الموضوع: تجربة سيئه جدا مع مركز زيرو لازالة الخرابيش والخدوش. :(

السلام عليكم
......
امبارح كنت قاعد زهقان
قلت انزل ادلع هنومة شوية (( العربيه علشان ما حدش يفهمني غلط ))
عربيتي كورسا الجديده
وانا بغسلها لقيت كذا خربوش خفاف كده في الكبوت والرفرف اليمين
....
قلت يا واد يا عطيه ما بدهاش
خدتها وطلعت على مركز زيرو ويا ريتني ما رحت
...قابلت الاستاذ امير وريته اللي فيها قالي 150 جنيه وشغلنا عالي وفنيين مدربين و و كلام الدعايه اللي انتو عارفينه ده قلتله اتكل على الله بس انا مش عاوز بوليش ولا كمبوند
قالي لا فندم احنا بنملي الخدش ما بنساويش البويه حواليه. .....
المهم جه الصنايعي نضف الرفرف وحط ماده كده على الخدوش وقعد يدعك فيها بالصاروخ. ..شوية لقيت الصنايعي بيبصلي وبيقلي هي مرشرشه يا باشا ؟؟؟
قلتله نعم يا خويا ؟؟جريت لقيت بسلامته شايل البوهيه خالص من على الرفرف والمعجون الابيض باين تحتها. ..
انا وقفت مصدوم قدام الموقف. ..قلتله سيب كل حاجه وجه امير وقعد يلون فيها ويقولي اطمن يا باشا هترجع زي الاول
والنتيجه النهائيه. .... زفت. اللون غير اللون وطبقة الورنيش مش مظبوطه وحاجه اخر عكننه. .. لا واللي ضحكني اكتر بيقوللي يا باشا اطمن ما فيش مقابل. .. هههههههه. دا انا اللي المفروض اخد منك مقابل العك اللي انتو عكيتوه. ...
طبعا انا ما رضيتش ازعق ولا اعمل مشكله لان اللي حصل حصل والزعيق مش هيقدم ولا هياخر كتير
والحمد لله لو علمتم الغيب لاخترتم الواقع. .
بس بحذركم يا جماعه علشان ما حدش يتخدع بالاعلانات ويوم ما تحصل حاجه هيجيبلك العيب في بوهية العربيه اللي هي الفبريكه بتاعتها. ....
هبقى ارفعلكم صورة ليها. ..
...
وعاوز اسال
هو انا ينفع ارش الحته دي ولا لازم الرفرف كله ولا اطنش وخلاص ؟؟

المشاركة الأصلية كتبت بواسطة hugan

طنش طبعا حرام عربيه جديده ترش فيها رفرف بالكامل

هو لو اترش ببوهيه سكينز اغلى حاجه وواد لعيب عمله وخصوصا انه مش مخبوط ولا حاجه. يعني هيطلع كويس باذن الله
هتبقى ايه المشكله ؟؟
غير افتكاسة بوية الفبريكه اللي التجار طلعولنا بيها دي ؟؟