الموضوع: ثرموستات كوعة و كاتينة و تطورات اسعار قطع الغيار

السلام عليكم

يوم السبت ماشي في امان الله علي طريق السويس (نفس المكان اللي الفرامل سابت فيه بالظبط والله متعرفشي المكان ده ماله) المهم و مرة واحدة حسيت ان في ريحة غريبة بس خفيفة جدا ببص علي عداد الحرارة لقيته بقي في الوسط بالظبط و شكلة مكمل رحت طفيت العربية و انا ماشي بس سبت المفتاح علي اول تكه علشان الدركسيون ميقفلشي و ركنت

فتحت الكبوت و قولت اشوف المياة موجودة لقيت المياة موجودة !!! ببص علي مكان ثرموستات الكوعة لقيتها بتعمل صوت تنفيس هواء قولت يبقي بتسرب

المهم في الاول كلمت محمد عبده الميكانيكي فقالي شغل العربية و استني المرواح تشتغل و شوف المروحتين بيطلعوا هواء سخن ولا واحدة بتطلع هواء سخن و التانية بتطلع هواء ساقع

قولتله فعلا ده اللي حاصل قالي يبقي الثرموستات قفش !!!

قالي افصل الفيشة اللي تحت الموبينة دي هتخلي المراوح تشتغل علي طول و علي اعلي سرعة و افتح غطاء القربة حاجة بسيطة علشان جوان وش السلندر ميضربشي و امشي بحذر

المهم وصلت الرحاب بالعافية و كل شوية اركن و كان موضوع متعب جدا

كلمت الاستاذ طارق ربنا يبارك فيه فقالي اتأكد الاول انها ثرموستات كوعة قولتله ازاي ؟ قالي شيل الخرطوم اللي راكب في الكوعه بتاعتها و دور العربية المفروض تطلع نافورة مياة و لو مطلعتشي يبقي قفشت فعلا

و شلت الخرطوم لقيتها مش بتطلع و قفشت فعلا !!!

المهم حاولت بكل الطرق اني اروح لمحمد عبده بس الموضوع كان صعب جدا جدا و كان خطر و فكيت العربية في الرحاب و عملتها و هنا تبدأ المشاكل بقي :

اول حاجة جبت الثرموستات من توكيل منصور اللي في الرحاب هي و الكوعة و سير الكاتينة و الشداد و لكم الاسعار الخرافية و كنت مضطر للأسف لاني مش هفك الكاتينة كل يوم و والله الكاتينة و الشداد القدام مكملوش 30 الف بس الحمد لله علي كل حال :

شداد كاتينة : 381 جنية !!!
سير كاتينة 181 جنية !!!
كوعة مياة : 45 جنية
ثرموستات كوعة : 25 جنية

استعوضت ربنا و قولت اللي حصل حصل و ركبت في الرحاب و انا بكرب بقي الاقي اييييييييييييه !!!

الاقي التوكيل الباشا العبقري جايب الثرموستات منغير الجوان بتاعها !!!!! لا و ايه بيبيع الجوان لوحدة ب 8 جنية !!! قولت مش هتفرق جبت الجوان و جي اركب الاقي التوكيل العبقري جايب جوان نوبيرا مش بيركب اساسا علي الثرموستات !!!!!!!!! و مفيش عنده غير ده و كلمت توكيل التجمع الخامس مفيش عندهم غير ده !!!!!

طبعا فضلت ساعة افرك و الف و في الاخر طلعت الجوان القديم الناشف المشروخ و ركبته غصب عني و حطيت عليه سيليكون حراري قولت اقلل الخسائر و ركبنا الكوعة بسيليكون حراري برضة و الكاتينة و الشداد و قفلت العربية و فضلت اقول حسبي الله و نعم الوكيل فيك يا منصور

امبارح بقي رحت ابو الحسن اجيب قطع غيار اكمل الحاجات اللي كنت حاططها في خطة التصليح فبسأل علي الشداد الاصلي لقيته بكااااااااااااام ؟ 275 جنية !!!فرق 106 جنية !!!!!

جبت عقربة فتيس ب 155 جنية اصلي
فلتر بنزين اصلي ب 40 جنية
فلتر زيت اصلي ب 20 جنية
بوجيهات ب 40 جنية NGK
سلوك بوجيهات اصلي ب 130 جنية
سير تكييف لاني اللي عمل العربية في الرحاب مشدش السير كويس فالسير اتقطع و كسر الطنبورة بتاعة شداد سير التكييف ب 30 جنية اصلي
شداد سير تكييف ب65 اصلي
جركن مياة خضراء موبيل 75 جنية
اويل سيل علبة دركسيون او اسكترا مش اصلي ب 35 جنية و ده مركبتهوش لسه

المفجأة بقي اني لقيت عنده جوان الثرموستات و متوفر جدا و اول ما قولت له عليه قالي اه المفتوح من النص ده استني اجيبهولك !!! يعني ابوالحسن عارف اكتر من التوكيل !!!
جبته و ركنته احتياطي للزنقات و مخدشي فلوسه كمان !!!!

رحت لمحمد عبده ركب الحاجات و اساسا بنفك سلوك البوجيهات علشان نغيرهم هم و البوجيهات لقيت سلك طلع متفرتك في ايده كان خلاص بيودع الحمد لله اني كان معايا سلوك جديدة
ركبت العقربة الجديدة و فرقت جدا في الفتيس بس برضة الاول فيه عضة لو جبته و العربية بتتحرك و ده انا كنت عارف انه مش من العقربة بس النقلات بقت احسن و الفتيس بقي انعم

دي صورة العقربة الجديدة
[IMG][/IMG]

كده بقي انا فلست بجد بسبب العربية دي مصاريف مصاريف مصاريف مفيش رحمة !!!

فاضل اويل سيل اسكترة و اويل سيل كنك خلفي و اويل سيل كوبلن شمال ربنا يسهل لما افوق من الصدمة هعملهم لاني فعلا زهقان جدا

و اخيرا الحمد لله ان موضوع ثرموستات الكوعه ده حصل و لاعربية معايا مش مع مراتي ده ستر كبير من ربنا و فضل مقدرشي انكره و الحمد لله اني اخدت بالي قبل ما العربية تسخن علي الاخر