استشارة لاهل الخبرة فى تسعير سيارة اوبترا 2008
السلام عليكم ارجو من السادة الاعضاء إفادتى فى هذا الموضوع ولكم جزيل الشكر
بإختصار العربية دى تخليص حق يعنى مضطر اخدها بس عاوز اعرف هى تعل كام بالظبط عشان مايتنصبش عليا؟
اوبترا 2008 مانيوال لون ابيض العربية فبريكة الدواخل والخوارج لم ترش اى جزء نهائئ
بس فيها شوية مشاكل
العداد 185000كيلو متروالماتور صوته عالى شوية واتغير قبل كدا جوان وش سلندر بس الماتور ماتفكش قبل كدا والسحب بتاع العربية جيد؛ وراكب عليها 4جنوط بس بصراحة جامدين ولكن العفشة متبهدلة بسبب الجنوط يعنى فيها تخبيط جامد فى المطبات والعربية بتحدف شمال شوية؛ وفى خبطة صغيرة فى مقدمة الرفرف الايمن وحكة طويلة فى الباب الشمال الامامى والباور تقيل شويتين والتكييف محتاج شحن تقريبا وفى زرار بتاع التكييف فى التابلوه بيعلق احيانا‘ بإختصار العربية شكلها الخارجى جميل لكن من الداخل صاحبها مش مهتم بيها وبيسافر بيها كتير مبهدلها شويتين .
المطلوب :
اولا العربية تعمل كام بالظبط وهل المشاكل الموجودة فيها هتحتاج مصاريف كتير وممكن تتصلح بسهولة ولا هتتعبنى معاها والماتور عامل 185000كيلو دا عادى ولا لأ ؟
ثانيا العربية عليها حظر بيع للبنك وعليها اقساط بقيمة 25 الف جنيه وصاحبها بيقول لودفعتهم مرة واحدة هيتشال منه الفوائد وهدفعهم 18 الف جنيه فقط . هل دا صحيح .وثمن العربية بيتحسب إزاى لو فى اقساط متبقية على العربية يعنى إزاى بتتخصم الاقساط المتبقية ؟
وهتترخص إزاى فى المرور وايه اللى لازم اعمله عشان البيع يكون مظبوط
وآسف على الاطالة وياريت اللى عنده معلومات يفيدنى فى الموضوع دا
وشكرا جزيلا