السلام عليكم يا شباب المنتدي الكرام.
أنا حبيت أعمل الموضوع ده لأني قبل ما أجدد الرخصة كنت بدور على حد يفكرني بالأجراءات وايه قبل ايه وكده
فحبيت بعد ما خلصت أكتب كل التفاصيل عشان الكل يستفيد.
إجراءات تجديد رخصة السيارة الملاكي
مصر - وحدة مرور فيصل – 2013
ملخص الورق المطلوب:
1. الرخصة القديمة
2. البطاقة الشخصية وصورة منها
3. وثيقة تأمين إجباري من أي شركة تأمين – كل شركة ليها كشك جوة وحدة المرور
4. ملف تجديد (سنة – سنتين – ثلاثة).
ملف التجديد بيبقى فيه نموذج فحص فني ونموذج فحص بيئي
ونموذج فحص طفاية الحريق ونموذج 251 مرور بعدد سنوات التجديد
يعني لو هاتجدد 3 سنين المفروض تجيب 3 نسخ من نموذج 251 مرور.
5. شهادة بيانات بالرقم القديم لو عربيتك موديل قبل 2010
ملخص الأجراءات:
1. الفحص الفني وفحص الطفاية
2. اسخراج شهادة براءة الذمة (شهادة المخالفات)
3. شراء وثيقة التأمين الأجباري
4. تقدير الضريبة من الموظف
5. دفع الضريبة في الخزنة والعودة للموظف بالإيصال
6. إنتظار استلام الرخصة الجديدة
التفاصيل:
في البداية, يستحسن تعمل حسابك تبقى في المرور بالكتير سبعة ونص صباحا
عشان تتجنب الزحمة الصباحية المعتادة وتحجز مكان في أول طابور الفحص.
مرور فيصل موجود تحت كوبري فيصل
وعشان توصله خد شارع السودان من أوله او أدخل شارع السودان من عند جامعة القاهرة.
بعد ما تدخل شارع السودان كمل على طول لحد مطلع كوبري فيصل.
ماتتطلعش كوبري فيصل وكمل على طول تحت الكوبري هتلاقي شركة الشرقية للدخان على يمينك
كمل على طول مع العربيات وادخل معاهم أول يمين هتلاقي نفسك طلعت على شارع الجيزة والعربيات كلها بتتدخل يمين أجباري.
أدخل يمين معاهم وكمل على طول هتلاقي نفق الهرم في وشك.
أنزل النفق وأدخل أول يمين مباشرة بعد النفق هتلاقي في الأخر طابور الفحص.
هتلاقي ناس واقفين بشنط سودة على كتفهم فيه منهم اللي بيبيع ملف التجديد ومنهم اللي بيعمل بوليصة الـتأمين الأجباري.
ثمن الملف من الناس ديه 60 جنيه ولو جبته من جوة المرور هيبقى بـ 55 جنيه.
وانت واقف في طابور الفحص هتلاقي ناس بتعدي وبتنادي "حد عايز يشوف مخالفاته" وده أنا مسألتوش بياخد كام.
فيه بعديه واحد تاني عدي بينادي "حد عايز يعدي من الفحص والطفايه؟" وده بياخد 120 جنيه!
لما رحت أصور البطاقة الست اللي بتصور قالتلي انا ممكن اخلصلك الرخصة كلها ب 150 جنيه!
قبل الفحص لازم تشتري ملف تجديد ويكون معاك طفاية حريق سليمة.
فيه واحد واقف بينظم الدور في دخول العربيات للفحص
ولما بتقرب على الفحص بييجي جنبك ويقولك "صباح الفل – الأصطباحة بتاعتي" الناس كلها بتديلوه خمسة جنية.
لما ييجي دورك في الفحص الفني بيقولك أفتح الكبود وبطل العربية وخد الملف للظابط.
هو هايشتغل في الفحص وانت المفروض تاخد الملف تديه للظابط
هايطلب منك بطاقتك ورخصة العربية وبعدين هايملى الجزء العلوي فقط من نموذج الفحص
وهيسألك فين العربية وهيسأل الفني اذا فيها اي حاجة مش مظبوطة وبعدين يديك الورق والبطاقة.
المفروض كده الفحص خلص والمفروض تاخد العربية وتركنها بعيد وبعدين ترجع تكمل ورق الفحص مع المهندس.
في مرور فيصل هتلاقي فيه باركينج قدام شوية على اليمين بخمسة جنيه طول اليوم.
هاتركن هناك ولازم تمور العربية وتنزل فرامل اليد قبل ماتمشي.
هاترجع تاني على رجليك مكان الفحص وتدي الورق للمهندس.
هو هايملى باقي نموذج الفحص وهايملى نموذج الفحص البيئي ويمضي ويختم وبعدين يديلك الورق.
بعد كده تروح كشك فحص الطفايات جنب المهندس.
الراجل اللي بيفحص الطفاية بتاع الحماية المدنية هايبص عليها
وبعدين ممكن يقولك انها محتاجة صيانة في شارع عماد الدين ويعديها
أو يقولك ماتنفعش خالص ولازم تشتري واحدة جديدة وبعدين ترجعله تاني.
بعد فحص الطفاية هايملى نموذج فحص الطفاية ويديهولك.
بعد كده المفروض ترجع تاني للعسكري اللي واقف على باب الأوضة اللي فيها الظابط بتاع الفحص
علشان يختملك الورق بعد ما المهندس خلصه.
ممكن يسألك على المثلث وشنطة الأسعافات أو يختملك على طول وخلاص.
بعد كده المفروض تروح نيابة المرور عشان تجيب شهادة براءة الذمة (شهادية المخالفات).
هايطلب منك البطاقة ورخصة العربية وشهادة بيانات بالرقم القديم للعربية لو انت عربيتك موديل قبل 2010.
لو عليك مخالفات هاتدفعها الأول وبعدين تاخد الشهادة
لو مافيش هايقولك استني برة وهما هايندهو عليك.
هاتستني برة شوية ولما يندهو عليك هاتدفع خمسة جنية رسوم الشهادة وتاخدها وتمشي.
نيابة المرور ليها خزنة مستقلة غير خزنة وحدة المرور نفسها.
الخزنتين بيقفلوا الساعة واحدة وممكن واحدة منهم تقفل قبل التانية حسب ظروف اليوم اللي انت رايح فيه.
بعد كده تروح وحدة المرور عشان تسلم الملف.
الأول هاتعمل وثيقة تأمين أجباري لمدة 3 سنين لو أنت هاتجدد 3 سنين وديه ساعتها كانت بـ 307 جنيه.
بعد كده هاتروح على شبابيك تجديد الملاكي وتسلم ورقك للموظف.
هايراجعه وبعدين يكتبلك ورقة فيها الضريبة عشان تروح تدفعها في الخزنة
وترجعله تاني وهايخلي الورق معاه.
ممكن ساعتها يديلك كمان استمارات التجديد من الملف بتاعك ويقولك أملاها وهاتها.
الضريبة المقررة ساعتها على عربيتي كانت 685 جنيه.
بعد ماتدفع الضريبة وتملى استمارات التجديد هاترجعله تاني على الشباك تديله الوصل والأستمارات
هايحط كل الورق في الملف ويقولك اقعد لما يندهو عليك.
في حالتي انا قعدت حوالي 3 ساعات لحد ما ندهو على اسمي واخدت الرخصة الجديدة.
م. عماد معوض