طيب معلش يا ا محمد ممكن تقارنلى بسرعة بين صيانات واسعار قطع غيار الميجان مقارنة بالكورى الهيونداى او الاوبترا؟
عرض للطباعة
طيب معلش يا ا محمد ممكن تقارنلى بسرعة بين صيانات واسعار قطع غيار الميجان مقارنة بالكورى الهيونداى او الاوبترا؟
لو حضرتك دورت فى الأقسام هتلاقى اللى أنت عايزه بس على العموم أنا معرفش أسعار قطع غيار عربيات أخرى غير عربيتى
برا التوكيل وأنت وشطارتك والبائع وضميره
فلتر هواء 45 فيه ناس بتبيعه لحد 70 جنيه
طنابير أمامية 350
تيل أمامى أنواع بيتراوح من 150 ل 250 مثلا حسب النوع وضمير البائع
مساعدين 750 طبعا فيه أنواع أغلى
مقصات 380 للاتنين
فلتر زيت من 25 ل 35
فلتر بنزين من 35 ل 60 جنيه دا بيبقى نوع أعلى من اللى بينزل فيها كمان إنجليزى تقريبا
عندك سيرر الكاتينة 110 فقط من غير البكر
دى الحاجات الأساسية اللى بتتغير
عامه بخصوص الأوبترا مقارنه بالميجان:
1- الأوبترا اوسع في السعه الداخليه و اصغر شويه في الشنطه
2- الميجان اثبت شويه و اريح
3- خامات الأوبترا احسن شويه في التابلوه و الابواب و الميجان احسن في الكراسي
4- الأوبشنز اعلي في الميجان
5- الأوبترا استهلاكها في البنزين اعلي شويه
6- قطع غيار و صيانه اسهل و ارخص و مش محتاجه حد متخصص علي عكس الميجان عايزه صيانه متخصصه
لو هتشتري مستعمل ممكن تركز في الاوبترا من 2006 او 2007 لكن الميجان لازم تركز من 2007 فيما فوق اللي هي شكلها متغير شويه لان من 2005 - 2007 الشكل العادي النضيف منها و اللي من غير مشاكل قليل
أنا هقولك الصح بس فيه ناس بتقعد الحاجة أكتر من كدا بس كله على حساب العربية برضه
الحاجات اللى أنا قولتلك عليها دى استهلاكية كلها تختلف حسب استخدام الشخص للعربية
هقولك حاجة أنا عربيتى ماشية 116 ألف كيلو تقريبا صاحبها مكنش غيرلها المساعدين وأنا لسة شغال بيهم
بالنسبة لفلتر الزيت كل 10 آلاف كيلو
فلتر البنزين كل 40 ألف فلتر الهواء كل 40 ألف كيلو
السيور كل 60 ألف أو 3 سنين
زيت الفتيس الأوتوماتيك بعمر الفتيس الأصلى اللى بينزل فيها
مياه الرادياتير 60 كل 60 ألف كيلو
زيت الفرامل كل 60 ألف كيلو أو سنتين مثلا عشان الزيت الباكم بيمص الرطوبة وبيفقد خواصه
أنا عامة مبحبش العربية تبقى واسعة من جوا معرفش ليه
يعنى أنا بركب عربيتى ببقى حاسس إنى راكب سفينة هاهاها
بس حضرتك متأكد إن الأوبترا أوسع من ميجان ؟ انا مش متخيلها بصراحة ! ع العموم أنا هركب أوبترا بتاع صاحبى وأشوف
ومتأكد برضه إن خامات الأوبترا كتابلوه أفضل ... هو عامة تابلوه الميجان العادى الأسود بسيط جدا وشيك هو مش بلاستيك للعلم زى ما تقول أسفنج مضغوط قوى
الطارة فى ميجان جلد فى كل التجهيزات
التكييف تاتش فى الفئات العالية والبانوراما فيها كل الأوبشن طبعا
فيه تابلوه بيج كان بينزل فى الهاى لاين جامد جدا طبعا مينفعش نقارنه بتابلوه الأوبترا لأنه أجمل منه بكتير
كراسى ميجان فى الفئات الأولى مش عاجبانى لأنه قماش
الهاى لاين منها جلد أو جلد فى قماش
عوامل الأمان ميجان أفضل طبعا لأن ال abs و ebd تجهيز أساسى +6 إيرباج تجهيز أساسى فى كل الفئات + إيموبيليزر مانع للسرقة فى كل الفئات + كارت تشغيل سيمنز بدل المفتاح وبيفتح الشنطة كمان
معظم العيوب اللى ظهرت فى العربية قطع استهلاكية وظهرت فى بداية نزول ميجان 2005 و 2006
وزمانها اتغيرت فى العربيات طبعا
زى كويلات وبطاريات وأغلبها كانت بتتغير فى التوكيل تبع الضمان وترس الديفيزور
من هنا بدأت الأشاعات تطلع على العربية والكلام الفاضى الكتير
العربية أى حد فاهم يشتغل فيها يا باشا
لو ميكانيكى محترم بيشتغل فى الأوبترا هيعرف يشتغل فى ميجان
لأنه هيكون بيطور من نفسه وفيه قواعد أساسية عند التعامل مع العربيات لو هو محيط بيها مش هتقف قصاده حتى بوجاتى فيرون
إنما الميكانيكية فى مصر حا جة صعبة قوى قوى قوى .... عشان كدا أنا بإذن الله هتعلم أعمل كل حاجة فى عربيتى بنفسى وأكسب راحة بالى
أنا بتعب جامد آه بس أنا بحب كدا
متابع
طيب معلش يا باشا انا عارف ان انا دوشتك باسألتى بس عشان الاستفادة العامة لكل الناس اللى مترددة زييى تشترى ميجان ولا لا..بالنسبة لكهربة العربية بيقولوا كتير اوى والعربية كلها حساسات وشغل كمبيوتر من هنا بيقولوا ان صيانتها مبتبقاش عند اى ميكانيكى لانه لازم يكون عنده كمبيوتر معين عشان يصلحها دى حاجة سمعتها وحاجة تانية سمعت ان فى مشاكل فى كارت العربية وانه لو ضاع بيبقى غالى او احتمال ان فى ناس بتجيب شفرات العربيات دى وبتسرقها زى كان فى اخ عامل موضوع ان عربيته الفلوانس اتسرقت و راح التوكيل قالوله ان الشفرات بتتجاب من النت ياترى ايه مصداقية الحاجات دى اللى بنسمعها وطبعا حضرتك مالك العربية وادرى من اى حد؟؟
بالنسبة لموضوع الكمبيوتر دا ... أى عربية محترمة لازم يكون ليها كنترول ولازم يكون ليها جهاز كاشف أعطال
بص يا باشا عندنا فى التابلوه فى ميجان فيه وصلة لجهاز كشف الأعطال وغالبا بيبقى متعلق بالحساسات اللى فى العربية حساس أوكسجين شكمان كامة حساس هواء أى عربية طبعا فيها الكلام دا
الوصلة دى من نوع obd ii
الكمبيوتر مفيد عشان لما بتحصل حاجة فى العربية بتعرف فين العطل بسهولة والشاشة فى العربية بتكتبلك رسالة برضه
كل دا موجود فى أى عربية محترمة ودا فى صالحنا أحنا
لكن أى حد يشتغل فيها كصيانات دورية تغيير فلاتر وسيور ومياه ردياتير و تيل ومساعدين كل دا مش محتاج كمبيوتر فى حاجة
مفيش حاجة أسمها كهربة العربية كتيرة قوى العربية لو كهربتها سليمة مش هتتعبك وبرضه أى ميكانيكى فاهم ومحترم هيفهم فيها بسهولة
بالنسبة للأمان فيها أيموبيليزر يا باشا وصعب جدا تتسرق إلا لو اتسرق الكارت بتاعها دا إنت لو شلت الكارت وهى دايرة بتصفرلك وتكتبلك دخل الكارت وبعدين اللى عمل الكارت دا سيمنز يا باشا
عشان تعمل زيه لازم تودى العربية ويتعملها كارت تانى وتعرفه على الكنترول وتديه للحرامى وتقوله أسرقنى ههههههه
العربية بتيجى بكارتين .... فيه ناس باظ منها الكارت مع كتر الخبطات والصدمات الكارت فيه حتة قصدير موصلة بتفصل
بيتفك ويتعمل بسهولة جدا ويرجع زى ما كان
أنا عندى الكارتين شغالين مفيش كارت عطل منهم بستخدم كارت واحد فقط ودا اللى كان بيستخدمه مالكها السابق من بقاله 5 سنين
للعلم العربية بتنزل بدون أنذار
تشتريها أو لأ يتوقف على حاجتين أول حاجة تلاقى عربية بحالة كويسة الحاجة التانية والأهم إنك متكنش قلقان من ناحيتها عشان متندمش بعدين
أصل القلق من الحاجة دا شئ مش كويس يعنى ممكن تجيبها ويحصل معاك عطل ..... ترجع تقول ياريتنى ما جبتها وتقول ياما الناس حذرونى ...... وهو يكون عطل عادى وشئ طبيعى
وفى النهاية بقول لحضرتك وسع دايرة البحث بتاعتك شوف كل العربيات اللى فى السوق مستعملة وقارن بينهم
شوف الشكل اللى بتحبه
الموتور اللى انت عايزه واستهلاكه
الوسع الداخلى
الفتيس المانيوال أو الأوتو
الكماليات
عوامل الأمان
سعر أعادة البيع ودا أغلب الناس بتبصله فى مصر يعنى ممكن واحد يجيب لانسر بومة عشان أعادة بيعها أسرع وخسارتها أقل من لانسر شارك !!!
ممكن واحد يشترى كورولا 2007 الشكل القديم بسعرها كأنها زيرو دلوقتى وما يشتريش كورولا 2008 الجنوب أفريقى مانيوال بسعر أقل بكتير لمجرد ان فتيسها الأوتو فيه مشاكل برغم إنها أحسن بكتير سواء مانيوال أو أوتو !!!
شوف أنا جبتلك ماركات زى بعض أهو
عشان أوضح لك حقيقة سمعة العربيات والناس اللى بتقول كلام كتير مش صحيح عن عربيات يمكن ما جربوش يركبوها قبل كدا
نسيبت أقولك سعر الكارت الأصلى 1450 جنيه بيبعتوا يجيبوه من فرنسا
سمعت إن فيه منه تركى ب 600 أو 700 جنيه