الموضوع: جي حي وصلت الحمد لله وتقييمي المبدئي

في البداية بعتذر عن نشر الموضوع مرة تاني عشان أتنشر أول مرة بأسم غربيب وبأرجو من الإدارة حذف الموضوغ الأول


الحمد لله أخيراً أستلمت العربية أمبارح بعد شهر بدون عربية طلع فيه عيني :b4_444:
في البداية يا جماعة أحب أقول أننا أصحاب العربيات في نعمة والحمد لله والله مع أني ربنا قدر الواحد أنه يروح ويجي في تاكسيات ومع ذلك طلع روحي.
كفاية سائقين التاكسي الله يكون في عونهم بس الواحد شاف منهم العجب وكل واحد ليه شخصية ممكن تعمل عليها فيلم واضح أن زحمة القاهرة مأثرة عليهم وتاني أقول ربنا يكون في عونهم.

نخش في الموضوع.

تقييمي المبدأي للعربية هو كالأتي:

الشكل الخارجي:
مع أن مفيش تغيير في شكل العربية الأساسي من ساعة ما نزلت لكن يظل شكلها ثوري - رياضي - شبابي وشيك جداً خاصة بعد تعديل شكل الفوانيس ورجوع الأسبويلر للسيارة.

المرايات:
ذات طبيعة خاصة وعملت ليا مشكلة أول يوم عشان مش متعود عليها لكن تاني يوم أبتدت المشكلة تروح وان شاء الله مع الوقت تروح خالص.
الرؤية في المراية الخلفية مش كويسة نظراً لإرتفاع العربية من الخلف وزاوية الزجاج الحادة لكن تشوف برضه كويس اللي وراك وبيكملها الباركنج سنسور اللي من غيرها مش هتعرف تركن بالمرايا بس تقريباُ.

الأبواب:
نظراً ان كان معايا فيرنا (ورقة) فأبواب الجين تقيله سواء من حيث وزنها أو قفلها ومن حيث الوزن فدا يرجع لحد علمي أن فيها بار صلب داخلي للحماية علي الأقل كان موجود زمان بس في المجمل الباب كدا حاجه محترمة يفكرك بالعربيات الألماني بس بيحتاج قوة شوية عشان يتقفل يعني ممكن طفل صغير ميعرفش يقفله.

الشنطة:
حجمها معقول بس مش كبير وأن كان موضوع طي الكراسي دا مكن يخليها بحر.

الصالون الداخلي والخامات:
مين اللي قال علي الخامات الداخلية فقيرة؟؟
هو اللي قال كدا يا سمع وخلاص يا بيقارنها بالأوروبي مثلاً أن شايف أن الخامات الداخلية جيدة جداً لا تقارن بالأوربي أه من حيث الجودة بس برده أحسن من الكوري بكتيير.
الكراسي مريحة جداً جداً والأسفنج طري وبيعمل ما المطبات زي ما يكون فيه نوابض جواه علي خفيف والقاعده في كرسي السواق مريحة وثابتة مع المنحنيات.
القاعدة ورا هتبقا كويسة لو أنت مش من نوع اللي بيحب يرجع الكرسي للأخر لو مرجعه شوية كويسه هيبقي اللي وراك برضه قاعد كويس..أنا طولي 180 ومرجعه شويه وقاعد مرتاح ولما ركبت ورا كانت القاعدة مش مزنوقة.

الكماليات

-مسند اليد...أوبشن مريح وخاصة أنه عالي فبتريح عليه أيدك من غير ما توطي.
- الأزاز والمريات الكهربا مفيهمش مشاكل وأزاز السواق بيفتح من لمسة واحده.
- أماكن التخزين كويسه مع أن أسوء حاجه أن درج التابلوه صغير شوية لكن بيعوضه درج المسند ودا عميق جدا.
- لذيذ فكره أن يبقي فيه حامل أكواب خلفي إلي جانب الحامل الأمامي.
- كمبوتر الرحلات مفيد وبيقيس متوسط أستهلاك الوقود - المسافة المتبقية بالوقود المتبقي - زمن الرحلة من ساعة تشغيل المحرك - ساعة - ترب 1.
- التحكم في شدة أضاءة العدادات ومستوي أضاءة المصابيح الأمامية برضه أوبشن حلو.
- الملتي فنكشن جميل وزرايره لطيفة مع أني كنت فاكر أنها بايخة.
- الكاسيت والنظام الصوتي جيد جداً مش هتحتاج تضيف أي حاجه إلا لو كنت من هواة البيز العالي قوي.
- الفوجات الأمامية ممتازة من حيث الأضاءة ومن حيث أنك تنور لنفسك من غير ما تدايق اللي جاي في وشك.
- الأنذار صوته عالي ومزعج (أشتغل بالصدفة غلط) لكن مدي المفتاح قليل وفتح الشنطة من الريموت جميل.

نخش بقا في المهم:

الفرامل:
أنا سقت عربية abs قبل كدا ففاهم الفرق بين الفرامل العادية وال abs وعشان كانت معايا فيرنا فالفرق كان واضح بالنسبة ليا وهو.
الفيرنا فراملها ضعيفة وأنا كنت بتغلب علي الموضوع بأني ممورش وأنا بفرمل وكمان مبكبسش علي الفرامل مرة واحدة...يعني بعمل سيموليشن لل abs.
فرامل الجين 2 معايا لحد دلوقت كويسه جداً الحمد لله الفرق أن الفرامل العادية لمسه صغيرة بتهدي العربية وممكن توقفها في الجين مشوار الفرامل طويل شوية...لو عايز تهدي مش محتاج تدوس جامد والعربية هتهدي لكن في حالة الوقوف مرة واحدة لازم تدوس بزمة شوية.
أن جربت ال abs عشان أشوفه شغال ولا لأ...صوته مش عالي...قوي...وقف العربية في مسافة كويسه جداً ومن غير أي زحف.

الموتور:
من زمان وأنا بحب أسمع صوت العربيات وهي بتدور.
وكنت أحكم علي العربية أنها كويسه ولا لأ من صوت تدوير الموتور.
الجين 2 أنا بعشق صوت تدوير موتورها..ماشاء الله لا قوة إلا بالله لحن.
الموتور تحس أن بيزئر وأنا بتدوس بنزين زئير مكتوم..ودا معناه أن عزله عن داخل العربية جيد جداً.
دواسة البنزين بتستجيب من أقل دوسة...أو بالأصح لمسه ودا كان أول يوم مخليني أكبس بنزين زيادة عن المطلوب عشان لسه مش متعود عليها.
أنا طبعاً في فترة ال 1000 كيلو الأولي فمش عارف أحكم عليه قوي بس أنطباعي الأولي أنه هايل ودا بشهادة الجميع.

الفتيس
مفيش فيه أي مشكلة بالنسبة ليا...ناعم وسلس في التغيير بين النقلات لدرجة أنك لو مش باصص علي ال rpm ومشغل الكاسيت مش هتعرف هو بينقل أمتي

أستهلاك البنزين:
طبعا مش هقدر أقيمه من يومين بس لسه مش شايف موضوع البلاعة اللي الناس بتحكي عليه وأرجو من الله أني مشفوش

العفشة:
برضه مش شايف العفشة الحجر اللي الناس بتحكي عنها العفشة مش ناعمة قوي عشان رياضية بس برضه مش ناشفة نشوفيه تدايق خالص ومفيش بيها دبدة علي الأقل وهي جديدة

دا أنطباع تجربة يومين وكلها أنطباعات أولية مش نهائية بس في المجمل أن شايف أن ربنا الحمد لله وفقني في الأختيار وحطيت فلوسي في المكان الصح.

وبقول لكل اللي عايز يشتري العربية وخايف أني كنت زيه في الأول لكن بعد ما جبتها شايف أن متعة العربية تفوق أي خوف منها...كفاية أني حاسس فعلاً أني راكب عربية مميزة مش مرطرطة ودلوقت عرفت ليه اللي أشتروا قبلي بيقولوا لو هنغير بورتون هنغير للألماني وبس.

أرجو أن يكون تقييمي عجبكم وأن شاء الله بعد ال1000 الأولي ما تخلص وأخد حريتي مع العربية في السواقة هعمل تقرير نهائي وربنا يسهل يكون مصور أن شاء الله

تحياتي