عند سيارات القرش هم يبكى وهم يضحك

بصراحة مش عارف الموقف ده يبكى ولايضحك
المكان سيارت القرش خلف الميريلاند مصر الجديده الزمان أمس الجمعة الساعة السادسة مساء
بالصدفة كنت موجود مع صديق لى بيشترى سيارة لانوس وكان لسه مشتريين لانوس برضو لصديق آخر من سمير ريان يوم الأربعاء سعر 73500 جنيه المهم سمعنا منهم انها دولقتى سعرها من الآخر 77500جنيه اتصدمنا عادى
إللى مش عادى والموقف المضحك المبكى
رجل وزوجته وابنهم شاب خلصوا فى سيارة كيا ريو سوداء ودفعوا الفلوس فى الخزينة 137000 جنيه
وذهبوا لآستلام السيارة مفيش أى مشكلة لغيت كده
المفاجآة مدير المبيعات يقول معلش أوقف التسليم العربية زادت والسعر الرسمى 145000 جنيه
هذا ما حدث امامى وكنت هتجنن وطبعا المشكلة كبرت والأصوات عليت وكل رجال المبيعات اتجمعوا
وكان تبريرهم للموقف إنهم لازم يطلعوا العربية بالسعر الجديد علشان العربيات دية امانات عندهم يعنى القرش ميملكهاش
طبعا انا مشيت والناس اصحاب المشكلة حالتهم لاتسر عدو ولا حبيب

وهوة دة العادي في مصر طول ما مفيش اي رقيب علي الاسعار او تحديد نسبة ربح للتجار و للاسف احنا بنساعدهم اننا برضو بنشتري كلنا لازم نقاطع وانا عن نفسي مقاطع لحد ما الاسعار تنزل وخليها تصدي عندهم

نعممممممممممممممممممممممم مم

خسارة ان الالفاظ القبيحة ممنوعة هنا :@

يانهار أسود .... هى وصلت لكده ؟

ده ايه الاستفزاز ده ، ده لو بيشتروا أسهم فى البورصة مش هتبقى كده . ايه الجشع ده ما الناس اشترت خلاص و دفعت الفلوس علشان ما يقولوش حجه أنكم حاجزين لسه :angry27:

لا خليها احسن
مع انهم حقهم السعر القديم مقابل الكلمة حتي
ثمن الكلمة اغلي من الفلوس ..

حاجة تقرف والله...وقف حااااال ...

اقتباس:

---

المشاركة الأصلية كتبت بواسطة m i d o

وهوة دة العادي في مصر طول ما مفيش اي رقيب علي الاسعار او تحديد نسبة ربح للتجار و للاسف احنا بنساعدهم اننا برضو بنشتري كلنا لازم نقاطع وانا عن نفسي مقاطع لحد ما الاسعار تنزل وخليها تصدي عندهم

---

متفق معك تماماً وأنا عن نفسي عامل كده فعلاً

جشع تجار
:khd::khd:

ده موقف ما ينفعش فيه اللين ابدا
لو الراجل دفع فلوس واستلم ايصال
يقدر يبلطج زي ما هو عاوز
لانها كدا بقت بتاعته رسمي
يعني اتباعت يغلو العربيات التانيه اللي لسه معروضه لكن دي مش بتاعتهم!!!!!!!
والبلطجه ما ينفعش معاها ادب
كفايه واخدها اغلى من سعرها ب 7 الاف جنيه
هي الريو ازاي تمنها يوصل كده اصلا ؟؟!!!!
.
.
.
وربنا يرحمنا يا رب

لاحول ولاقوة الا بالله

ده استهبال وجشع تجار والله حسبى الله ونعم الوكيل

يا نهار الوان !! 145 الف !!! ليه يا جدعان هو احنا من كفار قريش !!! ده على كده الواحد لحق العربية بتاعتوا ايام الرخص !!
حسبى الله و نعم الوكيل

هههههههه وقفوا التسليم ,,, بيفكرنى بالفلام العربي لما يكونوا هينفزوا فى واحد حكم الاعدام وفى اخر لحظه يقولوا وقفوا التنفيذ
مسخره والله

عادى جدا و على فكرة العيب مش على الحكومة فقط العيب على الناس كلها حكومة و شعب انهم راضيين باستغلال بعضهم و بيستمتعوا بيه. للاسف احنا فى زمن ضاعت فيه الامانة و الاخلاق.

الى يشترى عربية جديدة اليومين دول يبقى غلطان و حرام عليه الفلوس الزيادة الى هيدفعها

اللى الواحد كان ممكن يسمعه ان واحد راح يشترى العربيه و بعد م دفع تمنها او العربون رجع فى كلامه و علشان كده بيبقوا كاتبين على الايصال شرط جزائي على العميل على انه مصروفات اداريه لكن اللى بيحصل ده هو الجديد و هو ان البائع اللى يرجع فى كلامه يبقى المفروض هو كمان يدفع شرط جزائي كتعويض عن حرقه الدم و محاوله الاستغلال و الجشع

حسبى الله و نعم الوكيل .
السيراتو الجديده 2013 الشكل الجديد و الالنترا الجديده الهاى لاين معديين ال 180 الف جنيه ؟؟؟؟؟؟؟؟؟؟؟؟؟؟ ليه بس اوكتافيا هيا و الا بى ام مش عارف

الواحد على كده المفروض كل يوم يبوس الاربع عجلات بتوع عربيته ويحمد ربنا انه نفد بيها قبل الطوفان.

الله المستعان...
محدش يرضى بالكلام ده...

Sent from my SE Arc S using Forum Runner

اقتباس:

---

المشاركة الأصلية كتبت بواسطة محمد بدر

بصراحة مش عارف الموقف ده يبكى ولايضحك
المكان سيارت القرش خلف الميريلاند مصر الجديده الزمان أمس الجمعة الساعة السادسة مساء
بالصدفة كنت موجود مع صديق لى بيشترى سيارة لانوس وكان لسه مشتريين لانوس برضو لصديق آخر من سمير ريان يوم الأربعاء سعر 73500 جنيه المهم سمعنا منهم انها دولقتى سعرها من الآخر 77500جنيه اتصدمنا عادى
إللى مش عادى والموقف المضحك المبكى
رجل وزوجته وابنهم شاب خلصوا فى سيارة كيا ريو سوداء ودفعوا الفلوس فى الخزينة 137000 جنيه
وذهبوا لآستلام السيارة مفيش أى مشكلة لغيت كده
المفاجآة مدير المبيعات يقول معلش أوقف التسليم العربية زادت والسعر الرسمى 145000 جنيه
هذا ما حدث امامى وكنت هتجنن وطبعا المشكلة كبرت والأصوات عليت وكل رجال المبيعات اتجمعوا
وكان تبريرهم للموقف إنهم لازم يطلعوا العربية بالسعر الجديد علشان العربيات دية امانات عندهم يعنى القرش ميملكهاش
طبعا انا مشيت والناس اصحاب المشكلة حالتهم لاتسر عدو ولا حبيب

---

انا مش عارف امتى يكون في اي ضمير ولو حتى جزئي بجد مش ممكن تعالوا نبص قبل الثورة كانت السيارات السيدان من 85 الف ل 120 هاي لاين بأختلاف الانواع و التفاصيل ... ايام الثورة فضلت زي ما هي سنة 2011 في اخرها كانت تتراوح الزيادات ما بين 5 الي 6 الاف جنيه على كل الفئات ... و طبعا الفئات دي بتاعة الطبقات المتوسطة و اللي اغلبنا عن نفسي بيجيبها تقسيط او لو حتى كاش ... دلوقتي بقى و مع زيادة تفاصيل الموديلات يعني بقى بدل اوتوماتيك باسيك و اوتوماتيك فول اوبشنز و هاى لاين .. بقى فيه توب لاين و فولي لوديد و فول اوبشنز و هاف اوبشنز و مش عارف ايه و تلاقي الزيادة بس عبارة عن ولاعه ولا حاجه و حاجات تضحك ... تعالوا بقى للفرق ... الفروق السعرية .. هنلاحظ ان اغلب العربيات السيدان كلها الباسيك الأن و مع النهضة الاقتصاجية التي تعيشها البلاد مع توفير الأمن هنلاحظ ان الاسعار قفزت بسبب الدولار الحجه بتاعة المعارض بداية من 110000 ج م دي كبداية و من بعدها عد و لا حرج ... المرحلة دي و اليومين دول زادت لدرجة ان البداية بقت فوق ال 115000 ج م و انت مغمض و طبعا اغلبنا يا هيونداى يا كيا حتى الشيفورليه برضه لأن الافيو انتاجها وقف اساسا و اللي موجود بواقي انتاج ... مش معنى كده انه وحش بس اللي فاضل فقالولك زجاج فاميه و بتاع عشان يبيع لأن السونيك ما هي الا شكل فقط اللي نازلة من سنتين بره مصر نزلها السنة اللي فاتت و فئة واحدة ما علينا دون الدخول في تفاصيل ... فأختياراتنا كلها يا هيونداى يا كيا يا شيفورليه يا ستروين يا رينو يا لانسر طبعا كل ده زاد الاسعار و نتيجة لحالة الارتباك و عدم وجود رقابة صارمة ... مخليا الدنيا سايبه و مفيش رابط للاسعار .... اتمنى بقى حد يفهم و اتمنى حد يكون عنده دم و ينفذ و يراقب و يحس بالناس و اللي قدرت الحكومة تعملوا انها تحاول رفع الدعم عن البنزين ال 92 برغم ان كل الانواع دي مينفعش الا 92 لإطاله عمر الرشاشات و الحفاظ عليها لأن ال 90 هيمشي لكن عمر الرشاشات هيقل مما يعني تعجيل التلف و من ثم دفع زيادة عند الصيانة يعني من الاخر ياريت يشوفوا المنظومة دي و الحكومة تفكر فيها لأن الناس و الله كلنا تعبنا حبة رحمة كل حاجه بتغلى و مش ناقصة بصراحة

بكل بساطة ياخد فلوسه كامله مش ناقصه جنيه و يمشي

يانهار ابيض ...ابيض ايه ده احمر انا فكرت لحظة لو انا كنت فى الموقف ده
مراتى معايا وفرحان ومنمتش من امبارح وكل الدنيا عارفه انى رايح استلم عربيتى الجديدة
لا وكمان دفعت الفلوس والعربية بتتغسل بره .... كويس انه مطلقش مراته .. اصلها اقدام
المهم الطبيعى انه حاجز واكيد دافع مبلغ تحت الحساب زى ما كلنا حصل معانا كده بندفع
عربون وبعدها بيتصل تعالى استلم ولكن مبناخدتش اى ورقه مكتوب عليها سعر العربية
وبالتالى هو ملوش على المعرض اى كلمة ولا رسمة ولا حتى نظمى .
كان نفسى يا محمد باشا تعرف الموضوع انتهى على ايه ... بس اعتقد انه خلاص مستلمش العربية

فى بقى جزء تانى للقصة ان من الممكن ميكنش العربية دى فيها خير ليه وربنا فداه
من حاجه كانت هتحصل لو انت مكانه كنت هتعمل ايه
تتخناق وتبهدل الدنيا ..... ولا تحمد ربنا انه نجاك من شر ليك ؟؟؟؟؟
لو عرفت الاجابة ..... اكتبها هنا .

بالاسعار دي الطبقة المتوسطة مش حاتقدر تشتري عربيات خالص

حتي لو الدولار نزل الاسعار حتفضل زي ما هي

الحل ايه ؟ مقاطعة فعالة ______ اشك ان الناس تجتمع علي حاجة واحده الان

ربنا يستر علي البلد

ده العادي حصلت معايا بس في اوتو سمير ريان بس كان قبل الغلاه بيوم

الموقف ده ارحم بكثير من واحد حاجز عربية سبورتاج من شهر يوليو أو أغسطس بالسعر الرسمى مثلا للفئة الثانية كان سعرها 186 ألف و راجل محترم مرضيش يشترى بأوفر بريس 205 ألف أو 202 ألف
النصيبة ان بعد طول الأنتظار يلاقى العربية علشان يستلمها بالسعر الرسمى 210 ألف
يقول إيه ولايعمل إيه بصراحة موقف صعب كان الله فى العون

انت قصدك كيا سيراتو ولا كيا ريو فعلا وريو ايه اللي ب 138 الف ورفعت ل 145 الف ؟؟؟؟؟؟؟؟؟؟؟؟؟؟؟؟

ياباشا دي لقمه بوغاشه و جاتله
الباشا خلاص فهم الوكيل ان العربيه خرجت من نص ساعه قبل التليفون ما ييجي و هيخبط ال 8 اساتك غير عمولته
هو ده الشعب المصري النيل رواه و النصب جواه

سيارات القرش ده اول مكان لازم نعمل مقاطعة من المنتدي من الشراء منه

السلام عليكم جميعا
انا موافق جدا على موضوع المقاطعة ده بس على فكرة الغريب دلوقتى ان الخليجى اغلى من الوكيل من 6-10 الف والكارثة الاكبر ان العربية بقت شحة جدا وبالذات فى القاهرة ومع ذلك فى ناس بتحجز على السعر ده وبتشترى كاش كمان وطبعا الاولوية للكاش زى ما احنا كلنا عارفين ربنا يسترها علينا.

النهضة حلوة ما فيش كلام

والله الواحد رغم إحتياجه للعربية بس بعد رفع الأسعار بالطريقة الجنونية ده تراجع لأنه حاسس إن ده نصب رسمى ما هو الناس مش لاقية الفلوس فى الشارع

اقتباس:

---

المشاركة الأصلية كتبت بواسطة hse_eng_ramy

السلام عليكم جميعا
انا موافق جدا على موضوع المقاطعة ده بس على فكرة الغريب دلوقتى ان الخليجى اغلى من الوكيل من 6-10 الف والكارثة الاكبر ان العربية بقت شحة جدا وبالذات فى القاهرة ومع ذلك فى ناس بتحجز على السعر ده وبتشترى كاش كمان وطبعا الاولوية للكاش زى ما احنا كلنا عارفين ربنا يسترها علينا.

---

فعلا حاجه غريبه !!!!!!!!!!!!!!!!!!

والعربيه بقت شاحه عشان الاستيراد قل عشان الدولار

اقتباس:

---

المشاركة الأصلية كتبت بواسطة m2nmsn

انت قصدك كيا سيراتو ولا كيا ريو فعلا وريو ايه اللي ب 138 الف ورفعت ل 145 الف ؟؟؟؟؟؟؟؟؟؟؟؟؟؟؟؟

---

اشاركك نفس الكلام

الحل انه يسحب امواله كاملة و ساعتها هيكونوا زى ايه لان الحركة دى لوى زراع بحجة ارتفاع سعر الدولار و لكن المنطقى ان السيارة لدى المعرض من حوالى اكثر من شهرين او اكثر فذلك ليس من المنطقى علو سعر السيارة لانها بالفعل موجودة على الاراضى المصرية و اذا تم الرجوع للخلف نجد ان سعر الدولار لم يرتفع الا فى المدة الاخيرة من اسبوعين و ليس من شهور وحسبنا الله و نعم الوكيل

اقتباس:

---

المشاركة الأصلية كتبت بواسطة hse_eng_ramy

السلام عليكم جميعا
انا موافق جدا على موضوع المقاطعة ده بس على فكرة الغريب دلوقتى ان الخليجى اغلى من الوكيل من 6-10 الف والكارثة الاكبر ان العربية بقت شحة جدا وبالذات فى القاهرة ومع ذلك فى ناس بتحجز على السعر ده وبتشترى كاش كمان وطبعا الاولوية للكاش زى ما احنا كلنا عارفين ربنا يسترها علينا.

---

الخليجي بداء يرقي نفسه علي الوكيل وده لسوء سمعه التوكيلات بمصر لان فعلا مش فارق كتير اللي معاه توكيل ولا معوش

القرش ده حرامي من ايام ما كان بيبيع الصني الجديده باوفر برايس 20000!

اقتباس:

---

المشاركة الأصلية كتبت بواسطة محمد بدر

بصراحة مش عارف الموقف ده يبكى ولايضحك
المكان سيارت القرش خلف الميريلاند مصر الجديده الزمان أمس الجمعة الساعة السادسة مساء
بالصدفة كنت موجود مع صديق لى بيشترى سيارة لانوس وكان لسه مشتريين لانوس برضو لصديق آخر من سمير ريان يوم الأربعاء سعر 73500 جنيه المهم سمعنا منهم انها دولقتى سعرها من الآخر 77500جنيه اتصدمنا عادى
إللى مش عادى والموقف المضحك المبكى
رجل وزوجته وابنهم شاب خلصوا فى سيارة كيا ريو سوداء ودفعوا الفلوس فى الخزينة 137000 جنيه
وذهبوا لآستلام السيارة مفيش أى مشكلة لغيت كده
المفاجآة مدير المبيعات يقول معلش أوقف التسليم العربية زادت والسعر الرسمى 145000 جنيه
هذا ما حدث امامى وكنت هتجنن وطبعا المشكلة كبرت والأصوات عليت وكل رجال المبيعات اتجمعوا
وكان تبريرهم للموقف إنهم لازم يطلعوا العربية بالسعر الجديد علشان العربيات دية امانات عندهم يعنى القرش ميملكهاش
طبعا انا مشيت والناس اصحاب المشكلة حالتهم لاتسر عدو ولا حبيب

---

جشع وقلة أدب.
كفاية كده علشان الإقاف

و الله يا جماعة فعلا حاجة غريب لا فيه حماية مستهلك ولا حتى حمايه حيوان
المهم ما علينا
الناس ايلي بتعمل في نفسها كده
لو كل واحد بيحترم نفسه و يمسك علي نفسه شوية و ميشتريش التجار هتتعدل مش كفاية خامات اقل من بره و مفيش اى كمليات و كمان استغلال
انا شايف المستهلك هو ايلي يستاهل