.وزير البترول: من يعترض علي حصة «5 لترات» يحول سيارته إلي غاز.

وزير البترول: من يعترض علي حصة «5 لترات» يحول سيارته إلي غاز..والنظام السابق استخدم «الدعم» رشوة للمواطن


دعا المهندس أسامة كمال - وزير البترول - اصحاب سيارات الملاكى الذين اعترضوا على حصة " 5" لترات التى سيتم تخصيصها لهم يوميا تحويل سياراتهم لتعمل بالغاز .

كما أوضح كمال أثناء حواره الاعلامى فى برنامج الـ"10 مساء " الذى يقدمه الاعلامى وائل الابراشى على قناة "دريم 2" أن سائقي الميكروباصات الذين اعترضوا على تحديد " 30 لترا " لهم عندما يأتون لعرض سياراتهم على المرور والضرائب يقولون إن السيارة لا تعمل سوى ساعتين فقط فى اليوم .

وقال وزير البترول :عندما نتحدث عن البنزين وتحديد الدعم يقولون السيارة تعمل 24 ساعة و30 لترا لاتكفى، لذلك نرجو منهم تحديد رقم معين مع العلم أنه لا توجد سيارة او سائق يستطيع العمل 8 ساعات متواصلة والا سيتعرض الراكبون للخطر .

وأضاف كمال اننا لن نرفع الدعم عن المنتجات البترولية على الرغم من أن التمسك بالدعم فى السابق كان رشوة من الانظمة للمواطن حيث إن لدينا 80% من الدعم يذهب لـ20% من المواطنين.

[youtube]http://www.youtube.com/watch?v=MfiJOacT65A[/youtube]

لله فى خلقه شئون
ده على اساس ان محطات الغاز ماليه الدنيا وفاضية !!!

حسبنا الله ونعم الوكيل

بافكر جديا في كده

طب ازاى بس نبوظ العربيات بتحويلها الى غاز غصب عننا ؟؟
الوزير كان مركز فى الكلام على إن الغاز لا يؤثر فى كفاءة موتور العربية وتجاهل تماماً تأثير وزن اسطوانة الغاز على عفشة العربية والمساعدين بسبب تقل الاسطوانة دى
وبيقول انهم عندهم منخصصين فى تحويل العربيات الى غاز
يعنى كده هايلعبوا فى منظومة وقود العربية .......... وكده هاتخرج من الضمان
أنا عربيتى كارينز ولسه فاضل لى سنتين فى الضمان

كمان الكارينز لو اتحطت الإسطوانة فى الشنطة الخلفية ها تبهدل الدنيا وهاضطر ألغى الأدراج اللى فى الشنطة فضلاً عن صعوبة تثبيت الإسطوانة سواء فى أرضية الشنطة أو مساند الكرسى الخلفى لإنها مش ثابتة .

وغير كده محطات تموين الغاز قليلة جداً والوقوف فيها بالطوابير

نبيع العربية احسن

طب وفر الغاز الاول، دحنا بنستوردة ومحطات الكهرباء بتقفل علشان مش موجود!!!

انا اتفق في نقطة تحويل العربيات لغاز بالرغم ان له آثار سلبية يعني قصر عمر الموتور لكن مش بنسبة كبييرة و السحب أضعف سواء بسبب الغاز او لوجود اسطوانة بتقل العربية و انسي الشنطة لو عربية صغيرة لكن في المقابل ارخص يعني التعويض يفرق وع حد علمي ان احنا الحمد لله عندنا احتياطي غاز و بالتالي يكون ده أفضل وقود يتم استخدامه هنا لكن قبل القيام بالخطوة ديه نحتاج لتوافر محطات غاز بشكل اكبر من كده مثلا م.نصر لا يقل عن 5-8 محطات غاز او ممكن كل محطة بنزين يكون فيها جزء للغاز بجانب البنزين و السولار مع انشاء بعض محطات الغاز الجديدة و بالتالي الموضوع ده هيساعد اكتر من بناء محطات جديدة كتيير اللي هتكلف كتيير و تاخد وقت طويل
بس برده 5 لتر مش كافية طب يقولوا 10 لتر حتي
خاصة للناس اللي ساكنين في المدن الجديدة زي حالاتي هيعملوا ايه
الليترات ديه تنفع في حالة الواحدة الكل يقلب ع عربيات 800-1100 سي سي و يخف مشاويره خالص او ميتحركش اساسا لأن الزحمة لوحدها بتاكل البنزين
و يستخدم المواصلات و لكن زي حالتي من سكان المدن الجديدة و مفيش عندنا غير خط اوتوبيس واحد و لو لقيته و ساعات السواقيين بيمشوا ع انهم مجرجين و يكبروا دماغهم اخدها مشي لحد وسط البلد يعني و لا ايه ههههههه و بالتالينحتاج لتوفير شبكة مواصلات كبيييرة و متطورة


فلو هنطبق القصة ديه فاقتراحي كالآتي :

- توفير شبكة مواصلات كبييرة و متطورة و خاصة للمدن الجديدة

-انه يكون البنزين المدعم 10 لتر ع الاقل يوميا يعني حوالي 3650 لتر في السنة يعني حوالي 304 لتر تقريبا في الشهر ده بالنسبة للملاكي اما الميكروباصات دول يعملوا اللي هم عايزينه معاهم ان شا الله يتم حرمانهم من البنزين لأنهم فعلا يستاهلوا بيضيعوا بنزين و سولار في الهوا بحرقهم و شدهم و جريهم في الشوارع و يقولك البنزين و السولارطب ما تمشي بعقل عشان التانك يكفيك و زيادة

- تشجيع تحويل السيارات الملاكي لغاز طبيعي ,ع ان تكون محطات الغاز متوافرة قبل البدأ في التطبيق سواء بانشاء محطات جديدة او اضافة قسم غاز في محطات البنزين و السولار الحالية و يتم تخصيص طرمبات لوسائل النقل و طرمبات للملاكي عشان يبقي فيه نظام

- تحويل اغلب وسائل النقل تاكسيات و ميكروباصات و اوتوبيسات الي غاز طبيعي و اذا امكن توفير محطات غاز خاصة بهم بعيدا عن الملاكي لعدم حدوث تكدس و اضاعة الوقت

و اخيرا أقول الحمد لله ع نعمة الـ800 سي سي :)

والله يا جدعان انتو في نعمه مش حاسين بيها ابدا....
لو شفتو دولة زي الاردن هتعرفو النعمه اللي انتو فيها....
تحياتي

Sent from my SE Arc S using Forum Runner

والله يا جماعه انا متوقع ان شاء الله ان كل كلامهم ده هيكون مصيره عدم التنفيذ والايقاف لانهم بيلعبوا فى اهم حاجة بتمس الناس ، دول شوية مهرجين وعايزين يخربوا الدنيا بقرارتهم المتخلفه الغير مسئولة ده وان شاء الله الكلام ده مش هيتنفذ لانه بيمس كل واحد فى البلد ، لان ده هيغلى كل حاجة فى الدنيا من خضار ومنتجات البان وفاكهه ومواصلات وخبز ، والحجة هتكون ماهو البنزين والسولار غلي يا بيه ما هى كل حاجة بتغلي يا بيه روح قول للحكومة هى الى غلت الحاجة وهكذا .....

فاعتقد انه وقت الجد ودخول القرارات ده حيز التهريج (التنفيذ ) هتحصل مشكلة لا حل لها فى البلد الا العدول عن مثل هذة التخلفات مش القرارات ، زي قرارت فعلا غلق المحلات يعنى انتم كنتم عايزين تخلوا جمهورية مصر العربية تنام من بعد العشاء ده بدل ما تروحوا وتطورا فى محطات الكهرباء لأ العبقرينوا فكر انه اية رايكم يا جماعه ما الناس تنام بدرى اوفر لا تعليق علشان الواحد هيخرج عن شعوره ، احنا قولنا هنشيل الدعم اوك عن فئة معينة اوك عن سعه مواتير لحد 1600 اوكى لكن دلوقتى ترجعها للــ 1400 انت كده بتدبح الناس لان القاعدة العريضة من ملاك السيارات هى المواتير الــ 1600
ده غير ان شوية المتخلفين دول يا ترى عارفين انه فى عربيات غالية جدا بتكون مواتيرها 1400 طيب وانت بتقول عايز توصل الدعم للمحتاج فين بقى العدل فى توصيل الدعم وكتير اوى من العربيات القديمة والا قبل الموديل الى قال عليه برده مواتيرها 1600 طيب قولى بقى والنبي الناس ده بتفكر ولا الناس ده تصحى الصبح تفطر برسيم ولا اية ، واية الاسلوب المتدنى ده فى الكلام بان الى مش عاجبه الــ 5لتر بنزين يقلب غاز طبعا لانه هو وكتير على شاكلته معاهم ليهم ولاسرهم دفاتر البنيزين الى بيحوطوا بيها ببلاش له ولعيلته وكمان يوزع منها هدايا للجيران الا من رحم ربي .

طيب ده على كده يعنى سيادة الوزير برده عربيته الخاصة مش هنقول بتاعه الشغل هتحط 5 لتر بنزين فى اليوم يبقى روح انت بقى يا حلو زمانك حول عربيتك غاز ، وكفاية كده لحسن الواحد ضغطه ارتفع ، صباحكو زي الفل .

اقتباس:

---

المشاركة الأصلية كتبت بواسطة dr.hazem

والله يا جدعان انتو في نعمه مش حاسين بيها ابدا....
لو شفتو دولة زي الاردن هتعرفو النعمه اللي انتو فيها....
تحياتي

sent from my se arc s using forum runner

---

متوسط دخل المواطن الاردني كام يا دكتور؟؟
واسعاراساسيات الحياه بتمثل نسبه قد ايه من دخل المواطن ؟؟ زي الاكل والشرب والتعليم والعلاج ؟؟
وعندهم موارد مسروقه زي عندنا ولا لا ؟؟؟؟

ماهي علبه السجاير في لندن بحوالي 60 جنيه مصري والبنزين برضه غالي هناك علي ما اعرف
يبقي حالنا احسن منهم ؟؟؟

اقتباس:

---

المشاركة الأصلية كتبت بواسطة SHNORY

متوسط دخل المواطن الاردني كام يا دكتور؟؟
واسعاراساسيات الحياه بتمثل نسبه قد ايه من دخل المواطن ؟؟ زي الاكل والشرب والتعليم والعلاج ؟؟
وعندهم موارد مسروقه زي عندنا ولا لا ؟؟؟؟

ماهي علبه السجاير في لندن بحوالي 60 جنيه مصري والبنزين برضه غالي هناك علي ما اعرف
يبقي حالنا احسن منهم ؟؟؟

---

متوسط الدخل من 200 الى 500دينار
الاكل العيش بالكيلو مدعم بنص دينار ده للعيش الضامي فقط
الفينو والبرجر والحاجات التانية الواحده ب 15 قرش
انبوبة الغاز ب 10 دنانير...
كشفية الطبيب العام متوسط 7دنانير
الأدوية عاليه جدا لما هنتكلم عن مضاد حيوي لطفل وخافض حرارة بنتكلم في 10دنانير...
فاتورة الكهرباء بتجيلي واحنا فردين وطفل ومعنديش سخان كهربائي بمتوسط 25دينار
ايجار البيت المفروض كمتوسط 230 في الشهر دون شهور الصيف
التعليم مكلف جدا ويكفيك ان النظام هنا ساعات واقل عدد ياعات في الترم 12 وتمن الساعه في الجامعات الحكومية بمتوسط 30دينار!!
البنزين اقل سعر للتر 90 هو 78 قرش وال95ب 97قرش

ارخص طبق فول ب 70 قرش بكفي تلاته انفار عاديين واتنين من الحجم الاكس لارج...
صدقني الناس هنا مش عايشه....
اما عن السرقات فحدث ولا حرج...
ادخل عالنت واعمل سيرش على
مختلسات شركه الفوسفات
قضيه الكازينو
فضيحة مشروع الباص سريع التردد
وغيرها كتير جدا جدا

هنا الفلوس كتير جدا لكنها بحوزة جزء لا يتعدى ال15%
وسايط ومحسوبيات بلا نهاية...
كمثال... ممكن لو ليك واسطه تجمرك عربيتك بسعر اقل بألف او ألفين دينار عن الرقم الحقيقي!!


اتمنى اكون وصلتلك صوره مصغرة عن الوضع هنا....
:-D

Sent from my SE Arc S using Forum Runner

فعلا وسيادته بيمون كام لتر وعربيته كام cc ؟؟؟؟؟

وهي فين محطات الغاز، والله العظيم اللي بيحصل ده تهريج وكلام غير مسئول من شخص المفروض إنه مسئول، بس الحق مش عليه

كلام جاهل من شخص جاهل
انا دافع جمرك مساوى لتمن عربيتى وبدفع سنويا ضريبة غير اللى كده وكده وحقى انى اتمتع بانتاج بلدى وفى الاخر يضحك على ويقولى بندعم الوقود على اساس انه بيستورده.
ده المصيبة اننا بلد منتجة ومن التخلف بتاعهم عاوزنا نركب عربيات 1000 و1400 س وبره اللى بيستوردوا بيركوبواعربيات مش اقل من 2000 س س

يارب توب علينا من الفئة الضالة اللى واخده البلد لتحت

هو قال ان التحويل للغاز الطبيعى مجانا؟؟؟ هل الكلام ده صحيح ؟؟؟
واعمله فين التحويل ده؟؟؟؟

من زمان نفسى اركب موتوسيكل.

من كام سنة استاذى فى الجامعة قالى ان دعم الطاقة هيتشال هيتشال وقال ساعتها ان الحكومة معندهاش الجراءة انها ترفع الدعم عن البنزين والسولار وانبوبة البوتجاز خوفا من اندلاع غضب شعبى لكن الاختيارى الان بكره هيبقى اجبارى ولازم هيتنفذ ساعتها انا فهمت انه يقصد ان البنزين هيغلى شوية والانبوبة تزيد جنيه ولا اثنين --طيب والحل المفروض يكون فيه نظام لكارت ذكى بعد الكمية المقررة ناخد كمية مماثلة بدعم جزئى او ماشابه ذلك ---والله اكبر من كونها مشكلة بنزين بالنسبة لينا المشكلة ان كل السلع بما فيها كيلو الطماطم اسعارها هتعلى لان تكلفة النقل هتزيد وكمان المواصلات من تاكسى لميكروباص هى الناس هتلاقيها من البنزين ولا الدولار

احنا شعب مش قادر يستحمل التقدم
شوفوا الوزير كل شوية بيضحك ازاي
عادي مش فارقة يا جماعة عنده حاجة ..

والله ياسعادة الوزير لولا الشتيمة ممنوعة كانت الصفحة كلها مش حتكفيني شتايم

5 لتر إيه إللي بتكلم عنهم إنت جاي تستهبل ولا تهرج بمنظرك ده
وبعدين إيه إسلوب لوي الدراع ده بتحويل العربية لغاز هي بلد الحج تذل وتتشرط فينا
يعني عربيتي إللي لسه شاريها من 4شهور ودافع فيها دم قلبي أروح أعدل في المتور وأبهدله وأقلبها غاز
ربنا يسامح كل إللي إدى صوته لمرسي

اقتباس:

---

المشاركة الأصلية كتبت بواسطة dr.hazem

متوسط الدخل من 200 الى 500دينار
الاكل العيش بالكيلو مدعم بنص دينار ده للعيش الضامي فقط
الفينو والبرجر والحاجات التانية الواحده ب 15 قرش
انبوبة الغاز ب 10 دنانير...
كشفية الطبيب العام متوسط 7دنانير
الأدوية عاليه جدا لما هنتكلم عن مضاد حيوي لطفل وخافض حرارة بنتكلم في 10دنانير...
فاتورة الكهرباء بتجيلي واحنا فردين وطفل ومعنديش سخان كهربائي بمتوسط 25دينار
ايجار البيت المفروض كمتوسط 230 في الشهر دون شهور الصيف
التعليم مكلف جدا ويكفيك ان النظام هنا ساعات واقل عدد ياعات في الترم 12 وتمن الساعه في الجامعات الحكومية بمتوسط 30دينار!!
البنزين اقل سعر للتر 90 هو 78 قرش وال95ب 97قرش

ارخص طبق فول ب 70 قرش بكفي تلاته انفار عاديين واتنين من الحجم الاكس لارج...
صدقني الناس هنا مش عايشه....
اما عن السرقات فحدث ولا حرج...
ادخل عالنت واعمل سيرش على
مختلسات شركه الفوسفات
قضيه الكازينو
فضيحة مشروع الباص سريع التردد
وغيرها كتير جدا جدا

هنا الفلوس كتير جدا لكنها بحوزة جزء لا يتعدى ال15%
وسايط ومحسوبيات بلا نهاية...
كمثال... ممكن لو ليك واسطه تجمرك عربيتك بسعر اقل بألف او ألفين دينار عن الرقم الحقيقي!!


اتمنى اكون وصلتلك صوره مصغرة عن الوضع هنا....
:-d

sent from my se arc s using forum runner

---

احد اصدقائى حاليا فى الأردن لمده اسبوع
فى زيارة عمل
الراجل مبهور بالبلد ونظافتها وناسها
ومبهور بمستوى البلد والرفاهيه اللى شايفها قدام عنيه

للتغلب علي ازمة البنزين

:bye2:
http://www.nilemotors.net

ناس عايشة فى ابراج عاجية ...ولا على باله المشكلة الاساسية

ما فكرش حتى يعمل دراسة بدائية يحسب فيها استهلاك العربيات

قد ايه فى وسط زحام مرير مع اتساع نطاق القاهرة الكبرى

لو عمل كده عمره ما هيقول 5 زفت بنزين فى اليوم ...

لوكان راجل مهندس وبيفهم بجد ماكانش قالك الغاز افضل للموتور

وانه مش عارف كام اوكتان ...وانه بيقصف عمر الموتور لوكان عمل دراسة نص كم

كان شاف محطات الغاز قد ايه والزحمة عليها شكلها ازاى قبل ما يقول اللى يقوله

هى كلها هرتلة لتنفيذ اوامر شيل الدعم بدون التفكير فى كل توابعه

انه لو زاد تمن الوقود 5 قروش هيرفع اسعار كل حاجة واى حاجة

واحنا بس اللى هنتحمل ونشيل الطين .... عالم عايشة مع نفسها ...!!!!

حاجة تحرق الدم :(

بس النهضة حلوة مفيش كلام.

اقتباس:

---

المشاركة الأصلية كتبت بواسطة Elawany13

احد اصدقائى حاليا فى الأردن لمده اسبوع
فى زيارة عمل
الراجل مبهور بالبلد ونظافتها وناسها
ومبهور بمستوى البلد والرفاهيه اللى شايفها قدام عنيه

---

مهو البلد نظيفة مفيش كلام...
انا عايش فيها وبقولك خليه يسأل الناس ساكنه وراكبه ازاي....
اعرف صيدلي ساكن في بيت تحفة ما شاء الله
وراكب عربية كويسه...
البيت قسط على 20 سنه..
السياره قسط على 5سنين
اثاث البيت والمطبخ كله قسط...
وفي الأخير انت شايفه ساكن وراكب وعايش...
الله يعينه ويخفف عنه...
والأمثلة كتير جدا...
القروض هنا مش مخليه حاجه....

Sent from my SE Arc S using Forum Runner

طب ايه رأيكم في الاقتراح دا:
الحل ان الواحد يشتري عربية سيات خربانة ب 5000ج يرميها تحت البيت وياخد عليها كوبونات الدعم يمشي بيها عربيته.. متهيألي فرق سعر البنزين هايعمل في السنة ال 5000ج دول..
ينفع؟

انا كنت هشتري عربيه بس الاحوال متشجعش

اقتباس:

---

المشاركة الأصلية كتبت بواسطة timtim

طب ايه رأيكم في الاقتراح دا:
الحل ان الواحد يشتري عربية سيات خربانة ب 5000ج يرميها تحت البيت وياخد عليها كوبونات الدعم يمشي بيها عربيته.. متهيألي فرق سعر البنزين هايعمل في السنة ال 5000ج دول..
ينفع؟

---

ممكن جداً على فكرة وده هيفيد الناس بتوع المبيعات واللى بيلفوا كتير واستهلاكهم عالى، بس هتخليها باسم حد تانى ماعندوش عربية ..
لأن ماينفعش تصرف الكوبونات على عربيتين لنفس المالك.

وبرضه ممكن الاستفادة منها فى المشاوير الصغيرة أو تودى العيال المدرسة.

جه اليوم اللى اتعززت فيه الـ 126 والسيات ولقت اللى يدور عليها.

البية اللى بيقول 5 لتر فى اليوم دول بيعقبوا كل اللى عندة عربية وكل كلمة يقولك هو شارى عربية 100000 جنية هتفرق معاة
البة المحترم ميعرفش ان الناس اساسا زهقت من رفاهية النقل العام ومواعيدة الجميلة والاسلوب الامثل للسائقين فى التعامل مع الركب وشبكة الموصلات الواسعة والمتوافرة فى كل مكان ز
فالناس استهبلت وراحت جابت عربيات تقسيط علشان الرفاهية . الرفاهية بس .
البة جاى يهرج مش جاى يشوف حل
وبعدين العربية دى مدفوع لها جمارك وضرائب . وضائب على الترخيص .
وانا كمواطن انت بتعاقبنى انى اشتريت عربية بالتقسيط علشان اهرب من جحيم المواصلات العامة والزحام الرهيب
مانا بدفع ضرائب ع الدخل وتامينات وكل لما اروح اعمل اى ورقة يقولى ضرائب
وبعدين الحكومة بتاخد جمارك من البائع وضرئب
والعربيات اصلا غالية بسب الجمارك والضرئب طب بيع لى العربية زى دول الخليج العربية كاملة وهاى لين بنصف سعرها هنا
حسبى اللة ونعم الوكيل فى كل اللى مبيفهمش قبا مايتكلم

انتو ناسيين حاجه مهمه ان الموضوع ده هاياثر على اسعار السيارات 1600 وانت نازل وهايخللى سعرها يعلى بسبب ان الطلب عليها هايزيد

اقتباس:

---

المشاركة الأصلية كتبت بواسطة besso

انتو ناسيين حاجه مهمه ان الموضوع ده هاياثر على اسعار السيارات 1600 وانت نازل وهايخللى سعرها يعلى بسبب ان الطلب عليها هايزيد

---

مافتكرش ان ده ممكن يحصل دلوقتى
أكتر 95% من العربيات فى مصر 1600 وانت نازل.

الكلام ده كان ممكن يحصل لو طبقوها على العربيات أقل من 1400.

بس اللى أكيد هيحصل هو ان العربيات اللى فوق الـ 1600 هيتخسف بيها الأرض خصوصاً الموديلات القديمة اللى بيشتريها المواطن المتوسط.

اقتباس:

---

المشاركة الأصلية كتبت بواسطة ahmed_rahem

طب وفر الغاز الاول، دحنا بنستوردة ومحطات الكهرباء بتقفل علشان مش موجود!!!

---

الغاز اللي مصر بتستورده ده غاز البوتاجاز مش الغاز الطبيعي .

الدعم ده كارثة و أنا موافق أن يتشال خالص مش 5 لتر كمان .
و لكن

لازم يوفر للناس مواصلات آدمية تستخدمها يوميا للذهاب لأعمالها اليومية .
و نخلي العربيات للخروجات و التسوق بس .

بس مرة تانية ......... أنت معود الناس على حاجة ...... ما تجيش تشيلها مرة واحدة بدون وجود بديل .
أنا مش شايف الكلام عن توفير عدد أكبر من أتوبيسات النقل العام المحترمة .... أو حتى الكلام عنها !!!

ده غباء .......... شيل الدعم .......... ووفر مواصلات علشان الناس تلاقي البديل .

اقتباس:

---

المشاركة الأصلية كتبت بواسطة tutankhamoun

الدعم ده كارثة و أنا موافق أن يتشال خالص مش 5 لتر كمان .
و لكن

لازم يوفر للناس مواصلات آدمية تستخدمها يوميا للذهاب لأعمالها اليومية .
و نخلي العربيات للخروجات و التسوق بس .

بس مرة تانية ......... أنت معود الناس على حاجة ...... ما تجيش تشيلها مرة واحدة بدون وجود بديل .
أنا مش شايف الكلام عن توفير عدد أكبر من أتوبيسات النقل العام المحترمة .... أو حتى الكلام عنها !!!

ده غباء .......... شيل الدعم .......... ووفر مواصلات علشان الناس تلاقي البديل .

---

طيب ما الدوله موفره وسائل مواصلات كتير وكلها ادميه ابسطها وعلي سبيل المثال لا الحصر القطارات:angry26:

لاحول ولاقوة إلا بالله العلي العظيم
يعنى الواحد يقعد يحوش ويعمل جمعيات ويقسط علشان يجيب عربية تلمه هو وعياله وفي الأخر تيجي الحكومة وتدبح الواحد بسكينة طيب يبقى لينا ايه؟؟؟؟؟؟ ,حسبي الله ونعم الوكيل
ياسيادة الوزير انا راكب عربية قعدت ادفع في قسطها 3 سنين وتيجى سعتك تقولي حولها لغاز طيب انا معاك حولتها لغاز, شنطة العربية هيبقى فيها مكان انى احط فيها عربية بيبي وشوية طلبات البيت وحتى لو بقى فيها مكان لما اروح علشان افول غاز هل يترى هقعد في طابور طويل مستنى الدور , انا هطلب من حضرتك انك تلبس ملابس عادية وتركب مع واحد محول عربيته لغاز وتفتح شنطة العربية وتشوف حجم الشنطة وياسلام بقى لو عايز يطلع الإستبن وشوف مدى المعاناه وبعد ماتشوف بعينك روح اقف في بنزينة غاز واسنتى الدور وأحسب كده انت وقفت قد ايه .
فيه نقطة تانية قد يراها البعض رفاهية -الأن نحن في فصل الشتاء طيب لما الصيف يجي مع كمية الزحمة وسخونة الجو ولو فكر صاحب العربية المتواضعة انه يشغل تكيف العربية علشان عياله -هل 5 لتر هيكفوا ,طبعا سيادتك هتقلي طالما عايز تكيف يبقى ادفع -طيب الناس الي عايشة في أسوان (وانا بالمناسبة من أسوان ) درجة الحرارة تصل في الظل إلى 47 درجة يعنى لو انا عايز افتح الزجاج هلاقى الجو كانه جو من فرن -هل يترى ده ذنبى اني عايز اشغل تكيف .
بالمناسبة انا عندي طفلان 4 سنين وأخر 5 شهور -وسيارتى ليست فخمة للغاية وانما هي هيونداي فيرنا فيفا 1500 سي سي وكنت امتك قبلها شاهين يعنى الدعم مش هيتشال من الطبقة العليا بس بل من الطبقة المتوسطة وادعو سيادتك انك تعمل زيارة لوجه قبلي وتشوف بعينك .
اسف على الإطالة ولكن هذا ماجال بخاطري وانا على علم انه (مايلفظ من قول إلا ولديه رقيب عتيد )
واعلم ياسيادة الوزير انه (كلكم راع ومسئول عن رعياته )

شكرا على الاراء

ضحكوا علينا وقالولنا شفيق لو كسب هيغلي البنزين والسولار والعيشة كلها هتغلى
صدقناهم وما انتخبناهوش وادونا على قفانا وراحوا مزودين الضرائب ومغليين السولار والبنزين
وعلى رأي الشاعر: اجري يابن آدم جري الوحوش.. غير ضرب القفا لن تحوش
واعتذاري للقفا اني سيبته يتضرب تاني

اقتباس:

---

المشاركة الأصلية كتبت بواسطة thisisman

وزير البترول: من يعترض علي حصة «5 لترات» يحول سيارته إلي غاز..والنظام السابق استخدم «الدعم» رشوة للمواطن


دعا المهندس أسامة كمال - وزير البترول - اصحاب سيارات الملاكى الذين اعترضوا على حصة " 5" لترات التى سيتم تخصيصها لهم يوميا تحويل سياراتهم لتعمل بالغاز .

كما أوضح كمال أثناء حواره الاعلامى فى برنامج الـ"10 مساء " الذى يقدمه الاعلامى وائل الابراشى على قناة "دريم 2" أن سائقي الميكروباصات الذين اعترضوا على تحديد " 30 لترا " لهم عندما يأتون لعرض سياراتهم على المرور والضرائب يقولون إن السيارة لا تعمل سوى ساعتين فقط فى اليوم .

وقال وزير البترول :عندما نتحدث عن البنزين وتحديد الدعم يقولون السيارة تعمل 24 ساعة و30 لترا لاتكفى، لذلك نرجو منهم تحديد رقم معين مع العلم أنه لا توجد سيارة او سائق يستطيع العمل 8 ساعات متواصلة والا سيتعرض الراكبون للخطر .

وأضاف كمال اننا لن نرفع الدعم عن المنتجات البترولية على الرغم من أن التمسك بالدعم فى السابق كان رشوة من الانظمة للمواطن حيث إن لدينا 80% من الدعم يذهب لـ20% من المواطنين.

[youtube]http://www.youtube.com/watch?v=MfiJOacT65A[/youtube]

---

:36_1_37[1]:

يعنى ممكن تعبى تنك الغاز او انبوبة الغاز الطبيعى لعربيتك بنفسك ؟؟؟!! والمولد برضه

Wood Gas Generator. Ultimate Wood Gasifier Plans. Free Fuel for Life.

او اى غاز

https://www.youtube.com/watch?v=MaJ_-xmtsXc


https://www.youtube.com/watch?v=bDIiEjL5eGM


https://www.youtube.com/watch?v=Zygs9pb_zBw

بدون هباب

https://www.youtube.com/watch?v=2wzpvSnhmFA

:36_1_37[1]::36_3_10[1]::beat4::36_1_37[1]::11:

Wood Gas Generator. Ultimate Wood Gasifier Plans. Free Fuel for Life.

:36_3_10[1]::beat4::11: