طبعا طول المدة دي و فل حار ده مش ماشي بل تكيف عشان ماتسخانش لكن الجديد بقى من يومين كدة وأنا وقف فل زحمة راجع من مشوار طويل العربية سخنت من غير ماشغالت التكيف فاركنت على جنب و بطلت العربية بتاع ربع ساعة و فتحت الكبوت لقيت المية مزبوط و كل حاجة شكلها طبيعي ..ماشيت بعدها عادي العربية ماسخنتش لحد مروحت ...إمبارح وأنا باخسلها في بنزينا جنب البيت يعني مش مشاور طويل ..سبتلهوم المفتاح عشان يوزبطوها غسيل من جوا ..لقيت الحمير سايبين العربية دايرة بالها نص ساعة و بسيط لقيت برضو العربية سخنة ..يعني دلوقتي العربية بقت بتسخان لما بتبقى دايرة و وقفة في ماكنها لكن بمجرد لما أتحرك بها الحرارة بتنزل تاني ...ممكن كدة يبقى الترموستات هو المشكلة ؟؟ يعني التكيف ممكن ميبقاش ليه علاقة ؟؟
وأنا كدة كدة حوديها التوكيل الاسبوع الجي إنشاء الله عشان العربية تخبطت من ورا و دعامات الشنطة إتعوجت و كان في خبطة فل باب قديمة حعملها بلمرة ..بس عايز لما أروح أبقى فاهم عشان محدش يشتغالني هناك ....

الجملة اللي بالأزرق فوق دي فيها المفيد

كده التكييف ملوش علاقة، ونشوف بقى السبب من إيه

من كلامك ... لما العربية بتقف الهوا مش بيعدي بالكمية الكافية على الرادياتير عشان يبرده، ومع حركة العربية الهوا بيبدأ يبرد والمشكلة تخلص..

عشان كده .. أنا شايف إن المشكلة أساسا ممكن تبقى جاية من حاجة من دول:

1- مروحة الرادياتير ممكن ما تكونش شغالة مظبوط... ودي محتاجة متابعة لما العربية تسخن وتشوف المروحة شغالة ولا لأ

ممكن ببساطة تكون فيشة أو توصيلة كهربا مش متوصلة صح


2- لمبة الحرارة بتنور بدري... يعني ممكن الموتور يكون سخن فوق المعتاد بدرجة بسيطة .. بس اللمبة بتنور مع أي زيادة

لما تروح التوكيل لازم تكون جاي من مشوار طويل عشان المشكلة تظهر معاك


ثرموستات الكوعة مافيهوش مشكلة مادام درجة الحرارة بتنزل مع حركة العربية.