الموضوع: تحسين عزل سوزوكي الـتـو و تركيب فرش ارضية جلد (حصريا ع نايل موتورز)

بسم الله الرحمن الرحيم
السلام عليكم و رحمة الله و بركاته

بسم الله الرحمن الرحيم
السلام عليكم و رحمة الله و بركاته


ناس كتيير كانوا في انتظار موضوع تحسين عزل السيارة بعد متابعة الموضوع التالي

http://www.nilemotors.net/Nile/320377-a.html

( ده كان موضوع مهبب ... انت اتنيلت شرفت بدأنا الهم )

و ادي ضميري ضلم الموضوع عشان الناس اللي كانوا بيسألوا عليه اهو جالكم

المهم خلونا في موضوعنا اخيرا تم بحمد الله شراء المواد و تغيير ارضية السيارة بفرش جلد بدلا من الموكيت بالاضافة لزيادة عزل الصوت و يعتبر حرارة في نفس الوقت

اولا قمت بالنزول للمناصرة و شراء الخامات و هي

جلد الارضية سعره المتر 25 ج عرض 148 سم تم شراء 2 متر ( مع العلم اني جبت خامة طرية جداا عشان متقرفنيش في التقطيع و في فرشها في الأرضية )
لباد شعر سماكة 5 ملم سعره المتر 15 ج عرض 2 متر تم شراء 2 متر
كيلو و نص غراء سعره 9 ف 3 = 27 ج و يا ريتهم كفوا هههههههه ( هقول ايه فاشل كيلو و نص مش مكفينك .... يا عم هي لحمة مكنت تورينا شطارتك و انت قاعد تلف حوالين نفسك عشان تلزقها )




بالاضافة للادوات المستخدمة للفك و التركيب و التقطيع
و هي بيبة و مفتاح مقاس 15 و تفرق من عربية لاخري
مفك
مقص - كاتر
و اهم الادوات التي شيرت النص كوم في عز الشتا و البنطلون الجينز ذات مقاس مليون لارج للتحرك بحرية كاني بصطاد من فوق المركب و الشبشب المرعب قاهر الرمال الطريف ان اليوم ده كان الاسبوع اللي فات لما قلبت امطار و برق و رعد و رياح و كانت الكراسي و الكنبة في الشارع و شربوا احلي شرب لما اتسطلوا هههههههه
(ادينا اتروقنا في عز السقعة و المطرة ... اتكلم عن نفسك ده احلي شغل و انت غرقان D: )

بداية الموضوع اني طول الوقت حاسس ان الموتور في الصالون جوة و اي نقرة او فتحة في الارض بحس انها بترزع العربية كلها و طبعا مفيش عزل و الموكيت راكب ع الصاج و يا ريتهم مكملينه للتابلوه و للأسف ظلمتهم طلع ان التابلوه من ورا نازل لحد تحت ده غير ان مفيش عزل تحت الكبوت
ده غير قرف الموكيت في التنضيف و اتقطع طبعا محدش يبص للقرف اللي انا عامله في العربية ههههههههههه لأني من ساعة ما جبت الخامات و هبدأ شغل شيلت الدواسات و خليت العربية ع موكيتها و بدأت انتقم و اطلع غلي فيه و افرفته برجلي عيند لدرجة اني كنت بتعمد اخد الرمل برجلي جوة ههههههههه و ادي عينة من اللي عملته في العربية ( ده انت مرمتها مبقتش تسوي نكلة ... و انا هخليك متسواش سحتوت مصدي )




اولا هنفك الكراسي و الكنبة بس لازم نفك الكونسول اللي في الوسط لأن المسماير تحته و بعدين نشيل بعض الفيبر فوق المسامير زي ما واضح في الصور و طبعا انا كنت في حالة يرثي لها لأني بفتكر اللي قاعد ورا عاملي ايه في فيبر العربية





















اول ما شوفت المنظر قولت ما شاء الله العربية حلوة كده ما كانوا شالوا الكراسي و خلوا كرسي السواق مكان الكنبة هههههههههه( ع اساس انك هتطول يا اوزعة ... يعني انت اللي ابو طويلة يا قزم )




هنفك الكونسول اللي في الوسط بالكاب هولدر و بعدين الفيبر ع الابواب
ثم نشيل الموكيت و طبعا الصدمة ع البلاوي اللي تحت الموكيت هههههههههه
و بدأت رحلة تنضيف العشة ديه هههههههههه ( ده عشة الفراخ انضف منها ... و انت مالك عربيتي و انا حر و لو مش عاجبك روح نضفها )

اخدت الموكيت القديم و طلعت فردته ع اللباد و الفرش الجلد عشان اقطع مكان المسامير و الفتيس و خلافه و طبعا زودت الطول عشان يوصل لورا التابلوه بدل الذل اللي كانوا بيذلوه ليا بالموكيت القصير و انا نفسي مكملتش اكتر من اللي هم عاملينه طلعت ظالمهم و الاجزاء واصلة لحد تحت ههههههههههههههه
و نزلت فردت اللباد عشان اشوف المقاسات و ديه النتيجة



طالما طلعت مظبوط اخدت اللباد ع الجلد و ظبط مقاساته
ثم نزلت فرشت اللباد و لزقت من الاطراف ناحية الابواب و تحت الكونسول و الزوايا
و استنيت لحد ما لزق لأن جايب غرا خفيف جداااا يكاد يكون زي الزيت بدل التقيل عشان مينشفش بسرعة و يمسك عشان اي تظبيط و ديه النتيجة النهائية للباد ما شاء الله تحس ان فيه أمل في العربية ديه



و بعدين جبت الجلد و فردته و فعلا الخامة الطرية ساعدتني في التقطيع و لزق من نفس الاماكن لكن زودت الغرا شوية خاصة تحت الدواسات و بصراحة اتقرفت جداااااا بسبب ان العربية مليانة مطبات و اسلاك و حاجات غريبة اللباد كان اسهل من الجلد تخيلوا !!!



و الشكل ما شاء الله بقي كده قبل التقفيل و الشد النهائي



و بدا التقفيل النهائية لتركيب الفيبر و الكراسي و الكنبة ثم باقي الفيبر و ديه النتيجة ورا و قدام





تفتكروا خلصنا كده ؟؟؟ اكيد لأ نسيتوا عزل الكبوت لزيادة كتم الصوت ده غير ان البطارية بهدلت الجزء اللي فوقيها في الكبوت و لازم اعزل بدل ما الاقي الكبوت فتافيت فتافيت ( فتافيت السكر هانم ... بس ياض )
ده الكبوت قبل ما اشتغل فيه محدش يركز مع شخبطة القلم الرصاص اللي ع الكبوت أصل ساعتها أغنية شخبط شخابيط كانت شغالة و اندمجت معاها ههههههههههه ( شخبط شخابيط .... بس يا عم الفنان )



مش هوجع دماغكم باخد المقاسات لأني اتشقلبت و تم اخذ القياس بوضع ورقة ع كل مكان و تحديده بالقلم و بعدين التقطيع
و قبل بدأ لزق القطع جبت بواقي اللباد اللي اتقطع و حشيت الفراغات اللي تحت العضم و بعدين بدأت لزق كل قطعة علي حدي زي ما انتم شايفين النتيجة و طبعا زي ما شايفين البطارية عملت ايه في الكبوت من تحت





و ديه صورة بالنهار لأني ساعتها كنت شغال بليل ع نور كشاف الموبيل و في عز المطرة ههههههه غاوي اقرف نفسي ( فقري طول عمرك ... مهو طول ما انت قاعدلي هتفضل كل حاجة منحوسة )



كنت لسه هعمل طبقة تانية بس تكون حتة واحدة بس لسه ملقتش الكلبسات المناسبة

طبعا الناس هتسأل ..... طب مفيش مشاكل من وجود اللباد ع البطارية ..... معتقدش ان يكون فيه اي خطر لأن ده عبارة عن فتل و قطن و شوية مواد غريبة لكن منستش اهم حاجة اعملها و هي طبقة ثانية زيادة من الشحم ع قواطيش البطارية و الافيس الواحد برده لازم يكون في السليم و من غير حاجة احنا بنحط الشحم

و الشنطة كانت عزلها جاهز من الأول طبقة حوالي 5 سم مش 5 ملم لباد زي الصوف كده بيكتم طبعا احسن بكتيير و كنت اتمني الاقيه لكن ملقتش منه في اي مكان بالاضافة لطبقة خشب ام دي اف تحتها و فوقيها موكيت ثم جلد

بالاضافة لكتم صوت الابواب
http://www.nilemotors.net/Nile/319927-a.html


و الليلة ديه خدت مني حوالي 6 ساعات متواصل ناهيكم عن اني قربت اشتغل سروجي و ميكانيكي في منطقتي و لا الجماهير المشجعيين في البلكونات

و بعد تجربة العربية الصوت بسم الله ما شاء الله اتكتم عن الأول و العربية واقفة او و انا سايق بعد ما كنت بحس اني الموتور قاعد ع التابلوه قدامي
بالاضافة اني مبقتش اسمع صوت النقر او الفتحات في الارض تاني و بقي الصوت مكتووم ( فكرتني بالعربيات الفيخمة ... لوللا أفخم من اي عربية يا أهبل )

طبعا كنت بفكر في عزل للابواب زيادة بجنب العزل الداخلي لكن قولت اشوف العزل لحد التابلوه و الكبوت هيعمل ايه و الحمد لله الصوت اتكتم و مش محتاج اعزل اكتر من كده

و بكده تم بفضل الله و حمده تغيير فرش السيارة و تحسين عزل الصوت


لكن المرة ديه بفكر في عزل مختلف شوية معرفش حد جربه قبل كده و لا لأ لكن مش هقولكم دلوقتي عليه هخليه مفاجأة P:
( ايه ايه ها ايه قول ها ايه ايه .... اخرررررررررررررررس )

و انتظروني ان شاء الله في مفاجأت كتيييير خلال اليومين الجايين :)

بالتوفيق للجميع