الموضوع: تعالو نفكر مع بعض نطورها "نبدأ بالاداره العامه للمرور"

المشاركة الأصلية كتبت بواسطة mem

موضوع رائع بجد
تسلم ايدك اخى العزيز
وياريت كلنا نكون ايجابيين ونحاول نصلح ونطور
وللاسف المصرى فى اى مكان ملتزم الا فى بلده
ليه لان القانون يطبق على الجميع وصارم ما فيش هزار ولا محسوبيه
لكن هنا حدث ولا حرج
فلو القانون طبق على الجميع وبصرامه المواطن والموظف الحال صدقنى هيتعدل فى كل البلد
واشكرك مره اخرى على الموضوع الرائع والهادف
وان شاء الله مصرنا الغاليه للاحسن والافضل

والله هو الموضوع انى شايف ان الحلول بسيطه ولو اخدنا جزء جزء من البلد وطورناه من a to z بالشكل اللى يناسب طباعنا و مطالبنا حتتحل كل المشاكل وباقل التكاليف وفى فترات مش طويله
وبصراحه اكتر الواحد بيدخل منتدى الشارع المصرى بحس ان مشاكل مصر كلها متمثله فمينن يحكم ومين صح ومين غلط فقولت ممكن نتكلم بشكل عملى اكتر ونشوف هل الحلول لمشاكلنا اليوميه سهله وممكن نحس التغيير على طول ولا الموضوع صعب

----------------------------------------------------------------

نكمل الموضوع بس الاول نلخص النقطتين اللى اتكلمنا فيهم الاول اللى هم
1-نعمل بارك محترم ومخصص فيه مكان لكل عربيه واللى يخالف يتغرم .
2-نلغى الطوابير ونتعامل بشكل محترم بوجود استراحه وشخص مسؤل عن توزيع المواطنين حسب حاجاتهم اول لما يدخلوا ونطبق نظام الرقم زى البنوك .
ده اللى قولناه قبل كده نيجى بقى لجزء مهم وهو اصدار رخص القياده ليه نسمح بوجود رشوه فى الموضوع خصوصا فيما يسمى باختبار الاشارات احنا نخللى الموضوع ابسط ازاى بدل ما الشخص اللى واقف بيمتحن يبقى واقف جنب المواطن لا احنا ندى المواطن ورقه فىها شويه الاسئله اللى المفروض يجاوب عليها ويقعد فى مكان مخصص للاختبار ويكون المكان مراقب بالكاميرات فاللى يتقفش بيغش وهو عارف انه متراقب حيتسجل ده بالصوره وبكل هدوء يروح الظابط بكل هدوء يقوله انت اتصورت معانا وانت بلا فخر بتغش وتم الغاء امتحانك ولو حابب تشوف نفسك اتفضل علشان ميبقاش فى حجه وممكن تيجى تمتحن تانى بعد مده محدده ولو اتكرر ده تانى يتمنع لمده طويله من انه ياخد الرخصه وطبعا الامتحان النظرى ده بيكون له كتاب بيشرح قواعد السواقه ومبادئها والقوانين المرور المصريه ويتباع فى السوق فيحقق دخل برضه للاداره العامه للمرور والامتحان طبعا فى منه نماذج كتييييييير علشان تتغير كل شويه طيب ده النظرى
نتكلم على العملى موضوع الاختبار بتاع المرور بتاع حرف s والكلام ده بصراحه انا مش مقتنع بيه وفيه رشاوى وبلاوى منيله ومبعبرش عن التمكن من السواقه او احترام قواعد المرور او اى حاجه وفى نفس الوقت مش هينفع نطبق اللى بيتعمل بره ان موظف او ظابط يطلع مع المواطن من المرور ويمشى فى الشارع خصوصا ان اغلب المصريين بيطلعوا الرخصه وبعدين يتعلموا السواقه فيا ريت لو حد عنده اقتراح نسيطر بيه على الاختبار العملى ونمنع الرشوه فيه يبقى تمام قوى .
وبرضه نفكر فى افكار تانيه ونقولها بعد شويه .

المشاركة الأصلية كتبت بواسطة Land_Cruiser

لابد من إلغاء الاستثناءات و الواسطه نهائيا علشان البلد دى مش المرور بس حالهم يتعدل يعنى نشر العدل. فى ناس كتير بتخالف كنوع من التقليد

هى الفكره انك تعمل نظام متسبش فيه مجال لضعاف النفوس ان يكون عندهم فرصه انه ياخد رشوه او يعمل حاجه غلط لانه طالما عارف ان انه حيتمسك وحيتعاقب عمره ما حايغلط بالظبط زى الوضع بره تحس ان البلد كلها خصوصا الاماكن العامه متراقبه بالكاميرات بحيث حتى لو محدش بيراقب الكاميرات بس احساسك ان حد شايفك او ان لو اتبلغ عنك حيكون من السهل يتثبت عليك التهمه عمرنا محنلاقى حد بيغلط

المشاركة الأصلية كتبت بواسطة EngAhmedSayed

الصراحه
انا احيك على الموضوع قلى كل واحد مصرى بيحلم بيه
الموضوع قلى انتا بتحكى فيه
موجود عندنا هنا فى مصر بس مش بالشكل ده قوى و عجبنى جدااااااا
هقول بنسبة 70 %
انا روحت اطلع مستخرج من شهادة تادية الخدمه العسكريه
من السجلات العسكريه قلى موجوده فى مدينة نصر قلى عن الحديقه الدوليه
نظام فوق الممتاز
اولا بتدخل على الباب
بتلاقى عسكرى بيقولك نعم عاوز تعمل ايه
انا قالتالو عاوز اطلع مستخرج من شهادة الجيش
قالى معاك بطاقه اه معايا و معاك صوره منها قالتالو لالالا
قالى ادخل يمين صورها الاول دخلت صورتها
قالى معاك صورة من شهادة الجيش اه
قلى اتفضل ادخل
دخلت لقيت عسكرى على الباب قالى ورقك اديتو الصورتين قلى ادفع جنيه دفعت كتبلى استماره وراح مدبس الورق كله فى بعضه
قلى ادخل عند الموظف ده سجل نفسك انا مكنتش فاهم شغلته ايه
اتارى الراجل ده بياخد منك الورق و يسجلك عنده على نظام كمبيوتر بيقولك اتفضل ارتاح و انتظر ا تسمع اسمك السيستم قلى هو النت ورك بيبعت على شباك المسئول و تلاقى اسمك بينادى عليه و يقولك شباك رقم كذا
تقوم تروح تسلم الورق يقولك اتفضل ارتاح بعديها بشويه اسمك بيتنادى عليه تانى شباك رقم كذا تروح يقولك ادفع المصاريف المقررة
يقولك اتفضل اتنادى عليا شباك رقم كذا اروح استلم
قلى عجيبنى ايه اولا انتا بتروح توقف قدام الشباك متزيدش عن 3 دقايق و الله العظيم انتظار الاسم هو ده قلى بياخد وقت حوالى 10 او 15 دقيقه على حسب دورك و فى الحاله دى انتا مبتقدرش تتكلم لانى ده دووووور مش كوسه و نظام و ترتيب انا عن نفسى خد بتاع حوالى 45 دقيقه لما خلصت عندك الكافتريا تشرب فيها حاجه المكان انا روحته فى الصيف كان مكيف الاستراحه كبيره و الكراسى كتيره متلاقيش حد يزوقك فى عندك شكوى او استفسار هتلاقى رئيس المكان قاعد فى مكتب مفتوح فى الصاله تروحلو على طول مش لسه هتاخد الاذن و الكلام ده بس لو لقيت حد قبلك الواجب انتظر انا عن نفسى رحتلو و سلمت عليه و شكرته على النظام الموجود و قالتالو جزاكم الله كل خير
و الله كنت بدعيلو على قلى عمل النظام جميل
احنا شعب لابد من توجيه
وجه الشعب صح هتلاقيه معاك لانى مش عاوزين وجع قلب
دى كانت تجربتى و حبيت انى انقله ليكم بخصوص الموضوع ده
انتا ايه رايك نحاول نلم نفسينا و نخاطب المسئول عن المرور فى جمهورية مصر و نحاول ننقل صورة السجلات العسكريه
يعنى انا مش عارف هنوصلهالو ازاى يروح يشوفه بنفسه و له يخاطبهم مش عارف بس نعمل قلى علينا و انا معاك ياسيدى مش كلام
لابد من توجيه الناس لصح
لانى كان نفسى النظام ده يقدم فى اى قطاع خدمى
تحب تبداء امتا

ربك المستعان

شكرا ليك جدا على مشاركتك وفعلا هو ده اللى بتكلم عنه اننا نحط نظام ويكون فيه رقابه وسهل تاخد حقك فيه .وعلى فكره اللى مخللى القطاع العسكرى متميز جدا سواء فى الاداء او التعامل مع الاشخاص هو وجود النظام ووجود عقاب رادع للمخطأ وده اللى نفسنا يتوجد فى كل المؤسسات المدنيه .
وياريت فعلا نقدر ننقل الصوره للمسؤل بس حد يقولنا على الطريقه للوصول ليه خصوصا ان تطبيق اى نظام مبيحتجش تكاليف كتيره ولا وقت كبير بس بيحتاج خطه ووضع احتمالات لكل الاوضاع علشان يقدر يتلاشاها .بس السؤال هل لو المسؤل سمع الكلام ده حيطبقه ولا لا
ويا ريت لوحد يقدر يوصلنا للمسؤل او ينقل الصوره ليه يبقا تمام اوى
اه وبالنسبه للانتظار على فكره بره برضه ممكن تنتظر وقت برضه علشان الدور بس طالما بتنتظر فى مكان محترم ومحدش بيهين ادميتك يبقى عادى .
وربنا يكرمنا كده وفى وقت قريب نشوف المؤسسات المدنيه كلها زى السجلات العسكريه .

المشاركة الأصلية كتبت بواسطة AlGazar2

عشان الدولة تطور و هناخد اداره المرور مثال لكده

لازم الموظفين الى ملهومش اى 30 لازمه يمشوا و يتجاب ناس عندها ذوق و احترام للتعامل مع الناس الى رايحالهم - لان احنا مش بنخليهم يعملوا حاجة مخصوصه - بيشتغلوا و بيقبضوا من فلوس الضرايب الى بندفعها فلازم الخدمه تتقدم صح

يبقى فى نظام - كل حاجة تخلص من مكان واحد مش لازم الواحد يلف المرور كله عشان يطلع ورقة - بدل ميبقى فى موظف واحد لا يبقى فى 10 مثلا بيقدموا كل حاجة فى مكان واحد - مش واحد للاستعلام و واحد يستلم لوح مثلا و واحد يسلم و واحد يعمل ادخال بيانات كمبيوتر - ياريتهم بيعرفوا يشتغلوا بيه - و هكذا لا يبقى فى موظف واحد متدرب كويس بيعمل كل ده زى النظام فى كل دول العالم و يبقى فى كل اداره مرور عدد موظفين كفايه على حسب التعداد السكانى فى المنطقة مش اداره مرور فيها مثلا 100 الف عربيه يبقى فيها 10 موظفين و اداره فيها الفين عربيه فيها 15 موظف يبقى اعداد الموظفين متناسبه مع الناس الى بيتقدملها الخدمة - طبعا لازم بارك واسع و كبير و فيه اماكن مخصصه لسيارات ذوى الاحتياجات الخاصة و كبار السن و تبقى جنب بوابة دخول الاداره على طول و يبقى ليهم موظفين لخدمتهم

ممكن مثلا يبقى فى حجز للميعاد عن طريق الانترنت يبقى الحجز بالميعاد من كذا لكذا مع الموظف كذا هعمل عنده كذا و يبقى قبلها ب 3 ايام مثلا و يبقى الى رايح ده عارف المفروض هياخد معاه ايه بالظبط عن طريق الانترنت و الموظف يبقى عارف الى رايحله ده هيعمل ايه عشان يبقى مجهز نفسه

كويس جدا برضه بس فكره اننا نشيل الموظفين ونجيب غيرهم هيبقى تطبيقها صعب انما ممكن نعمل رقابه عليهم من خلال وجود شبكه كاميرات بتغطى كل جزء وبالتالى حتى لو الموظف حب يتجاوز او يغلط فى مواطن اكيد حيتعاقب خصوصا ان ممكن يكون فى قسم خاص للشكاوى وتقييم الموظفين وبرضه حضرتك عارف ممكن لو تم التوزيع زى محضرتك قولت حسب التعداد حتلاقى الموظف برضه اسلوبه اتحسن لان برضه مش من العدل ان موظف يتعامل مع 1000 مواطن يوميا ويكون بشوش وبيبتسم للناس
وفكره الحجز من النت حلوه جدا برضه ممكن يكون ليه اولويه او مكتب مخصوص علشان ميستناش طالما انه حاجز ويكون مع موظف خاص مبيتعاملش مع باقى المواطنين علشان ميحسش المواطن التانى اللى ممكن معندوش نت بالظلم
ولو فيه برضه مكتب للاستعلامات خارج المرور يختص بتوجيه المواطنين للمطلوب منهم بالظبط والمكان اللى حيقدموا فيه الورق علشان يسهل الامر بدل مالمواطن يقف فى الطابور وفى الاخر الموظف يقوله كمل ورقك
وبيتهيقللى برضه المفروض البيروقراطيه تقل يعنى الاوراق المطلوبه متكونش عمال على بطال ويتفعل دور شبكات المعلومات والحاسب علشان مش كل مره اجيب ورق وانا رايح لهم

والله يا جماعه انا شايف الافكار كتير وسهله والمواطن على استعداد لاحترام النظام بس ناقص التطبيق .بس ان شاء الله يكون فى طريقه نطبق بيها اللى بنقوله