الموضوع: لو اتنصب عليك احكلنا اتنصب عليك ازاى وناخد من تجربتك عبرة وعظة تفيد المجتمع كلة

انا بقي اول نصبايه كانت كالأتي

انا مبرمج وبشتغل ساعات كده من علي النت وفي نصابين كتيير وكنت دايما بشتغل علي مواقع مضمونه عشان محدش يضحك عليا وفلوس تبقي مضمونه وكتيير كنت بخصل الشغل كله وفي الأخر ماخدش حاجه بس بسبب اني محمتش نفسي من الأول وقواعد الموقع كانت واضحه
في مره بقي واحد قالي عشان تشتغل لازم تدفعلي 1000 دولار الأول عشان اضمن انك عايز تشتغل فعلا عشان انا هديك شغل كتيير وهديك كود وبرامج تعدل فيها ومش عايزك تاخدها تتصرف فيها لحسابك وكده

وقالي انه لازم نشتغل بره الموقع وفضل يقولي شوية حاجات وكان مقننع بغباء وكلمني في التليفون وعلي الشات وبعتلي الكود فعلا وابتديت احوله الفلوس وكان فيه سكرتيره ليه كمان وكله تمام
وزي العبيط حولتله الفلوس وكان 927 دولار ربنا مايوعي يتهني بيهم البعيد ولحد ماطمن ان الفلوس اتحولت ليه مسمعتش منه حاجه تانيه

الظريف انه هندي وفضلت ادور علي اسمه في الأول عشان اتاكد انه مش نصاب ملقتش اي حاجه
بعد الموضوع بتاعي باسبوع بدور علي الأسم لقيت بلاووووووووووووووووووي ونفس الحوار حصل مع ناس كتيير بل بالعكس في ناس عملتله شغل كمان ودفعت 1000 دولار ومخدتش فلوس

تاني مره:
ماجر شقه من سمسار في القاهره وفي تامين طبعا وكان خلاص الأيجار خلص وقلت للراجل عايز كمان 3 شهور او اكتر وقالي ماشي بعدها قالي صاحب الشقه بيبيع وبتاع ولازم تمشي
انا لما استملت الشقه كانت اي كلام خالص بس كنت مضطر وكان في حاجات بتبوظ بسرعه وحاجات متلزقه وكان اي حاجه يقولي ولايهمك مفيش مشكله ومش عارف ايه لحد ماجيت اخد التامين وجه يستلم الشقه ولقيته تقريبا عايز يجدد الشقه كلها علي حسابي وكل حاجه كانت بايظه اصلا يقولي انت اللي بوظتها
كان ليا 750 جنيه تامين حتي الآن مخدتش منهم حاجه واخر مره اتخنقت معاه في التليفون وكان بيقولي انه عايز مني فلوس كمان ولما اتحاسبنا طلع ليا 270 جنيه حتي الان مخدتهمش ومش بيرد علي تليفونه

الموقف التالت وده قريب:

عايز اشتري شقه ومش عارف وقررت اني مشتريش خالص دلوقتي وجيت القاهره لقيت مراتي بتقولي ان جارنا في العماره اللي ماجر فيها بيبيع شقته اللي في التامن ومفيش اسانسير
بكام ؟ قالت ب 120 الف
بيني وبينكم قلت وماله ونقسط ويبقي عندي شقه عقبال ماارجع من لقاهره ابيعها تكون ب 130 ولا حاجه وابقي كسبت واترحم من الأيجار
المهم صاحبكم راح للراجل وقابلني بحفاوه جامده مع اني عمره ماكلمته خالص وبقي كاننا صحاب وقالي خلاص الشقه بتاعتك وميهمكش حاجه وبتاع واتفقنا علي السعر اللي هو بقي ب 128 الف بالعافيه بعد ماكان عايز 130 الف
وانا لاسالت ولا قاوحت ولا اي حاجه ولافكرت في انها في التامن وهطلع وانزل ازاي والكلام ده

ودفعت في الأول 100 الألف من غير اي حاجه تضمن حقي غير عقد ابتدائي وهو فضل قاعد بعد ماكان هيطلع قالي لما تجيب الباقي
دفعتله الباقي وبعدها نقلت عفشي بيها بس عمري مافرحت اني جبت شقه
بعدها بسنه نقلت للأسكندريه تاني وبفكر مع نفسي افتكرت اني لما كنت بتكلم علي الشقه اللي في الأول اللي ماجرها اني مكنتش حتي قابل اني اشتريها ب 90 الف وهي اصغر شويه من الشقه اللي اشتريتها يعني لو افترضنا ان اللي زي شقتي اللي في الأول هتبقي ب 120 مثلا يبقي اللي في التامن ب 90 مثلا او ب 100 يعني انضحك عليا في 30 الف اقل واجب وفهمني ان الأسنانسير خلاص هيركب وحتي الان مش باينله ركوب ومش قادر احكيلكم حالتي النفسيه بقي عامله ازاي وبعد ماكنت هوفر فلوس بقيت مضحوك عليا في 30 الف او اكتر بكتيير ومش عارف ابيعها ولا اسيبها
وابني اتعقد من المدرسه بسبب السلم وانا بقيت اكره انزل تحت عشان مطلعش تاني وحاجه اخر قرف

يلا بقي زهقتكم معايا