أنا آسف كلامى ممكن يبقى مش على هواك لكن لازم أقوله لوجه الله:
1- الفيزا الحرة دى إنت بتيجى السعودية على كفالة شخص أو شركة أنت بتدفع له مصاريف الإستقدام حوالى 3000 ريال غير المبلغ اللى بياخده منك السمسار اللى بيجيبهالك (حسب سعرها ) يعنى المبلغ الكبير اللى بتدفعه أول مرة أغلبه رايح للسمسار اللى بيبيعك للكفيل يكمل معاك.
2-بعد ما توصل طبعا الكفيل بياخد منك مصاريف إستخراج الإقامة و التأمين و الطبى و كل حاجة ده غير اللى حياخده لنفسه.
3-الكفيل حيتفق معاك على المبلغ اللى حتدفعهوله كل شهر لإنها تجارة طبعا ( أو لو إنت جاى تبع واحد معرفه ممكن مايخدش منك حاجة غير المصاريف )
4- طبعا إنت معرض لإبتزاز الكفيل كل شوية و حالات أعرفها جيدا كانت بتحكيلى مثلا واحد كفيل عامل حادثة بالعربية و عايز يصلحها يروح يتحملج على الناس اللى على كفالته و ياخد فلوس منهم عافية و هكذا . حسب أخلاق كل واحد .
5- إنت على حسب مزاج الكفيل إما يسيب الباسبور معاك أو ياخده و يبقى معاك الإقامة بس .يعنى إنت معرض إن باسبورك يكون محجوز معاه و ده الذل بعينه لو طلع معندوش ضمير
6-طبعا عايز تشترى عربية أو تطلع رخصة أو تعمل حساب بنكى يبقى لازم موافقة الكفيل و إدفع يا سيدى .
7- خروج و عودة يبقى تدفع يا سيدى حسب ما يطلب
8-أى مصاريف جديدة زى موضوع 2400 ريال فى السنة على كل وافد طبعا إنت بتدفعها
9- بعد كل ده مطلوب منك تبحث عن شغل و إنت وحظك و مافيش حاجة مضمونة
معلش أنا طولت لكن من اللى بشوفه فى السعودية : كتير قوى بتكون القعدة فى مصر أرحم و أهون من الفيزا الحرة