الاسباب الشائعة والمتكررة لرعشة او رجة الموتور وتوقف الدوارة

**gomha** · 08-01-2013 01:32 AM

هذا الموضوع بناء على ما قابلت من مشاكل خلال 15 سنة خبرة مع السيارات واطلب ان يشارك الجميعع بخبرتة

اذا تم غسل السيارة والموتور ربما يوجد بعض الماء موجود فى فتحة البوجية ودة يخلية لا يعمل الحل تجفيف فتحة البوجية بالهواء المضغوط

يوجد سلك من اسلاك البواجى المتصلة مع الكويل غير سليم للكشف علية ندور السيارة ونفك واحد ونقربة من البوجية اذا لقينا شرر كهربائى يعنى السلك دة سليم واذا كان غير ذللك يعنى السلك دة محتاج تغير لابد من تغير كل الاسلاك لان حرارة الموتور اثرت على الاسلاك او انها نوعية غير جيدة او عمرك ما غيرتها

اذا كانت الرجة تشعر بيها وانت على السلانسية يعنى بدون ما تدوس بنزين لكن لما تمشى بيها وتدوس بنزين تختفى يعنى وربما واحد من كراسى الماكينة الكاوتشة بايظة الحل تغير الكرسى دة فى اسرع وقت ممكن
وغالبا بيكون الكرسى الكبير ودة اغلى واحد

-البوجى نفسة مصدى ومش شغال نهائبا او ركبت نوعية تعبانة عشان الميزانية مغرم

فلتر البنزين مسدود ومحتاج يتغير طبيعى جدا وبتحصل كتير

طلمبة البنزين لا تعمل بصورة جيدة والعيب دة يظهر دايما فى بداية التشغيل او مع السرعة العالية

بنزين مخلوط بالماء او بالديزل والعيب دة تنفرد بية مصر حسبى الله ونعم الوكيل واذا حصل دة يعنى ادمرت بخاخات البنزين داخل الموتور وممكن توصل الى عمرة كاملة ودة بيظهر مع البداية الدوارة والسرعة المنخفضة والعالية

لسبب ما ضغطة السلانسية قلت بالتالى قلت نسبة البنزين فى بداية التشغيل مما يودى الى رجة وتوقف الموتور ولا يدور الا لما تدوس بنزين مع الدوارة او بعد عدة محاولات للدوارة جرب يمكن يكون السبب دة دوس شوية

نوعية بنزين غير مناسبة للسيارة حصلت مع السوبارو خليك مع 95 احسن

فلتر الهواء يؤدى ايضا الى رعشة وتوقف فى بداية الدوارة افتحة ونظفة بالهواء المضغوط او تغيرة يكون افضل بس التنظيف الاول ونشوف يوجد تحسن او لا بلاش ندفع فلوس بدون ما نتاكد ان دى المشكلة

منظم الهواء موجود بعد الفلتر اذا امتنع تماما عن العمل لن تتم الدوارة ابدا لان لايوجد هواء رايح الماكينة اما اذا كان غير منتظم ويحتاج تغير سوف يؤدى فعلا الى رجة وتوقف للدوارة طيب نعرف اذاى انة دى هى المشكلة فى الحقيقة صعب جدا بدون كشف كومبيوتر فى التوكيل او فى مركز صيانة محترم لاتروح لكهربائى عشان المشكلة دى مش حايعرف وفر فلوسك هنا كمان

يوجد سنسور حساس الكامة ودة موجود فوق الماكينة تقريبا تحت او امام فلتر الهواء ودة لايسبب رجة ولكن تتوقف الماكينة عند تخفيض السرعة مع السرعة المنخفضة او فى المنحنيات ودايما تحصل عند الاشارات
غير السنسور فى التوكيل احسن

**S O P H O S** · 08-01-2013 02:23 AM

رائع
جزاك الله خيرا ..

**Magdyahassan** · 08-01-2013 02:32 AM

جزاك الله خيرا على هذه المعلومات القيمة

**dr.hazem** · 08-01-2013 04:24 AM

جزاك الله خيرا....
تحياتي

Sent from my SE Arc S using Forum Runner

**ahmed_h_g** · 08-01-2013 04:29 AM

الف شكر على الأفادة

**Ahmed Amin** · 08-01-2013 05:21 AM

ما شاء الله عليك..
موضوع كامل متكامل والكمال لله وحدة.

بس انت بجد غطيت كل النقط اللي كانت في بالي قبل ما أدخل أقرأ الموضوع وزودت عليها وبالصور كمان.
جزاك الله خيراً يا أخي.