لاول مره القواعد الكامله لتصوير البورتريه (الاشخاص) ارجو من الجميع الدخول
مساء الخير
بما ان القسم جديد قلت اعمل الموضوع ده و خصوصا اننا داخلين على اجازه نص السنه و الكل هيسافر مع المدام و الاولاد و اكيد هياخد الكاميرا و يصور انشالله بالموبيل و لما يرجع يقعد يتفرج على الصور و طبعا هتبقى فيه صور حلوه و صور مش ولابد
الفكره ان الواحد مابيقاش عارف السبب يعني ايه اللي عمله و هو بيصور عشان صوره طلعت حلوه و صوره وحشه و بعدين يلقى واحد صاحبه معاه كاميرا معفنه في رأيه مطلعه صور تحفه
طب ايه السبب و الغلطه فين
الاخ اللي مطلع صور حلوه هيكون حاجه من اتنين يا اما موهوب بالفطره بدون دراسه و جت معاه بالممارسه بس ما بيبقاش عارف كل القواعد يا اما واحد خد كورس مثلا و قاعد يطبق و يشوف الغلطه من اول مره و بيتفاداها على طول لحد ما بيبقى احتمال الغلط ضعيف و ياسلام لو موهوب و دارس يبقى اوعى وشك
فتعالوا نتعرف على القواعد اللي كفيله تنجح اي صوره بالنسبه للبورتريه و هقتبس شوية صور توضيحيه من الكتاب اللي نزلته
وتعريف البورتريه البسيط هو تصوير الاشخاص او في رأيي يشمل تصوير جميع الكائنات الحيه و تعالوا نتعرف على القواعد بعد التمهيد الممل
اولا قاعدة التلت و التلتين (rule of third) والجمله دي هتتكرر كتير بالنسبه لكل انواع التصوير
يجب وانت قبل ماتصور تقسم الكادر بتاعك لثلاثة اجزاء متساويه طول وعرض زي الشكل ده سواء بالتخيل او تستخدم خطوط الكاميرا
http://nileup.com/up/uploads/nilemotors_13578089871.jpg
وتخلي موضوع الصوره في احد النقط الحمرا عشان دي تعتبر نقط قوه ولما الموضوع اتبحث عرفوا ان الواحد لما بييجي يتفرج على اي صوره عينه بتتجه مباشره على نقط التقاطع
فلما تييجي تصور واحد مثلا بلاش تخليه في نص الكادر و تكون عين من عينيه في احد نقاط القوه
و طبعا لو عين الشخص واضحه و اينفوكاس هتبقى صوره جميله
ثانيا حاول تتلافى و جود عناصر مشتته و ركز على موضوع الصوره
http://nileup.com/up/uploads/nilemotors_13578089872.jpg
طبعا الصوره غنيه عن الشرح و حاجه كمان لو بتصور واحد او مجموعه خلي موضوعك في معظم الكادر بمعنى لو بتصور واحد و اقف قدام بحيره لازم اللي بيتفرج على صورتك يعرف من اول نظره هو انت مصور واحد و الخلفيه بحيره و لا مصور البحيره و قدامها واحد تفرق كتير
ثالثا املأ الاطار بموضوع الصوره
http://nileup.com/up/uploads/nilemotors_13578089873.jpg
رابعا اختار الخلفيه المناسبه
حاول دايما تاخد وقتك و زياده و عينك تفضل رايحه جايه كذا مره و اقعد حلل الاماكن و الوانها يعني مثلا متصورش شخص لابس قميص بني و الخلفيه نفس اللون او شبهه يعني في صورة الطائر تخيلوا الصوره لو الخلفيه رمادي مثلا وده مش هيحصل عشان ده لون السما بس حبيت ادي مثال
http://nileup.com/up/uploads/nilemotors_13578089875.jpg
خامسا تفادي الاندماج
http://nileup.com/up/uploads/nilemotors_13578089874.jpg
طبعا الصورهواضحه و ساعات مثلا اشوف صور تلقى حد مصور واحد و الخلفيه شجره او عصاية شمسيه طالعه من نص دماغه فلازم تحرك الشخص و انت تتحرك
سادسا اماكن القطع
http://nileup.com/up/uploads/nilemotors_13578089876.jpg
تجنب و انت بتصور ان حدود كادرك يقطع في اي مفصل للشخص (الركبه - الكوع -الكتف-الوسط-الرقبه من تحت-الاطراف)
ولو حصل غصب عنك و انت بتتفرج على الكمبيوتر اقطع تاني حاجه بسيطه بأي tool
سابعا موضع الفراغ في الكادر
هنفترض اننا هنصور شخص من الجنب يبقى لازم نسيب فراغ قدام نظرة العين عشان اللي بيتفرج يتخيل هو باصص فين و ممنوع يبقى الفراغ خلف الرأس و دي صوره توضح اللي بقوله
http://nileup.com/up/uploads/nilemotors_13578089877.jpg
ثامنا اقتطاع الصوره بعد تصويرها
خلاص صورنا و روحنا و نزلنا صورنا على الكمبيوتر هنلقى ان فيه حاجات طفيفه رتوش يعني عشان الصوره تبقى مطبقه القواعد زي مثلا اقتطاع الصوره عشان اظبط قاعدة التلت و التلتين
http://nileup.com/up/uploads/nilemotors_13578089878.jpg
يعني مثلا الجزء اللي اتشال ظبط الليله (البنت-السما بقت واخده تلت الكادر)
اتمنى الموضوع يعجبكم و لو عجبكم هعمل موضوع عن استخدام الاضاءه في البورتريه سواء كانت طبيعيه او بالفلاش عشان تبقى صوركم كامله من كله
و انشاءالله لما العدد يزيد نبقى نعمل ورش عمليه في تصوير البورتريه
