اختار مين بظبط حد يقولى ؟

يا جماعة انا قدامى عربيتين مش عارف اختار بينهم وحبيت اقوللك وتختارو معايا انا قدامى عربيةbmw موديل 81 للى هية شارك بس 323 i اوريجنال بحالة نضيفة جدا بس فيها موتور 320 يعنى 2000 سىسى موديل 90 انجكشن فابريقة من الداخل نضيفة جدا من الخارج طبعا مع طقم جنط وعلبة شكمان اصلية وكرسيين ريكارو اوريجنال وكدة دى العربية الاولى اما بقى العربية التانية فهى فيات 132 موديل 79 نضيفة جدا برده حالة اكتر من ممتازة وتكيف وبور وزجاج كهربة وجنوت وكدة برده بس كانت مرفوعة لفترة وعلى فكرة هية 2000سىسى برده بس كربراتير ويعتبروا الاتنين متقاربين فى السعر . احب اعرف اى عربية فيهم احسن واحسن ليه والفرق بينهم من ناحية البنزين والصيانة والضريبة والاداء وقطع الغيار وياريت لو حد عنده فكرة يقولى سعر bmw دى تعمل فى حدود كام كدة والفيات دى برده وشاكر ليكم على المنتدى التحفة ده بجد جميل جدا ويا ريت القى حد يفدنى فى الموضوع ده

همم ... بس يا سيدي .. الاختيار يرجع ليك في الاول و في الاخر ...
بس انا هاساغدك في كام نقطه ... لو هاتختار بين فيات و بي ام ... خد البي ام لو البي ام بالنظافه اللي بتقول عليها .. بس خد بالك قطع غيارها فيها حاجات شحيحه شويه زي مثلاُ الكنصول بتاع العربيه المكيفه ..
لو العربيه دي 323 اوريجينال حاول تشوف الموتور الاصلي بتاعها راح فين علشان لو 323 اوريجينال يبقي تسوي الفلوس ...)originality) ... و مهم برضه تكون حاجات ال 323 أل 6 سلندر تكون موجوده برضه .. لو يه صور للعربيه يبقي تمام ...
الفرش اللي جوه ... كراسي ريكارو الاسبور خالص دي ولا كراسي ريكارو بي ام ؟

العربيتين كويسين و عربيات اعتمادية لكن ممكن يكون فيه اكتر من وجه للمقارنة و في الآخر الموضوع يتوقف عليك :

1- اعتمادية العربية و متانتها ==> الإثنين
2- توافر قطع الغيار ==> الـ 132
3- أسعار قطع الغيار ==> الـ 132
4- سعر إعادة البيع ==> الـ 132
5- الشكل الخارجي ==> الـ Bmw
6- الإستهلاك ==> الـ Bmw ( لأنها انجكشن )

**انا عن نفسي هختار Bmw **

اهم شيئ السعر المعروض عليك كام؟
انا افضل فيات 132 في المستعمل بس تكون نظيفه وهي قطع غيار رخيصه وقويه جدا وفيها رفاهيه وتشبه في الشكل bmw نفس التصمييم الخارجي مع فارق الجوده والقوه لصالح bmw لو انا مكانك 132 افضل

حضرتك خد بالك من نقطه ان ال بي ام اثنين باب بس و ال 132 اربع باب و حضرتك شاب و ليسه امامك فتره علي الجواز ولا مقبل علي الموضوع و العربيه ياتري حتقعد معاك فتره ولا لأ و بعدين ال بي ام ثقيل في بيعه شويه
بس هيا عربيه حلوه و ليها ميكانيكيا مخصوص مش اي حد يشتغل فيها و قطع الغيار غاليه و حتلاقي مصنعية الميكانيكي غاليه بردوا اعتمادا انه بيشتغل في بي ام
لكن الفيات حدث ولا حرج اي حد بيشتغل فيها و قطع غيار رخيصه و كل حاجه وواسعه و بتتباع بسهولة حاجات كتير يعني

بجد شكرا ليكم بس فى حاجة نسيت اقوللكم عليها على فكرة ال بى ام دى الموتور للى فيها بتاع الدبانة للى هية موديل 90 و2000سىسى و6 سلندر فا انا برده ببص لموضوع الضريبة والبنزين وياريت لو حد بيعرف فى اسعاره يقولى المتوسط بتاع العربيتين كام بظبط ؟