الموضوع: كنت ناوى اجيب لانوس و حظرونى - ارجو الافاده

المشاركة الأصلية كتبت بواسطة mtolaymat

منتظر بجد

اسف للتأخير في كتابه مشاركتي ....

اولا : انا بحب اللانوس جدا من اول ما نزلت مصر ....و بدايه معرفتي بالعربيه دي كانت في سنه 2000 تقريبا و كانت علي ما أتذكر ب 35000 او 40000 جنيه تقريبا .... حتي بعد ما نزلت الفيرنا و اصبحت منافس قوي للانوس و لكن من خلال سواقتي عربيات اصدقائي ايامها اللانوس و الفيرنا ...ارتحت اكتر للانوس .... و قلت في يوم من الايام لما ربنا يكرم و اجيب عربيه زيرو حجيب لانوس ...

نبدأ سرد قصتي مع الشيفروليه لانوس و ممكن صاحب الموضوع يعتبر مشاركتي تقييم و ممكن يعتبرها حظي السيء :

23/12/2010 اشتريت شيفروليه لانوس من شركه المنصور للسيارات ... يعني قبل الثوره بشهر .....صديق ليا في معرض سيارات شهير قاللي تعالي خدها من عندنا و لكن انا قلت اجيبها من الوكيل أضمن .... و الوكيل هنا ( المنصور للسيارات ) ...و طبعا كان مطبوع في ذاكرتي الشعار الشهير ( مع منصور انت في ايد امينه ) .... و فعلا ... وقعت في ايد الحاجه امينه

1- تم استلام السياره بعد حجزها ب 48 ساعه ... و فحصتها كويس انا و اتنين اصدقائي و جربنا كل حاجه و صديقي لاحظ و جود فرق في الكبوت عباره عن نص سم من عند الاكصدام ... سألنا مندوب المبيعات اللي بيسلمنا قال ده خلوص مسموح به لان السياره تقفيل مصري و بيتم ظبط الموضوع البسيط ده في التوكيل .... قلتله يعني عادي ... قاللي عادي جدا و وراني كذا عربيه واقفه و لقيت في بعض الملاحظات البسيطه .....

2- استلمت و مضيت علي الاستلام ....خدت عربيتي و رخصتها و علقت النمر .... و رحت التوكيل منصور الهرم الكيلو 4.5 و اليوم ده كان 17/1/2010 قبل الثوره باسبوع ....و قعدت اليوم ده من الساعه 9 صباحا لغايه 7 مساءا متواصل .... و طبعا كنت رايح عشان اظبط موضوع الكبوت و مكانش في دماغي اصلا ...انا كان عندي ملاحظات تانيه زي ان العربيه بتحدف يمين و الدركسيون في النص ....و ملاحظتين تاني دلع كده عالماشي :-))

3- خدوا العربيه و قالولي استني في الاستراحه ....بعد حوالي 3 ساعات جالي المهندس و قاللي معلش فيه ضغط انهارده جامد جدا و ان انا اصلا مش حاجز و المفروض اني حطول شويه معاهم ....قلت عادي ....الساعه 3 تقريبا ....جاللي المهندس و قاللي انت عاوز تظبط كبوت اايه ؟؟؟؟؟.........قلتله اللي ادامك ده .....قاللي يا بيييييييييه العربيه مخبوطه من الجزء ده و مرشوشه .........( انا حسيت اني حيغمي عليا بجد )
المهم عشان مطولش و لو إني طولت :-))).... زعقت و اتشلت و اتهبدت و قلتلهم مدير الفرع فييييييييين ....قالولي عاوز مدير الفرع ؟....قلتلهم هاتولي مدير الفرع ......و جابولي مدير الفرع .....اول ماا شفنا بعض انا و هوه و كأن كان فيه تار من 10 سنين مثلا .... و زعيق و الذي منه .....و في الاخر قاللي هدي اعصاابك ....و قاللي احنا هنا بتوع صيانه .... و انت عربيتك مخبوطه .....و انا معرفش انت اللي خابطها و لا الفرع اللي اشتريت منه هوه اللي خابطها ..... قاللي ععشان متضيعش وقتك و وقتنا ... روح علي مدير الفرع و اتفاهم معاه ........ ( طبعا بقيت الملاحظات متعملتش ... لان الكلام ده كان قبل الثوره و حشرحلكم لاحقا ايه الفرق بين منصور قبل الثوره و منصور بعد الثوره ) .

4- رحت لمدير فرع منصور اللي استلمت العربيه منه و قاللي الموضوع بسيط ممكن تكون اتحكت من السوااق عند الاكصدام و خاف و رش الجزء البسيط من عند الاكصدام .....قلتله و انا ايه االلي يضمنني ان العربيه مش مقلوبه مرتتين قبل كده ؟؟؟؟:-))))

5- قلتله انا عاوز ابو جوده يا حبيبي :-))..........اقصد مدير عام القطاع التجاري بالشركه .....قلتله و الا حعملك محضر هنا حالا ......و هوه الصراحه اتصل بالراجل و سمعت الراجل مدير القطاع التجاري بيشتمه و االشتيمه خارجه من التليفون .... و قاله ابتتعهولللللي بكرره ..........

6- رحت الاداره في جامعه الدول العربيه .... و قابلت الراجل و اتخانقنا خناقه لرب السما ... و في الاخر قااللي اناا حاسس بيك ....قلتله اناا ازاي اشتري عربيه من الوكيل و يكون عليها نقطه بويه علي بويه المصنع ؟؟؟؟........قااللي احنا فحصنا ملف العربيه و غير مذكور ان فيه اي حواادث او اصلاحات حصلت ....

7- قاللي اكيد السواق و هوه بيوصلها من المخزن في ابو رواش للفرع ... عربيه ريحت عليه و خااف و راح رش الجزء اللي في الاكصدام اللي اتكحت .... قلتله و النص سم بتاع الكبوت اللي بارز لبره ؟؟؟......قاللي انا حكلمك زي ابني .... حلف بكل الاديان ان الموضوع ده لا يذكر و تافه .......و قااللي و الله انتت لو مكنتش رخصت العربيه اناا كنت خدتها منك و صرفت لك عربيه بدالها .....( يعني مبدأ الترجيع موجود بصرف النظر العربيه فيها ايه .حتتتباع تاني لزبون تاني )

8- المشكله يا جماعه في الثقه .... ازاي اجيب عربيه من الوكيل و فيها حاجه زي كده ....و اضمن منين انها مش عامله حادثه مثلا ....

9- المهم االراجل كان ذوق و اتصل بيا بععد كام يوم و قااللي ابعتتلي صوره الرخصه عشاان حصرفلك تعويض يرضيك جدا ............

10- قلت بسسسس....... هيه كده عامله حادثه وش ..........اخوياا قاللي انت وقعت في ايد امينه و مفيش حاجه تثبت ان الخبطه من عندهم لانك استلمت .... قاللي خد التعويض و ربناا يعويض عليك ....

11- حصلت ثوره 25 يناير المجيده قبل مستلم التعويض ...اناا قلت خلاص ....كده بخ .

12- اتصلوا بيا الصراحه يوم 10/2/2011 و رحت استلمت التعويض و اقسملكم بالله و لا حسيت ان التعويض له قيمه .... و حسيت اني خدت اكبر قلم في حياتي ....

رضيت علي مضض بالامر الواقع و انا نفسي قافله من العربيه تماما.... تخيلوا الاحباط ....واحد كان عاوز ععربيه زيرو بقالوا 8 سنين و يوم ما يركبها يبقي نفسه قاافله منها ......

بدأتت رحله التعامل مع التوكيل بعد الثوره .... و ده الفرق بين قبل الثوره اللي قلتلكم حشرحه لكم ....قبل الثوره رحت التوكيل 3 مرات و لاحظت برود المهندسين و بلاطه العمال ... و محدش فعلا عاوز يشتغل و الناس كلها بتشتم و بتزعق . ...

بعد الثوره اتعاملت مع التوكيل و علي الرغم من العيوب لكن المعامله اختلفت ... بقه فيه ذوق الي حد ما و بيغيروا القطع للعملاء بدون مماطله من المهندسين ...بقه فيه مرونه و بقه في شيء من الاهتمام .

العربيه حالياا عامله 33000 كم .

1- بدأت مشكلتي مع حدف العربيه يمين و الدركسيون في النص .... و كان العلاج ترصيص و ظبط زوايا بره التتوكيل ....لان الجهاز عطلاان في االتوكيل اصلا .... ( و بالمناسبه احقاقا للحق ... كتيب الضمان مكتوب فيه ان اعمال الزوايا و الترصيص لاا يشملها الضمان ) .... بس همه بيعملوها جدعنه .

2- وجود طقه عند تحريك الدركسيون و العربيه واقفه و دايره ....و الطقه دي بتحسها في ايدك من الدركسيون و احيانا تحسها من عند رجلك من عند الدواسات .... انا قلت دي علبه دركسيون ........و في الاخر طلعت الفبره اسفل عمود الدركسيون محتاجه تبات في مكانها كويس .... و عرفت انهاا بتقع من مكانها في كل اللانوس حتي من ايام الدايو .

3- الزجاج الخلفي شمال و الامامي شمال كان فيه تكه عند القفل و الفتح و تقل في الطلوعع و النزول .....و االعلاج كان تغيير كاوتش البابين بالكامل و تغير شاسهين البابين ايضا ....

4- مهندس من التوكيل بيجرب العربيه معايا و فجأه قاللي العربيه عاوزة ماستر عمومي و كانتت عامله 9000 كم .... و بصراحه مكنتش بشتتكي من حاجه في الفراامل بس قلت اكيد هوه لاحظ حاجه ....و تم تغيير الماستر العمومي ..

5- وجود تزييق من عند االكنبه و فيه حد قاعد ورا سواء يمين او قاعد شمال و ذلك عند النزول من ععلي مطب صناعي .... و مهندس التوكيل ساعتها ( كانت عامله 200 كم فقط ) ....قاللي ده ترييح فرش .... و الصوت مازال حتي الان ( حااليا العربيه 33000 كم )

6- مشكلتي الأزليه اللي بيشتتكي منها العضو / أمير .... و هيه حدوث نتشه قويه بالعربيه بعد ساعه سواقه و التكييف شغال و ذلك في الجو الحر جدا ....يعني مثلا درجه حراره 38 او 40 .... الايام النار بتاعت الصيف .... سألت كل اللي اعرفهم و الخبراء هنا في االمنتدي و محدش شاف العيب ده قبل كده ....و بالمناسبه العيب ده مبيحصلش بالليل خالص .

و التوكيل مش عارف اساسا يشوف العيب لان مبيظهرش معاهم ... بالاضافه مفيش مهندس فاضي يسوقها ساعه ....و بصراحه همه عرضوا عليا اسيب العربيه اسبوع ... و تكون فأر تجارب لكل العمال و المهندسين و أنا رفضت تماما .

و بناء علي تشخيص الخبراء هنا... ناس قالت ده عيب موبينه بتقطع في الحر ... و نااس قالوا طرمبه بنزين بتسخن تقطع .... و ناس قالوا سلوك بوجيهات ....و ناس قالوا حاجه في الضفيره ( و ده الارجح للاسباب التاليه :
التوكيل مشكورا غيرلي البوبينه و طرمبه البنزين و العيب مازال موجود .....

و بالمناسبه الموبينه هيه هيه بتاعت اللانوس اللي بقالي 15 سنه ....مكتتوب عليها dac .... و طرمبه االبنزين مش صيني و لا حاجه و خرجت ادامي و مكتوب عليها kafus ....يعني اصليه مش صيني .

الضفيره هيه اللي مصري .... و مععرفش من موديل سنه كام الضفيره مصري بس اعتقد من اياام الدايو .

غيرت بليه شداد تتكييف و سير تكييف مرتين ورا بعض خلال شهر في التوكيل ... و العيب كان صوت تصفير سيور و االعربيه واقفه سلانسيه.

صوت الموتور عالي من اول ما جبت العربيه و سمعت كل ما تيسر لي سماعه من مواتير الشيفروليه لانوس و لقيت الصوت واحد .... و محمد ممدوح ربنا يكرمه و يفك كربه من حوالي شهر ونص سمع صوت الموتور و قاللي هيه اللانوس صوتت موتورها كده ....و طبعا كلكم عارفين قيمه محمد ممدوح و ارائه في المنتدي ... و كذلك طارق _2005 قاللي هوه صوت الموتور بتاع اللانوس كده و طارق من الناس الفاهمه جدا و ثقتي فيه كبيره .

لكن انا قررت اجرب زيت فيسكو 5000 بدلا من موبيل 1

كده انا نقلت تجربتي كامله مع اللانوس و اسف للاطاله

العربيه كتير عليها 73000 جنيه و كذلك كتير علي الفيرنا و كذلك كتير علي البي واي دي و كذلك كتير علي اللوجان ( دي وجهه نظري ) ......اللي معاه يزود 20000 كمان و يركب فئات اعلي حيرتاح من عيوب االتقفيل المصري .....و اللي مفيش امكانيه يبقي افضل اختيار الانوس ...برغم اي عيوب ....للاسباب الاتيه :
1- قطع غيارها متوفره و باسعار مناسبه جدا
2- كل الميكانيكيه خلاص فاهمنها .
3- اقل اعطال بالنسبه للحساسات ( و زي ما عضو ذكر في موضوع من قبل ان فيه عربياتت بتتشال علي ونش لماا حساس بيععطل )
4- العربيه اعتتماديه بوجه عام .
5- صالونها واسع و مريح و عاليه عن الارض و ده اللي خلاني افضلها علي الفيرنا ... و كذلك فراملهاا و ثباتها اعلي من الفيرنا ... ومحدش من الفرناويه يزعل اني بقارن بالفيرنا ... بس ده لانها في وجهه نظري المنافس الوحيد للانوس .
6- سحبها معقول جدا ....انما لو بتحب االتسارع يبقي هات فيرنا لانها في الموضوع ده افضل من اللانوس و يمكن دي بالنسبه لي هيه ميزه الفيرنا الوحيده عن اللانوس .
7- كل العربيات التقفيل المصري فيها عيووووووووووووووووووب و اانت و حظك و بختك بقه و اللي يغيظ ان علامه pdi ملزوقه علي الازاز ....و طبعا كلكم عارفين يعني ايه pdi :-)))))

ااعتذر للاطاله .... و زي ماقلت دي تجربتي الشخصيه .