استلمت اخيرا لوجى الاتو .بس قلقان من حاجة

الحمد لله استلمت لوجى الاوتو من توكيل مصر الجديدة وبصراحة الناس كانت كويس معاية جدا رغم انهم اجبرونى انى اكون اليوم دا اجازة من الشغل عشان مابيسلموش جمعة وسبت والاستلام من الساعة 2 الظهر ل 6 باليل بس الحمد لله استلمت العربية

المهم انا عملت غالطة كبيرة كبيرة اول ما استلمت سوقت و انا رافع فرامل اليد حوالى 20 او 25 متر لحد البنزينة وهناك لفتو نظرى للموضوع دة

بعد كدة بيوم وانا سايق بدوس فرامل بسمع صوت صفارة (السرعة حوالى 60) بس بتفرمل كويس الحمد لله وكمان لحظت بودرة سودة فى العجل الامامى وانا بركب الافيز فى الطاسات
انا كدة مش عارف التيل كدة انتهى ولازم اغيروا ولا الصفارة دى طبيعية عشان التيل جديد
ياريت حد يرد عليا عشان انا قلقان جدا.

ألف مبروك اولا ويارب يديك خيرها ويكفيك شرها يارب :) ما تقلقش ان شاء الله بسيطة حاول تغسل العجل علشان نظفة من البودرة يمكن يكون ناتج الاحتكاك بيخلى التيل يصفر وعلى فكرة لو الفرامل كانت مشدودة صح مكنتش هتعرف تمشي بالعربية اساسا والمسافة برضو صغيرة قوي واحنا فى الشتاء والجو بارد فتاكل التيل بيبقى اقل , جرب وقلنا اللى حصل معاك ولو فى حد عندة راي تاني ياريت يشارك بية ويفيدنا.

عادى متقلقش .. ربنا يباركلك فيها 20-25 متر ولا حاجه خالص :)

هو يمكن يقصد 200 متر او 250 متر مش معقوله 25 متر بس من الصاله للبنزينه

ولا حتى ٢٥٠ متر تفرق فى حاجه

مفيش حاجة حصلت
واستمتع بالعربية
وبودرة التيل ده عادي
والف مبروووووووووووووووك

اولا : الف مبروك ياباشا وربنا يديك خيرها ويكفيك شرها
ثانيا : كلام الاخوة الاعضاء مظبوط ومفيش مشكلة ومتقلقش وأنا باردو زايك استلمتها من مصر الجديدة ومشيت وفرامل اليد مرفوعة زايك عادى المسافة بسيطة
ثالثا : البودرة دى حاجة طبيعية عشان تيل الفرامل لسه جديد وهتلاقيها موجودة فى الفترة اللى جاية كمان وملهاش علاقة بفرامل اليد لان فرامل اليد بتكلبش ورا لو انت شادت الفرمل كويس العربية مش هتمشى خالص

متقلقش يا باشا بس ابقى خليهم في صيانة ال5000 يشدولك فرامل اليد شوية

الف مبروك يا باشا ..

الف مليون مبروك :)
مش هينفع ازود كلام علي اللي اتقال :)

انا مرة مشيت بفرامل اليد مشدودة لمسافة 10 كيلو على الاقل بس الكلام دا كان فى نيسان صنى ومحصلشى حاجة الحمد لله

الله يبارك فيكوا يا رجالة وبجد طمنتونى عشان انا كنت قلقان جدا

الف مبروك
متقلقش انت راكب رينو يعني عربيه بجد مش هزار
استمتع