الموضوع: يا ريت تساعدوني ... معرض في الامارات

المشاركة الأصلية كتبت بواسطة محمد عز

كل حاجة وليها زبونها

بس خلى بالك قبل ما تفتح تعالى واتفرج

لان اغلب الناس بتشترى من محلات الموبليا الكبيرة اللى بتبقى فاتحة فى المولات فى الغالل

لانها فى اوقات التخفضيات بتقدم اسعار ممتازة وفى نفس الوقت خدمات ممتازة

وبيبقى عندهم كل حاجة زى ما بيقولو من الابرة للصاروخ يعنى ستاير وعفش واكسسورات والخ

المحلات زى ايكيا وهوم ار اس وحول الامارات و2xl و هوم سنتر

وده المحلات التى بتخدم قطاع عريض فى الامارات

وفيه محلات تانية بتخدم اللى عايز عفش رخيص وفى الغالب بيبقى اصحابها ايرانيين والجودة منخفضة

وفيه محلات راقية جدا وفى الغالب العفش بيبقى جاي من ايطاليا وفرنسا زى chean one والكساندر

وبيقولو فى سوق اثاث فى الشارقة الاسعار فيه كويسة بس معنديش خلفية عنه

الافضل انك تجى وتلف لفة وبعد كده انت اللى تقرر بنفسك.

اتفق مع الرأى دة تماماً وتحليلة لسوق الامارات

المشاركة الأصلية كتبت بواسطة hytham

الاخ احمد عبد المقصود
شاكر جدا و فخور بمشاركة حضرتك معايا في موضوعي لاني احبك في الله من متابعتي لمواضيعك في قسم الرينو و سعيك المستمر لخدمة الاخوة في المنتدى
مش عارف انا احترت لاني سمعت عكس الكلام دا بخصوص الشريك الاماراتي و سمعت اني ممكن كمستثمر افتح نشاط هناك لوحدي
اكيد هيكون فيه قيود كتير بس المهم انه فيه امكانيه لكدا
مش عارف الصح فين بصراحه

يا باشا العفو..........ده من ذوقك بس

أنا معلوماتي أن مينفعش تفتح أى نشاط من غير ما يكون معاك شريك مواطن غير فى المناطق الحرة.....بس السؤال هنا.........هل ينفع تفتح الشركة نفسها فى منطقة حرة و تأجر معرض خارج المنطقة الحرة ؟ للأسف معرفش الإجابة عن السؤال ده.

بس الميزة هنا هي أنك ممكن توصل لجميع المعلومات تقريباً اللى ممكن تحتاجها عن طريق الأنترنت.

دور على مواقع المناطق الحرة على جوجل و أدخل على كل واحدة و شوف الأنشطة المسموح بيها أيه و ممكن برضه تبعت تسألهم.

بعض المناطق الحرة اللى أنا أعرفها هي
جبل علي فى دبي
الحمرية فى الشارقة
الحمراء فى رأس الخيمة ( دي تحديداً ممكن تدور على هيئة رأس الخيمة للأستثمار و هتلاقيها بسهولة )

و فيه حاجات تانية كتير زي دبي سيليكون أواسيس و دبي أنترنت سيتي و دبي ميديا سيتي بس اعتقد هيكون فيه قيود فيهم على نوع الشركات اللى بتفتح فيهم.

بالنسبة للأجراءات القانونية بفرض أنك قررت تعمل الشركة فى دبي..........يبقى تدخل على موقع الدائرة الإقتصادية فى دبي أو وزارة التجارة و الصناعة مثلاً..........و أنا متأكد أنك هتلاقي هناك الشروط المطلوبة حسب النشاط لأني فاكر أني شوفتها مع واحد صاحبي كان عاوز يفتح شركة هنا.

لو قررت تفتح في الشارقة مثلاً يبقى هتدخل على الموقع بتاع الحاجات دي اللى تبع الشارقة.


و ضروري لما تيجي زيارة تروح سوق الموبيليا فى الشارقة لأنه أكتر حاجة هتبقى شبه اللى أنت عاوزه...........أما باقي الأماكن اللى قالها أستاذ محمد عز معظم الحاجات اللى بتبيعها بتبقى إنتاج تركي أو صيني زي الحاجات بتاعة إستقبال فى مصر.