استفسار عن فنادق السخنة

**omarmosalem** · 14-01-2013 01:53 PM

فيه كمان فندق رومانس ودا بعد بورتو بحوالي 20 كيلو فندق محترم ونضيف وأكله كويس 4 نجوم. الليلة (يعني الأوضة) الدبل 600 جنيه أنا رحته من حوالي شهرين وطلبت سرير إضافي لطفل فزوده 80جنيه. الأوضة بيبقى فيها سرير كبير أوي وكمان كنبة سرير

**ramymechanics** · 14-01-2013 03:21 PM

لا حضرتك انا بتكلم عن الغرفة مجربتش شاليهات بالميرا بس حضرتك الفرق بين بالميرا والوادى انا بالميرا ريزورت مفيهاش حاجة خاصة لكن الوادى قرية معظمها بتاعة ناس وبيأجروها فيما عدا الفندق اللى جوة بس اسأل دلوقتى لأن الأسعار بتختلف لأننا فى أجازة نص السنة بس ممكن ماتعلاش عشان المظاهرات

المشاركة الأصلية كتبت بواسطة aser_007

بس إحساسي إن بالميرا أحسن من الوادي ... انا روحت بالميرا مرة مع الاسرة كان جامد بصراحة .... بس مساأتش على الاسعار بصراحة واللي انا عاوز اعرفه ال 600 دي غرفة دابل ولا ده شاليه داي يوز كده بس ( لان الغرف بتبقى بعدد السراير لكن الشاليه اللي بيتاجر داي يوز بيبقى انت وحظك )

**shady_hamdy** · 14-01-2013 03:53 PM

++1111

**amrelsha3er** · 14-01-2013 04:18 PM

المشاركة الأصلية كتبت بواسطة ramymechanics

بص يا باشا حسب رينج الأسعار اللى حضرتك عاوزه ومستوى الخدمة يعنى مثلا فى المتوسط فيه بالميرا فطار وعشا أوبن بوفيه الغرفة بحوالى 600 جنيه الليلة عندك موفنبيك بس دة غالى حبتين بس أكله أحسن وغرفه أجمد وأكبر بحوالى 900 جنيه الليلة أو لو انتم عدد 4 أو 5 أفراد فيه رامادا السخنة بعد موفنبيك على طول بحوالى 1000 جنيه الليلة شاملة أفطار وعشاء أوبن بوفيه لل 4 أفراد بس البحر فيه زلط كتير لكن بيسين حلو وكل شاليه غرفتين بحمامين وريسبشن كلهم مكيفين يعنى أقرب لشقة أو بقا تاخد شقة فندقية فى بورتو مع انى مش بحب بورتو وعلى فكرة فى عرض فيها لحد يوم 24 يناير والليله على ما أتذكر بحوالى 1200 جنيه شقة 50 متر مجهزة بالكاامل شاملة فطار وعشا بردو

أما بالنسبة للحجز فحضرتك تتصل ب 140 دليل تجيب نمرة اللى عاوزه وتتصل بيهم تحجز عادى
الحجز عن طريق النت بيبقى فى أيام السيزون عشان بيبقى ليهم حصة محجوزة فبتضمن أنهم يلاقولك مكان حتى لو مفيش حجز فى الفندق

نسيت أقول لحضرتك ان الأسعار دى بتتغير فى الويك اندز والأجازات الرسمية
ونسيت كمان أقول ان فيه فندق فى ستيلا دى مارى بس دى كلها بيكينى يا باشا وأنا بكرهها من وسعها أنا مشيت فيها 5 كم ومجبتش آخرها
أجازة سعيدة

بالاسعار الخرافيه دى يجى الغردقه وبنص التمن واسمها غردقه مش العين السخنه اللى مفهاش اى وسائل ترفيه!!
مجرد راى

**amrelsha3er** · 14-01-2013 04:20 PM

المشاركة الأصلية كتبت بواسطة ramymechanics

معلش أحب أضيف حاجة كمان لو عدد أفراد كبير أنصحكم تأجر شاليه أو فيلا فى قرية الوادى ودى أول قرية بعد الميناء الشاليهات والفلل مجهزة تجهيز جامد و اليوم مش بيعدى 550 جنيه ولو فى موسم واقع ممكن توصل ل 350 جنيه بس دى أهالى يعنى مش فندق وفى فندق جوة أسمه هورايزون الوادى بس أنا مرحتوش ولا لقيته فى الدليل بصراحة .. أنا بتصل بواحد شغال عامل فى القرية وبيظبطلى شاليه بس بناخد أكل معانا و المطبخ هناك مجهز والشاليهات والفلل مكيفة بالكامل ... معلش زهقتكم معايا

الله ينور :)