تقرير عن الفحص الفنى المجانى بمركز اسكندرية الهندسية للسيارات
أنا عملت الفحص المجانى فى مركز اسكندرية الهندسية للسيارات فى الكيلو 27 مرغم
وهو بعد مجمع البترول والعامرية الدوائية بحوالى كيلو أو اتنين فى اتجاه القاهرة على اليمين والرحلة بتاخد 20 دقيقة تقريبا من كارفور لغاية المركز
والمكان واسع وأنا روحت يوم السبت قلت هيبقى زحمة لقيت فى عملاء بس العدد مش كبير الحمدلله و هما بصراحة بينجزوا
http://nileup.com/up/watermark.php?s...844044.jpg&p=c
http://nileup.com/up/watermark.php?s...844045.jpg&p=c
على فكرة المكان ده غير انه معتمد من نيسان فهو معتمد من هيونداى أيضا
ويوجد مكان لانتظار العملاء مجهز باتنين تليفزيون أحدهم خاص بالكاميرات داخل الورشة لتتمكن من متابعة أعمال الصيانة فى سيارتك
http://nileup.com/up/watermark.php?s...844043.jpg&p=c
والمكان مجهز بانترنت واى فاى
كما يوجد كافتيريا بأسعار معقولة
http://nileup.com/up/watermark.php?s...844031.jpg&p=c
http://nileup.com/up/watermark.php?s...844032.jpg&p=c
وتم استقبالى بترحاب شديد و توضيح لبنود الفحص المجانى
وهى فحص 6 أشياء
الفرامل - ABS - الأنوار - المساحات - الاطارات - العفشة
تم تنظيف تيل الفرامل والباقى تمام الحمد لله والموضوع ما أخدش ساعة
أنا اللى أخرنى شوية انى كنت عاوز أعمل الحكة اللى عندى فى الرفرف الخلفى لانها فيها كذا نقرة قشرت بوية
فدخلونى الورشة وكانت كبيرة بصراحة ودى صورة نصها اليمين
http://nileup.com/up/watermark.php?s...844056.jpg&p=c
و قابلت مهندس السمكرة وشرحلته القصة قالى الأفضل ان الرفرف الخلفى هيتفك من تحت و تترد فطبعا البوية هتقشر اكتر فتتمعجن و تتترش و تخلص فى نفس اليوم
طبعا أنا رفضت لانى مش عاوز الموضوع يكبر و العربية تترش و كده وقلته يلقطها فى النقر اللى اتقشرت فيها المهندس وافق بس رجعلى بعد شوية قالى ما ينفعش لازم الجزء كله يتمعجن و يترش فرفضت نهائى انى أعمل الكلام ده و شكرته
أنا اخترت أحد العرضين و هو الزيت + فلتر الزيت وطلبت انه ما يتغيرش الزيت لانى حاطط توتال 10 آلاف
فطلبت آخد الجركن معايا و الفلتر وان شاء الله أحطهم فى صيانة العشرة آلاف
هما ادونى جركن شل هيليكس الترا 5W-40 الـ 10 آلاف الكبير
جركن الزيت بس نسيت أصور الفلتر
http://nileup.com/up/watermark.php?s...844057.jpg&p=c
الجركن المفروض 4 لتر لكن هما فتحوه خدوا منه نص لتر بس وقالى ان العربية بتاخد 3.5 لتر بفلتر الزيت
لكن المعلومة دى غلط لان فى الكتالوج نفسه بتاع العربية مكتوب 2.8 بدون فلتر و 3 لتر بالفلتر غير انى فى أوتو ايجيبت فى صيانة الألف غيروا الزيت بـ 3 جركن واحد لتر ادامى وكمان الناس اللى شوفتها هنا عملت الفحص الفنى أو غيرت زيت كلهم حطوا 3 لتر بس أو خدوا معاهم 3 جركن واحد لتر
أنا ما دفعتش أى حاجة خالص كله كان مجانا
وعلى فكرة أنا كنت هأحجز فى اوتو ايجيبت فى القاهرة بس الحجز عندهم كان بعد 24 يناير اللى هو نهاية عرض الفحص المجانى بس هما طمنونى ان العرض امتد إلى 31 يناير لكن أنا كنت عاوز انجز لانى ما أضمنش الجو فى اسكندرية وقت السفر لأوتوايجيبت فقلت أروح الهندسية لانى سمعت انهم كويسين وأشوف بنفسى
بعد كده استلمت العربية بعد ما اتغسلت ومشيت من هناك الساعة 11 وأنا كنت طالع من البيت الساعة 9
تقييمى العام ليهم جيد بصراحة و قمة فى الاحترام فى التعامل مع العملاء
أتمنى التقرير يكون أفدكم
بس عندى ملحوظة
كان أحمد تى فى الاستشارى الكبير بتاعنا أشار الى ان المفروض اى حد يروح مركز صيانة يعمل تقرير عنه و يقول رأيه فى المركز بس فوجئت انى لغاية دلوقتى أخر واحد عمل تقييم فى الموضوع ده من آخر شهر 10 اللى فات
مش معقول محدش راح من ساعتها يا رجالة !!!!!
